မြန်မာ့စီးပွားရေးအတွက် ရုံးဖွင့်ရက် ငါးရက်

ရန်ကုန်မြို့ရှိ ဆိပ်ကမ်းတစ်ခုတွင် ဆိုက်ကပ်နေသော ပင်လယ်ကူးသင်္ဘောတစ်စီး (ဓာတ်ပုံ − စိုင်းဇော်)

နှစ်သစ်ကူးရုံးပိတ်ရက်နှင့် ပတ်သက်၍ အစိုးရ၏ မပြတ်သားသည့် ကြေညာချက်က စီးပွားရေးလုပ်ငန်းရှင်များကို ဆုံးဖြတ်ချက်ေ၀၀ါးစေခဲ့သည်။ ရုံးပိတ်ရက်ငါးရက် နှင့် ၁၀ ရက် မပြတ်သားခြင်းကြောင့် ယခုနှစ်တွင် လုပ်ငန်းတိုး မြှင့်ရန် မဖြစ်နိုင်ကြောင်း ပို့ကုန်သွင်းကုန် ဒါရိုက်တာဒေါက်တာစိုးထွန်းက ပြောသည်။

စီးပွားရေးလုပ်ငန်းများ အဆင်ပြေစေရန် ရည်ရွယ်ကာ နှစ်သစ်ကူးရုံးပိတ်ရက် လျှော့ချခြင်းဖြစ်သော်လည်း မရေရာသည့် ကြေညာချက်ကြောင့် ယခုနှစ်တွင် လုပ်ငန်းများတိုးချဲ့နိုင်ခြင်းမရှိကြောင်း ပို့ကုန်သွင်းကုန်လုပ်ငန်းရှင် ၁၀ ဦးကျော်က 7 Day အား ဖြေကြားခဲ့သည်။

နိုင်ငံတကာနှင့် ဆက်သွယ်ဆောင်ရွက်နေရသည့် ဘဏ်လုပ်ငန်း အခက်အခဲ၊ ကုန်စည်စီးဆင်းမှု နှောင့်နှေးကြန့်ကြာခြင်းတို့ကြောင့် နှစ်သစ်ကူးရုံးပိတ်ရက်ကို ၁၀ ရက်မှ ငါးရက်သို့ လျှော့ချကြောင်း ပြည်ထောင်စု အစိုးရအဖွဲ့က မတ်လ ၁၀ ရက်စွဲဖြင့် အမိန့်ကြော်ငြာစာ ထုတ်ပြန်ခဲ့သည်။

အစိုးရက သင်္ကြန်ပိတ်ရက် မရောက်မီ တစ်လကျော်အလိုတွင် နှစ်သစ်ကူးရုံးပိတ်ရက်လျှော့ချကြောင်း ထုတ်ပြန်ကြေညာသဖြင့် ဝေဖန်မှုများစွာပေါ်ထွက်လာပြီးနောက် နှစ်သစ်ကူးရုံးပိတ်ရက်ကို မူလအစီအစဉ်များရှိပါက ၁၀ ရက်အပြည့်ခံစားနိုင်ရန် ၀န်ကြီးဌာနအသီးသီးက စာထုတ်ပြန်ပေးခဲ့သည်။

‘‘ကုန်သွယ်ရေးမှာက လုပ်ရတာက အများကြီးပဲ။ ကိုယ်ကလုပ်ချင်ရင်တောင် ကားရဖို့၊ ကုန်တင်ကုန်ချ အလုပ်သမားရဖို့ ဆိပ်ကမ်းအေးဂျင့်၊ အကောက်ခွန်ကင်းရှင်းရေးလုပ်ငန်းတွေ အပါအ၀င် ကဏ္ဍအားလုံးစုံမှရတယ်’’ ဟု ပြည်ပသို့ ဆန်တင်ပို့နေသည့် လုပ်ငန်းရှင်ဦးမျိုးသူရအေးက ဆိုသည်။

ပို့ကုန်၊ သွင်းကုန်များနှင့် ဆက်စပ်နေသည့်  မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းက ဧပြီ ၁၈ ရက်မှ ၂၃ ရက်အထိ ပင်ရင်းသက်သေခံလက်မှတ်များ၊ အသင်းသားရေးရာလုပ်ငန်းများနှင့် သက်ဆိုင်သည့် ကိစ္စများ ဆောင်ရွက်နိုင်ရန် ရုံးဖွင့်လှစ်မည်ဟု ကြေညာထားသည်။

