ရခိုင်ကမ်းလွန်ရှိ လုပ်ကွက်နှစ်ခုမှ ဓာတ်ငွေ့များ ခုနစ်နှစ်လွန်မှသာ ပြည်တွင်းသုံး ဓာတ်ငွေ့အဖြစ် အသုံးပြုနိုင်မည်ဟုဆို

ဓာတ်ပုံ − MOI

ရခိုင်ကမ်းလွန်ဒေသရှိ AD7 နှင့် A6 လုပ်ကွက်နှစ်ကွက်မှ ထွက်ရှိမည့် ဓာတ်ငွေ့များသည် အချိန်ကာလအားဖြင့် ခုနစ်နှစ်နောက်ပိုင်းမှသာ ပြည်တွင်းသုံး ဓာတ်ငွေ့အဖြစ် ဝင်ရောက်လာနိုင်မည်ဖြစ်ကြောင်း လျှပ်စစ်နှင့် စွမ်းအင်ဝန်ကြီးဌာန ညွှန်ကြားရေးမှူးချုပ် ဦးဇော်အောင်က ပြောသည်။

ရေနံနှင့် သဘာဝဓာတ်ငွေ့ ထုတ်လုပ်နိုင်ရန် လုပ်ကွက်များ စမ်းသပ်တူးဖော်ရပြီး ထုတ်လုပ်သည့်အဆင့်သို့ ရောက်ရှိရန် တည်ဆောက်ရေးလုပ်ငန်းများကို လုပ်ကိုင်ရ၍ အနည်းဆုံး ခုနစ်နှစ်ခန့် အချိန်ယူရသည်ဟု ဦးဇော်အောင်က ဆိုသည်။

‘‘အဲဒီတော့ ခုနစ်နှစ်နောက်ပိုင်းမှသာလျှင် ဒီဓာတ်ငွေ့တွေက ပြည်တွင်းသုံး ဓာတ်ငွေ့အဖြစ် နဲ့ ဝင်ရောက်လာမှာ ဖြစ်ပါတယ်’’ ဟု နိုင်ငံတော်အစိုးရ၏ ပထမတစ်နှစ်အတွင်း ပြုပြင်ဆောင်ရွက်ခဲ့မှုများနှင့်ပတ်သက်သော သတင်းစာရှင်းလင်းပွဲတွင် ဦးဇော်အောင်က ပြောသည်။ ရခိုင်ကမ်းလွန်ဒေသရှိ ရေနံ နှင့် သဘာဝဓာတ်ငွေ့ လုပ်ကွက် နှစ်ခုတွင် အမေရိကန်ရေနံကုမ္ပဏီ Woodside က ယခု ၂၀၁၇ ဖေဖော်ဝါရီကစတင်၍ တူးဖော်ရေးလုပ်ငန်းများ လုပ်ကိုင်နေသည်။

 အဆိုပါ လုပ်ကွက်နှစ်ခုမှ AD7 လုပ်ကွက်ကို ဒေဝူးနှင့် ပူးပေါင်းလုပ်ဆောင်နေပြီး A6 လုပ်ကွက်ကို EPRL ကုမ္ပဏီနှင့် ပူးတွဲလုပ်ကိုင်မည်ဖြစ်သည်။

‘‘A6 နဲ့စာရင် AD7 က အခြေအနေပိုကောင်းပါတယ်။ စီးပွား ဖြစ်ထုတ်ဖို့၊ မထုတ်ဖို့၊ Commer-cially ဖြစ်ဖို့အတွက်ဆိုတာကတော့ အဲဒီတူးဖော်တဲ့ အောင်မြင်မှု၊ ဖွံ့ဖြိုးတိုးတက်မှုအပေါ်မှာ ပြန်လည်အခြေခံပြီးတော့ သုံးသပ်မှာ ဖြစ်ပါတယ်’’ ဟု ဦးဇော်အောင်က ပြောသည်။

လက်ရှိတွင် မြန်မာ့ကမ်းလွန်၌ ရေနံနှင့် သဘာဝဓာတ်ငွေ့တူးဖော်ရေး ရေနံစင်သုံးခုရှိပြီး ယခင် သမ္မတဟောင်း ဦးသိန်းစိန် အစိုးရလက်ထက် ၂၀၁၃ ၌ ပထမဆုံးအကြိမ် လုပ်ကွက်အသစ် ၂၀ တင်ဒါခေါ်ယူခဲ့ပြီး Shell, Chevron နှင့် Ophir ကုမ္ပဏီများက လုပ်ကိုင်ခွင့်ရရှိခဲ့သည်။

လုပ်ကွက်ရရှိထားသော ကုမ္ပဏီများသည် လက်ရှိတွင် စမ်းသပ်ရှာဖွေရေးတူးဖော်ရေး ကာလအဖြစ် ဆောင်ရွက်နေဆဲဖြစ်၍ ယခုနှစ် ၂၀၁၇ တွင် လုပ်ကွက်သစ်များ ခေါ်ယူရန် မရှိသေးကြောင်း ဦးဇော်အောင်က ဆိုသည်။

အကယ်၍ စမ်းသပ်တူးဖော်မှု မအောင်မြင်ပါက ကုမ္ပဏီများက လုပ်ကွက်များ ပြန်လည်အပ်နှံမည်ဖြစ်ပြီး တင်ဒါခေါ်ယူထားသည့် လုပ်ကွက်ပေါင်း ၄၀ ခန့်ရှိသည်။

‘‘နောက်ထပ် ကျွန်တော်တို့ ဒီရှာဖွေရေးကာလက အောင်မြင်မှုတွေအပေါ်မှာ မူတည်ပြီးတော့ အခြေခံစဉ်းစားသွားမှာ ဖြစ်ပါတယ်’’ဟု လုပ်ကွက်သစ်များ ထပ်မံခေါ်ယူရန် ကိစ္စနှင့်ပတ်သက်၍ ဦးဇော်အောင်က ရှင်းလင်းပြောကြားသည်။

More in Business Section