ရာထူးကနေ နုတ်ထွက်လိုက်တဲ့ ဝန်ကြီးချုပ် မန်းဂျော်နီ ဝန်ကြီးအဖွဲ့ကိုဘာမှာခဲ့လဲ

Thu, 2018-01-11 15:39 -- zaythu

ရိုးသားပွင့်လင်းစွာ အလုပ်လုပ်ကြဖို့အတွက်  ဧရာဝတီတိုင်းဒေသကြီး ဝန်ကြီးချုပ် မန်းဂျော်နီက တိုင်းဒေသကြီး အစိုးရ  အဖွဲ့ဝင်တွေကို မှာကြားလိုက်ပါတယ်။

ဝန်ကြီးချုပ် မန်းဂျော်နီကို ရာထူးကနေ သဘောဆန္ဒအလျောက်နုတ်ထွက်ခွင့်ပြုလိုက်တယ်ဆိုတာ ကို သမ္မတရုံးက ထုတ်ပြန်ပြီးနောက်တစ်ရက်မှာပဲ ဝန်ကြီးချုပ် မန်းဂျော်နီက တိုင်းအစိုးရအဖွဲ့ကို မှာကြားလိုက်တာပါ။ ဝန်ကြီးချုပ် မန်းဂျော်နီက ဧရာဝတီတိုင်းဒေသကြီး အစိုးရအဖွဲ့ ဝန်ကြီးတွေ နဲ့ အစည်းအဝေးလုပ်နေတဲ့ ဗီဒီယိုဖိုင်ကို သူရဲ့ ဖေ့စ်ဘွတ်ခ်စာမျက်နှာမှာ ဒီကနေ့ ဇန်နဝါရီလ  ၁၁ ရက်က ဖော်ပြခဲ့တာပါ။

အဲဒီဗီဒီယိုဖိုင်ဟာ ၄၃ စက္ကန့်လောက်သာကြာမြင့်ပြီး ဧရာဝတီတိုင်းဒေသကြီးအစိုးရအဖွဲ့ဝန်ကြီးများနဲ့  ရှေ့ဆက်မယ့် လုပ်ငန်းစဉ်တွေ၊  ဆက်လက်လုပ်ဆောင်ရမယ့် အရာတွေ အတွက် ညှိနှိုင်းအစည်းအဝေး လို့ ရေးသားပြီး တင်ထားတာပဲဖြစ်ပါတယ်။

ဧရာဝတီတိုင်းဒေသကြီးဝန်ကြီးချုပ် မန်းဂျော်နီနဲ့ စိုက်ပျိုးရေး၊ မွေးမြူရေး၊ သယံဇာတနဲ့ ပတ်ဝန်းကျင် ထိန်းသိမ်းရေးဝန်ကြီးဌာန ဝန်ကြီး ဦးဘဟိန်းကို သူတို့ရဲ့သဘောဆန္ဒအလျောက် ရာထူးကနေ နှုတ်ထွက်ခွင့်ပြုလိုက်တာလို့ သမ္မတရုံးက ဇန်နဝါရီ၁၀ရက်မှာ ထုတ်ပြန်ခဲ့တာဖြစ်ပါတယ်။

လစ်လပ်သွားမယ့် ဧရာဝတီတိုင်းဒေသကြီးဝန်ကြီးချုပ်နေရာ အတွက် ဧရာဝတီတိုင်းဒေသကြီးအစိုးရအဖွဲ့ လူမှုရေးဝန်ကြီး ဒေါက်တာလှမြတ်သွေး ဖြစ်လာနိုင်တယ်လို့ သတင်းတွေလည်းထွက်ပေါ်နေပါတယ်။

ရုပ်သံသတင်းထောက် - အိမ့်မြတ်နိုးဇော်

Thursday, January 11, 2018