ထို့အပြင် ကုန်သွယ်ရေးလုပ်ငန်းများ၌ အဓိကကျသော လိုင်စင်များထုတ်ပေးနေသည့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနလက်အောက်ရှိ ကုန်သွယ်ရေးဦးစီးဌာနက နေပြည်တော်ရုံးအပါအ၀င် ရန်ကုန်၊ မန္တလေး၊ မြစ်ကြီးနား၊ ကျိုင်းတုံတို့တွင် ပို့ကုန်သွင်းကုန်ရုံးဖွင့်လှစ်ပြီး လိုင်စင်ထုတ်ပေးမှုများကို ဆောင်ရွက်မည်ဟု ကြေညာထားသည်။

ကုန်သွယ်ရေးလုပ်ငန်းများအတွက် ငါးရက်ပိုမိုလုပ်ကိုင်ခွင့်ရလာသော်လည်း အလုပ်သမားများ အခက်အခဲမဖြစ်စေရန်နှင့် ပိတ်ရက်ကို အကြောင်းပြုပြီး မလိုလားအပ်သည့် ပြဿနာများဖြစ်မလာစေရေးအတွက် ပိတ်ရက် ၁၀ ရက်ပေးနိုင်ရန် မတ်လ ၁၃ ရက်က အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဦးစီးဌာနက လုပ်ငန်းရှင်များနှင့် ညှိနှိုင်းဆွေးနွေးခဲ့ရာ လုပ်ငန်းရှင်အများစုက လာမည့်နှစ်တွင် အစိုးရ၏ ပိတ်ရက် ငါးရက်ကို စတင်ကျင့်သုံးမည်ဖြစ်ပြီး ယခုနှစ်၌ ယခင်အတိုင်းခွင့်ပြုမည်ဟု သဘောတူညီခဲ့သည်။

‘‘အစိုးရက ပိတ်ရက်ကို အမျိုးမျိုးကြေညာနေတော့ ကျွန်တော်တို့ကလည်း ကုမ္ပဏီကို အရင်အတိုင်း ၁၀ ရက်ပဲ ပိတ်လိုက်တယ်’’ ဟု ပြည်ပသို့ ပဲမျိုးစုံတင်ပို့ ရောင်းချနေသည့် လုပ်ငန်းရှင် ဦးမင်းကိုဦးက ပြောသည်။

သင်္ဘောလိုင်းများနှင့် ပို့ကုန်များအတွက် အခြားသော ၀န်ကြီးဌာန ထောက်ခံချက်များရရှိရန် မလွယ်ကူခြင်း၊ ကုန်ပစ္စည်းနှင့် ပတ်သက်၍ စာရွက်စာတမ်းများ ပေးပို့ရန် အမြန်ချောပို့လုပ်ငန်းများ ပိတ်ထားခြင်းစသည့်အခက်အခဲ များကြောင့် ယခုနှစ်တွင် လုပ်ငန်းမတိုးချဲ့နိုင်သေးကြောင်း လယ်ယာထွက်ကုန်သီးနှံများတင်ပို့နေသည့် Golden Crop ကုမ္ပဏီမှ အုပ်ချုပ်မှုဒါရိုက်တာ ဒေါ်ထူးထူးလတ်က ပြောသည်။

‘‘သင်္ဘောလိုင်းတွေက ၁၀ ရက် ပိတ်တယ်။ ပိုးသတ်ပြီးစီး ကြောင်း လက်မှတ်ထုတ်ပေးတဲ့ရုံးကလည်း ဒီလိုပဲ၊ ထောက်ခံချက်က တင်ပို့တဲ့ ပစ္စည်းတိုင်းယူရ တော့ လုပ်ဖို့မလွယ်ဘူး’’ ဟု ဒေါ်ထူးထူးလတ်က ပြောသည်။

ကွန်တိန်နာကားများငှားရမ်းရမှု အခက်အခဲ၊ အလုပ်သမားများရရှိရန် အခက်အခဲများနှင့် အစိုးရ၏ ရုံးပိတ်ရက်သေချာမသတ်မှတ် နိုင်မှုကြောင့် လုပ်ငန်းတိုးချဲ့ရန် အစီအစဉ်မရှိဟု ပြည်ပသို့ ဆန်တင်ပို့နေသည့် လုပ်ငန်းရှင်ဦးလူ မော်မြင့်မောင်က ဆိုသည်။

