Siberia ရုပ်ရှင်သစ် အထူးပွဲကို တက်ရောက်ခဲ့တဲ့ ကီနူးရိဗ်

Thu, 2018-07-12 17:17 -- Nwe Mon Phyo

ဇူလိုင် - ၁၂ ၊၂၀၁၈

Siberia ရုပ်ရှင်သစ် အထူးပွဲ ပြသမှု အခမ်းအနားကို မင်းသား ကီနူးရိဗ် တက်ရောက်ခဲ့ပါတယ်။

ဇူလိုင် ၁၁ ရက်က နယူးယောက်မှာ ကျင်းပတဲ့ အထူးပွဲက ကော်ဇောနီ လျှောက်လမ်းပေါ်ကို ဟောလိဝုဒ် နာမည်ကျော်မင်းသားက တခြား တွဲဖက် သရုပ်ဆောင်တွေနဲ့အတူ ရောက်ရှိလာခဲ့တာပါ။

အဲဒီ ဇာတ်ကားမှာ ရိဗ်ဟာ ရုရှားကို စိန်ရောင်းဖို့ သွားရောက်ခဲ့တဲ့ အမေရိကန်သား စိန်ကုန်သည် တစ်ဦးအဖြစ် သရုပ်ဆောင်ထားပါတယ်။

ရုရှားကို ရောက်ရှိနေချိန်မှာ သူနဲ့အတူ ပါလာတဲ့ မိတ်ဆွေဖြစ်သူ ပျောက်ဆုံးသွားလို့ အသည်းအသန် လိုက်ရှာရင်း ဒေသခံ အမျိုးသမီး တစ်ဦးနဲ့ ချစ်ကျွမ်းဝင်ခဲ့ပုံကို ဒီရုပ်ရှင်မှာ ပုံဖော် ရိုက်ကူးပြထားပါတယ်။

ရိဗ်က ဆိုက်ဘေးရီးယား ဒေသမှာ ရုပ်ရှင်သွားရိုက်ရတာဟာ ထူးခြားတဲ့ အတွေ့အကြုံ တစ်ခုဖြစ်ကြောင်း၊ ရိုမေးနီးယား မင်းသမီး အန်နာ အူလာရူနဲ့ တွဲဖက် သရုပ်ဆောင်ရတာလည်း ကျေနပ်စရာဖြစ်ကြောင်း သတင်းထောက်တွေကို ပြောကြားခဲ့ပါတယ်။

အူလာရူကလည်း သူနဲ့ ရိဗ်တို့ဟာ စိတ်ချင်း ဆက်သွယ်နေသလို တစ်ယောက်အထာ တစ်ယောက်သိပြီး အကောင်းဆုံး လက်တွဲ အလုပ်လုပ်နိုင်ခဲ့တယ်လို့ ဆိုပါတယ်။ Siberia ဇာတ်ကားကို ဇူလိုင် ၁၃ ရက်ကစပြီး အမေရိကန်မှာ ရုံတင် ပြသသွားမှာ ဖြစ်ပါတယ်။

Thursday, July 12, 2018