ကင်ဆာရောဂါထိန်းချုပ်ရေး စီမံကိန်းမြို့ထဲမှာ ရန်ကုန်မြို့ ပါဝင်

Fri, 2017-10-13 10:55 -- zaythu

အရည်အသွေးပြည့်ဝတဲ့ ကင်ဆာရောဂါဝန်ဆောင်မှုကိုအရှိန်မြှင့်တင်ဆောင်ရွက်မယ့် စီမံကိန်းမှာရန်ကုန်မြို့ကို စီမံကိန်းဖော်ဆောင်မယ့် မြို့တစ်မြို့အဖြစ် အရွေးချယ်ခံရတယ်လို့ ကျန်းမာရေးနဲ့ အားကစားဝန်ကြီးဌာနမှ သတင်းရရှိပါတယ်။

ကမ္ဘာ့မြို့ကြီးတွေမှာ ဒီစီမံကိန်းကို ပြုလုပ်မှာ ဖြစ်ပြီး မြန်မာနိုင်ငံအနေနဲ့ ရန်ကုန်မြို့ကိုရွေးချယ်ထားတာ ဖြစ်တယ်လို့ သိရပါတယ်။ 

ဒီကင်ဆာရောဂါစီမံကိန်းနဲ့ ပတ်သက်ပြီး ကျန်းမာရေးနဲ့ အားကစားဝန်ကြီးဌာနနဲ့ နိုင်ငံတကာကင်ဆာရောဂါထိန်းချုပ်ရေးအဖွဲ့ကြီး (UICC)တို့ နားလည်မှုစာချွန်လွှာလက်မှတ်ရေးထိုးပွဲကို  အောက်တိုဘာလ ၁၂ရက်က ရန်ကုန်မြို့၊ ချက်ထရီယမ် ဟိုတယ်မှာ ပြုလုပ်ခဲ့ပါတယ်။ ဒီစီမံကိန်းကို နိုင်ငံတကာ ကင်ဆာထိန်းချုပ်ရေး အဖွဲ့ကြီး (UICC)က ကမ္ဘာ့မြို့ကြီးနှစ်ရာကျော်မှာ အကောင်အထည်ဖော် ဆောင်ရွက်နေတာဖြစ်ပါတယ်။

အဲ့ဒီမြို့တွေထဲက ကနဦးလေ့လာဆန်းစစ်မယ့် နိုင်ငံသုံးနိုင်ငံအဖြစ် မြန်မာနိုင်ငံမှ ရန်ကုန်မြို့၊ ကိုလံဘီယာနိုင်ငံမှ ကာလီမြို့နဲ့  ပါရာဂွေးနိုင်ငံမှ အဆန်ရှန်မြို့တို့ကို ရွေးချယ်ခဲ့တာဖြစ်တယ်လို့ သိရပါတယ်။ ကင်ဆာရောဂါ စီမံကိန်းဆောင်ရွက်ဖို့ ရွေးချယ်ရာမှာ  လူဦးရေတစ်သန်းအထက်ရှိတဲ့  မြို့ကြီးတွေကို ရွေးချယ်တာဖြစ်တယ်လို့ သိရပါတယ်။

ရွေးချယ်ခံရတဲ့ မြို့တွေမှာ ကင်ဆာရောဂါနဲ့သက်ဆိုင်တဲ့ ၀န်ဆောင်မှုလုပ်ငန်းတွေရဲ့ လိုအပ်ချက်တွေ
 ဆန်းစစ်လေ့လာပြီး တွေ့ရှိချက်တွေအပေါ် မူတည်ကာ ကင်ဆာရောဂါဝန်ဆောင်မှုတွေကို  စံနမူနာမြို့ကြီးတွေအဖြစ် ဆောင်ရွက်သွားမှာ ဖြစ်ပါတယ်။

စီမံကိန်းကာလကတော့ ၂၀၁၇ ကနေ ၂၀၂၅ခုနှစ်အထိဖြစ်ပြီး ၂၀၂၅ ခုနှစ်မှာ ကင်ဆာရောဂါကြောင့် အချိန်မတိုင်မီသေဆုံးနှုန်းကို ၂၅ ရာခိုင်နှုန်း လျော့ချသွားမှာဖြစ်တယ်လို့ သိရပါတယ်။ ကမ္ဘာမှာ နှစ်စဉ် ကင်ဆာရောဂါကြောင့် လူဦးရေ ၈.၂သန်း သေဆုံးနေပြီး လူဦးရေ ၁၄သန်းခန့်က ကင်ဆာရောဂါကို ခံစားနေရတယ်လို့ သိရပါတယ်။

ရုပ်သံသတင်းထောက် - လွင်သဲငယ်ဦး 

Friday, October 13, 2017