သို့သော် ဆိပ်ကမ်းများသည် နှစ်စဉ်သင်္ကြန်ပိတ်ရက် ၁၀ ရက် ဖြစ်သော်လည်း ရေပက်သည့် သင်္ကြန်ရက်များမှအပ ကျန်ရက်များတွင် လုပ်ငန်းများလုပ်ကိုင်ရန်အတွက် ဖွင့်လှစ်ခြင်းဖြစ်သည်ဟု စီးပွားရေး လုပ်ငန်းရှင်များက ပြောသည်။

‘‘ဆိပ်ကမ်းတွေက အရင်က သင်္ကြန်တွင်းလည်း မပိတ်ဘူး။ ပုံမှန်လုပ်နေတယ်။ အ ကောက်ခွန်ဌာနကတော့ ငါးရက်ပိတ်တယ်’’ ဟု Union Power Logistics ကုမ္ပဏီအုပ်ချုပ်မှုဒါရိုက်တာ ဦးတေဇာထွန်းက ပြောသည်။

သင်္ကြန်ကာလ ရုံးပိတ်ရက် လျှော့ချခြင်းက ဆိပ်ကမ်းများ၌ ကွန်တိန်နာများ ပိတ်ဆို့နေမှုကို လျော့နည်းလာနိုင်မည်ဟု ၎င်းက မျှော်လင့်နေသည်။

ယခင်နှစ်များက သင်္ကြန်ကာလ ရုံးပိတ်ရက်ရှည်ကြောင့် ရန်ကုန်ဆိပ်ကမ်းတွင် ကွန်တိန်နာများ ပြည့်ကျပ်ပြီး ပို့ကုန်သွင်းကုန်လုပ်ငန်းကို ထိခိုက်ခဲ့ရသည်ဟု ဆိုသည်။

ဧပြီတွင် ပင်လယ်ရေကြောင်း ကုန်သွယ်ရေးဖြင့် ပဲမျိုးစုံ အဓိကတင်ပို့သဖြင့် ကွန်တိန်နာများ ဆိပ်ကမ်းတွင် ပိတ်ဆို့ပြီး ကြန့်ကြာမှုများကြောင့် ပြီးခဲ့သည့် နှစ်အိန္ဒိယနိုင်ငံသို့ ပဲတင်ပို့ရာ၌ အချိန်မီမပို့နိုင်သဖြင့် ပဲဝယ်ယူမှု ရပ်တန့်သည်အထိဖြစ်ခဲ့ရကြောင်း ဘုရင့်နောင်ကုန်စည်ဒိုင်မှ  ပဲကုန် သည်တစ်ဦးက ဆိုသည်။

ထို့ကြောင့် ယခုနှစ်တွင် နှစ် သစ်ကူးရုံးပိတ်ရက်မတိုင်မီ ပဲတင် ပို့မှုကို အားစိုက်လုပ်ကိုင်ပြီး သင်္ကြန်ရက်များ၌ လုပ်ငန်းတိုးချဲ့မှုပြုလုပ်ရန် မရှိသေးဟု အထက်ပါပုဂ္ဂိုလ်က ဆိုသည်။

ယခင်အစိုးရလက်ထက်က စတင်၍ ပြည်ပမှ တင်သွင်းပြီး နယ်စပ်ကုန်သွယ်ရေးဖြင့် တရုတ် နိုင်ငံသို့ ရောင်းချသည့် တစ်ဆင့်ခံကုန်သွယ်ရေးကြောင့် ရန်ကုန်ဆိပ်ကမ်းသည် ပိတ်ရက်ရှည်ကြာပါက ကွန်တိန်နာကျပ်တည်းမှု ပြဿနာ ရှိကြောင်း ပို့ကုန်လုပ်ငန်းရှင်အချို့က ပြောသည်။

