စိတ်ကိုသွယ်ယူဖို့ အနုပညာ မြောင်းကလေးတွေ

(တစ်)

ရန်ကုန်မြို့တွင်းက လူစည်ကားသည့် မီးပွိုင့်တချို့တွင် အရောင်းသွက် စာအုပ်တချို့ကို မိတ္တူကူးကာ စာအုပ်အဖြစ်ချုပ် လုပ်ရောင်းချသူ တချို့ကို မကြာခဏတွေ့ရလေ့ရှိပါသည်။  မြို့ကြီး ပြကြီးတို့၏ စာအုပ်ဆိုင်များ၌ လည်း ထိုထိုဤဤသော ထိပ်တန်းစာအုပ်များစွာကို မိတ္တူပွားကာ သင့်တင့်လျောက်ပတ်သော နှုန်းထားများဖြင့်ရောင်းချပေးနေသည် ကို ကိုယ်တိုင်ပင်လျှင် ဝင်ရောက် ဝယ်ယူအားပေးသည်အထိ နီးနီးစပ်စပ် ရှိပါသည်။ အခြေအနေ အကြောင်းတရားပေါင်း များစွာကြောင့် ဤသို့ ထွက်ပေါ်နေရသည်ကို နားလည်သော်လည်း တစ်ခါကမူ အနောက်ကမ္ဘာက လူတစ်ယောက်နှင့် ဥရောပကလူတစ်ယောက်တို့ကို ဤကိစ္စမေးကြည့်ဖူးပါသည်။ သူတို့ကမ္ဘာကြီး လည်ပတ်နေရာက ချက်ချင်းရပ်သွားသည်နှင့် ကြုံလိုက်ရသည့်အလား အံ့အာသရဲ ဖြစ်သွားပါသည်။ ထိုသို့ လုပ်ကိုင်ဆောင်ရွက်ဖို့ ဆိုသည်ကို သူတို့ဆီကလူတွေ စိတ်မကူးကြ၊ စိတ်မကူးမိကြ၊စိတ် ကူးလေ့လည်းမရှိကြ၍ ဖြစ်ပါ သည်။

ကျွန်တော်တို့ဆီ၌ အသံကလေးတွေ ညံနေသည့် ခိုးကူးအခွေကိစ္စကိုလည်း ကျွန်တော်မေးကြည့်ဖူးပါသည်။ ရုပ်ရှင်သီချင်းစသည်ဖြင့် လူကြိုက်များသည့်အခွေတို့ကို ပြန်ကူး၍ မရောင်းကြဘူးလားဆိုသည့် မေးခွန်းပဲဖြစ်ပါသည်။ အမေးခံရသည့် သူတို့၏ မျက်နှာများက အံ့အံ့သြသြမျက်နှာကြီးများ။ ဘယ်လိုအတွေးတွေပါလိမ့်၊ ဘယ်လိုစိတ်ကူးတွေပါလိမ့်ဟူသည့် အသွင်အပြင်။ ဟုတ်ပါသည်။ သူတို့၌ ထိုစိတ်ကူးမျိုး ကူးလေ့မရှိပါ။ သူတို့ ကမ္ဘာ၌ ထိုစိတ်ကူးမျိုး ကူးမိလာအောင် လေ့ကျင့်မပေး။

(နှစ်)

တရားပွဲကောင်းကောင်းများကို နာလေ့ရှိသူ ကျွန်တော်က ယခုနောက်ပိုင်း နည်းပညာတို့ ဖွံ့ဖြိုး တိုးတက်လာသည့်အခါ Memory Stick များဖြင့်ပင်လျှင် တရားအပုဒ်ပေါင်းများစွာကို ထည့်သွင်း ထားပြီး အိတ်ဆောင်ရေဒီယိုကလေးဖြင့် မကြာခဏနာယူမိပါသည်။ ယခုအခါ ပါမောက္ခချုပ်ဆရာတော်ဒေါက်တာ နန္ဒမာလာဘိ ဝံသ၏ တရားများကို တစ်ပုဒ်ပြီး တစ်ပုဒ်နာယူနေမိခဲ့ရာ တရားတော်တစ်ပုဒ်တွင် ဆရာတော်က စိတ်ဆိုသည်မှာ ရှိနေတာလား၊ ဖြစ်လာတာလားဆိုသည့် မေးခွန်းကို မေးကာ မီးနှင့် စောင်းသံကို ဥပမာပေးလျက် ရှင်းပါသည်။

