စိုက်ပျိုးရေးကဏ္ဍ ရင်းနှီးမြှုပ်နှံမှု တိုးမြှင့်လာရန် အစိုးရကအခွန်ကင်းလွတ်ခွင့်အချို့ စီစဉ်

စိုက်ပျိုးရေးကဏ္ဍတွင် ရင်းနှီးမြှုပ် နှံမှုများ တိုးမြှင့်ဝင်ရောက်လာရန် အစိုးရက ပြင်ဆင်ဆောင်ရွက်နေ ကြောင်း မြန်မာနိုင်ငံရင်းနှီးမြှုပ်နှံမှုကော်မရှင် အတွင်းရေးမှူး ဦးအောင်နိုင်ဦးက ပြောသည်။

အစိုးရက ရင်းနှီးမြှုပ်နှံမှု မြှင့်တင်မည့်ကဏ္ဍတွင် လယ်ယာစိုက်ပျိုးရေးနှင့် ဆက်စပ်သောဝန်ဆောင်မှုလုပ်ငန်းများပါဝင်ပြီး ယင်းကဏ္ဍ၌ ပြည်တွင်း၊ ပြည်ပရင်းနှီးမြှုပ်နှံမှုများ ပြုလုပ်မည်ဆိုပါက ၀င်ငွေခွန်အပါအ၀င် အခြားအခွန်များပါ ကင်းလွတ်ခွင့်ပြုကြောင်း ၎င်းကဆိုသည်။

 ‘‘အရင်ကဆို လယ်ယာကဏ္ဍမှာ ရင်းနှီးမြှုပ်နှံမှုအ၀င်အနည်းဆုံးပဲ။ ဒါကိုအစိုးရက မြှင့်တင်နိုင်ဖို့ ကြိုးစားနေပါတယ်’’ ဟု ဦးအောင်နိုင်ဦးက ပြောကြားသည်။

စိုက်ပျိုးရေးကဏ္ဍတွင် တိုက်ရိုက်သော်လည်းကောင်း၊ သွယ်ဝိုက်၍သော်လည်းကောင်း နိုင်ငံရေးလူဦးရေ၏ ၇၀ ရာခိုင်နှုန်းပါ ၀င်နေခြင်းကြောင့် ရင်းနှီးမြှုပ်နှံမှု တိုးမြှင့်ရေးကဏ္ဍ၌ ထည့်သွင်း ရခြင်းဟု ၎င်းက ပြောသည်။

စိုက်ပျိုးရေးကဏ္ဍတွင် နိုင်ငံ ခြားရင်းနှီးမြှုပ်နှံမှုသည် ၁၉၈၈ မှ၂၀၁၇ ဖေဖော်ဝါရီလကုန်အထိ ကန်ဒေါ်လာ ၂၄၉ သန်းကျော်ရှိကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနစာရင်းများအရ သိရသည်။

အစိုးရ၏ ဦးစားပေးရင်းနှီး မြှုပ်နှံမှုခွင့်ပြုမည့် ကဏ္ဍများသည် ကုန်ထုတ်လုပ်မှုကဏ္ဍ၊ အခြေခံအဆောက်အအုံကဏ္ဍနှင့် စိုက်ပျိုး ရေးကဏ္ဍတို့ဖြစ်သည်။

စိုက်ပျိုးရေးကဏ္ဍကို ရင်းနှီး မြှုပ်နှံမှုများ တိုးမြှင့်ဝင်ရောက်ရန် အစိုးရကစီစဉ်နေခြင်းကို ကြိုဆို ပြီး ၀င်ရောက်လာသည့် ရင်းနှီးမြှုပ်နှံမှုများကို အမြန်ဆုံး အကောင်အထည်ဖော်နိုင်ရန် တိုင်းနှင့်ပြည်နယ် အစိုးရအဖွဲ့များက လျင်မြန်စွာခွင့်ပြုပေးရန် လိုအပ်ကြောင်း မြန်မာနိုင်ငံ ဆန်စပါးအသင်းချုပ်ဒုတိယဥက္ကဋ္ဌ ဒေါက်တာစိုးထွန်း က ပြောသည်။

 ရင်းနှီးမြှုပ်နှံရန် အဆိုပြုလွှာများ စစ်ဆေးရာတွင် အချိန်ကြာမြင့်ပြီး ကြိုးနီစနစ်များနေပါက ရင်းနှီးမြှုပ်နှံသူများ အခက်အခဲ ဖြစ်စေသည်ဟု ဒေါက်တာစိုးထွန်းက ပြောသည်။

Top News