မီးသည် ရှိနေသည့်အရာမ ဟုတ်တဲ့။ ဘီးလုံး၊ဓာတ်ငွေ့၊ မီး ခြစ်ကျောက်စသည်တို့အထဲတွင် မီးမရှိတဲ့။ လက်ဖြင့် ဖိခြစ်လိုက် သည့်အခါတွင်မှ မီးဖြစ်လာခြင်း ဖြစ်သည်တဲ့။ ထို့အတူ စောင်းကြိုး တို့၊ စောင်းအိုးတို့အထဲတွင်လည်း အသံမရှိတဲ့။ လက်ဖြင့်ဖိကာတီးခတ်လိုက်သည့်အခါတွင်မှ စောင်းသံက ဖြစ်ပေါ်လာခြင်း ဖြစ်သည်တဲ့။

စိတ်သည် ထိုသို့သောအရာ ပါပဲ။ မူလကတည်းကရှိနေသည့် အရာမဟုတ်ပါတဲ့။ အာရုံနှင့်အရာဝတ္တုထိတွေ့လိုက်သည့်အခါတွင်မှ ခံစားမှုဝေဒနာ ပေါ်လာကာ စိတ်ဟူ၍ဖြစ်ပေါ်လာခြင်း ဖြစ်ပါသည်။ သို့ဖြစ်ရာ စိတ်ထဲ၌ မည်သို့ ခံစားမလဲ၊ စိတ်ကို မည်သို့ ကူးမလဲဆိုသည်တို့က လေ့ကျင့်ပျိုးထောင်ပေးရသောကိစ္စ ဖြစ်ပါသည်တဲ့။ စိတ်သည် ပရိုက်တစ် (Practice) ခေါ် လေ့ကျင့်ပျိုးထောင်ပေးရသည့်အရာတဲ့။

ကျွန်တော်တို့ လူ့အဖွဲ့အစည်းက ကျွန်တော်တို့၏ စိတ်ကူးများကို မည်သို့ပျိုးထောင်ပေးခဲ့ပါလိမ့်။ အထက်တစ်နေရာ၌ ကျွန်တော်မျှဝေခဲ့သည့်အတိုင်း သူတို့ စိတ်ကူးလေ့မရှိသည့် အရာတို့ကို ကျွန်တော်တို့ စိတ်ကူးမိခဲ့ကြပြီ။

(သုံး)

လူတစ်ဦး၏ အရည်အချင်းကို တိုင်းသည့်အခါယခင်က အိုင်ကျူ (Intelligence Quotient) ခေါ် ဉာဏ်ပညာအရည်အသွေး အနိမ့်အမြင့်ဖြင့်တိုင်းပါသည်။ ရူပဗေဒမည်မျှတော်၊ ဓာတုဗေဒမည်မျှတော်၊ သင်္ချာ မည်မျှတော်၊ ဆေးပညာမည်မျှတော်၊ နည်းပညာမည်မျှတော်စသည့်...စသည်။

ယခုအခါ၌မူ အီးကျူ (Emotional Quotient) ခေါ် စိတ်ခံစားမှုအလေးအပေါ့၊ အနိမ့်အ မြင့်၊ အနုအရင့်နှင့်ပါ ထည့်သွင်း၍ တိုင်းတာလာပါသည်။

ကျွန်တော်တို့တစ်တွေ အီးကျူ (EQ) များနိမ့်နေခဲ့ကြလေ ရော့သလား။ ခံစားနိုင်မှု စွမ်းရည်တွေကျဆင်းသွားခဲ့ကြလေရော့သလား။ မလွမ်းတတ်၊မဆွေးတတ်၊ မချစ်တတ်၊ မမြတ်နိုးတတ်၊ မရွှင်တတ်၊ မမြူးတတ်။ စိတ်ကန္တာရ ကြီးများ၊ စိတ်ဖုန်းဆိုးတောကြီးများ။ ကျွန်တော်တို့ စိတ်များကို မည်သို့ကူး၊ မည်သို့တွေး၊ မည်သို့ခံစားစသည့် လေ့ကျင့်ခန်းမျိုးကောင်းကောင်းလုပ်ထားခဲ့ကြပုံမရ။

ကိုယ်ကာယကြံ့ခိုင်တောင့်တင်းဖို့ရာ ကာယလေ့ကျင့်ခန်းပေါင်းများစွာကို ကျွန်တော်တို့ လုပ်ကြရပါသည်။ စိတ်ခံစားရမှု ကို ဖွံ့ဖြိုးကြွယ်ဝရန်တို့လည်း စိတ်လေ့ကျင့်ခန်းပေါင်းများစွာကို လုပ်ကြရပါသည်။ စိတ်ခံစားမှုလေ့ ကျင့်ခန်းအတွက် အကောင်းဆုံးအရာကဖြင့် အနုပညာပဲ ဖြစ်ပါသည်။

ကဗျာကောင်းကောင်းရွတ်ဆို၊ ဝတ္တုကောင်းကောင်းဖတ်၊ သီချင်းကောင်းကောင်းနားထောင်၊ ရုပ်ရှင်ကောင်းကောင်းကြည့်။ ပန်ချီ၊ ပန်းပုအနုပညာကောင်းကောင်းခံစား၊ ဤသို့ဖြင့် လူတို့၏ စိတ်က ခံစားနိုင်မှုစွမ်းအားမြင့်သွားကာ ဖွံ့ဖြိုးတိုးတက်၍လာခြင်း ဖြစ်ပါသည်။

ကျွန်တော်တို့၏ ပတ်ဝန်းကျင်က ကျောင်းတွင်းပညာရေးရော ကျောင်းပြင်ပညာရေးပါအီး ကျူ (EQ) ကိစ္စအား  နည်းပါသည်။ အိုင်ကျူ (IQ) ကိစ္စကို အသားပေးလွန်းပါသည်။ ထို့ကြောင့် လူမျိုး၏ စိတ်ကူးများ၊ စိတ်ခံစားမှု များပါ ကျဆင်းသွားပါသည်။ယင်းကို ကျွန်တော်တို့၏ ဂီတ၊ ကျွန်တော်တို့၏ ရုပ်ရှင်၊ ကျွန်တော်တို့၏ စာပေများပေါ်မှာ အကဲခတ် တွေ့ရှိနိုင်ပါသည်။

(လေး)

ရေကိုပင်လျှင် အလိုရှိရာသို့ ရောက်စေရန် မြောင်းကြီးမြောင်းငယ်တို့ဖြင့် သွယ်ယူ၍ ရပေရာ စိတ်ကိုလည်း အလိုရှိရာအနေအထားသို့ ရောက်စေရန် သွယ်ယူ၍ရသည်ဟု ဆိုပါသည်။

စိတ်ကိုသွယ်ယူသည့် မြောင်းကြီးမြောင်းငယ်တို့က အနုပညာပဲဖြစ်ပါသည်။ အနုပညာချောင်း မြောင်းကတိမ်သွား၊ ကောသွားခဲ့သော် စိတ်ရေစီးကြောင်းတို့ ပိတ်ဆို့တွန့်ခေါက်ကာလိုရာသို့ ခရီးမတွင် နိုင်ပါလေတော့။

ကျွန်တော်တို့စိတ်တွေ မှန်မှန်ကန်ကန်ကူးဖို့ရာ လိုအပ်ပါသည်။ မြန်မာ့စိတ်ကူးက မဟုတ်ကဟုတ်က ဘက်၌ ကူးကာမပျော်မွေ့ကြဖို့ လိုအပ်ပါသည်။ တစ်နှစ်အကူး၌ စိတ်ကူးကောင်းသော လူများအဖြစ် ကိုယ့်ကိုယ်ကိုယ် ထုဆစ်ပုံဖော်နိုင်ကြပါစေကြောင်း ဆုတောင်းရပါသည်။။

Top News