၂၀၁၆ သင်္ကြန်ပိတ်ရက်က ရန်ကုန်ဆိပ်ကမ်းသို့ ကွန်တိန်နာ အ၀င်အထွက် ၂၈,၀၀၀ ခန့်ရှိပြီး ဆိပ်ကမ်း၌ လက်ကျန်ကွန်တိန်နာများဖြင့် ပိတ်ဆို့မှုဖြစ်ခဲ့၍ ယခုနှစ်တွင် သင်္ကြန်ပိတ်ရက်လျှော့ချပေး ခြင်းဖြစ်နိုင်သည်ဟု စီးပွားရေး လုပ်ငန်းရှင်အချို့က သုံးသပ်ပြောကြားသည်။

ယခင်နှစ်များက ဘဏ်များ ရုံးပိတ်ရက်ရှည်ခြင်းကြောင့် ငွေ ပေးငွေယူမှုများ အခက်အခဲရှိခဲ့ပြီး အချိန်မီ ငွေပေးပို့နိုင်မှု မရှိခြင်းကြောင့် ပို့ကုန်သွင်းကုန် လုပ်ငန်းများတွင် ဈေးကွက်ယှဉ်ပြိုင်မှု နှောင့်နှေးခဲ့ရသည်ဟု စီးပွားရေး လုပ်ငန်းရှင်များက ပြောသည်။

‘‘ဘဏ်ဖွင့်ပေးတာက ကုန်သွယ်ရေးအတွက် အခြေအနေ ကောင်းတာပေါ့။ ဒါပေမဲ့ ဒီနှစ်တော့ မမီတော့ဘူး။ နောက်နှစ်တော့ ပိုပြီးလုပ်နိုင်မယ်’’ ဟု မြန်မာနိုင်ငံရော်ဘာစိုက်ပျိုးထုတ်လုပ်သူများအသင်းအတွင်းရေးမှူး ဦးခိုင်မြင့်က ပြောသည်။

ဘဏ်လုပ်ငန်းများ ပိတ်ရက် လျှော့ချခြင်းသည် နိုင်ငံ့စီးပွားရေးလည်ပတ်မှုအတွက် အလားအလာကောင်း တစ်ခုဖြစ်သည်ဟု ကမ္ဘောဇဘဏ်အကြီးတန်းအကြံပေးပုဂ္ဂိုလ်ဦးသန်းလွင်က ပြောသည်။

ဘဏ်ပိတ်ရက်များနေခြင်းသည် နိုင်ငံငွေကြေးလည်ပတ်မှု ရပ်တန့်နေခြင်းကြောင့် နိုင်ငံတကာတွင် ဘဏ်ကို ပိတ်ရက်ရှည် ပေးလေ့မရှိကြောင်း၊ ကမ္ဘာပေါ်၌ ဘဏ်ပိတ်ရက် အရှည်ကြာဆုံး ဖြစ်သည့် တရုတ်နိုင်ငံသည်ပင် ငါးရက်သာ ပိတ်ကြောင်း ၎င်းက ပြောသည်။

အစိုးရ၊ ပုဂ္ဂလိကဘဏ်ပိတ်ရက်များကို မြန်မာနိုင်ငံဗဟိုဘဏ်က ငါးရက်အထိလျှော့ချသော်လည်း ၀န်ထမ်းများကို ၁၀ ရက် နားရက်ပေးမည်ဟု ကြေညာချက် ထုတ်ပြန်ထားခြင်းကြောင့် ဘဏ်အချို့က အနည်းဆုံးဝန်ထမ်းအင်အားဖြင့်သာ ဘဏ်ကိုဖွင့်လှစ်ရန် စီစဉ်နေကြောင်း ပုဂ္ဂလိကဘဏ် တစ်ခုမှ အကြီးတန်းအရာရှိတစ်ဦးက ပြောသည်။

ကုန်စည်စီးဆင်းမှု မပြတ်အောင် ဆိပ်ကမ်းများအတွင်း ကွန်တိန်နာများ စနစ်တကျရှိစေရန် အကောက်ခွန်၊ ဆိပ်ကမ်းအာဏာပိုင်၊ ကုန်သည်စက်မှုအသင်းချုပ်၊ ကုန်သေတ္တာအသင်းတို့နှင့် ပူးပေါင်းပြီး ကြိုတင်ပြင်ဆင်ထားကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာန လက်ထောက်အတွင်းဝန် ဦးခင်မောင်လွင်က ပြောသည်။

ယခုနှစ် ရုံးပိတ်ရက်လျှော့ချ ခြင်းသည် ကုန်သွယ်မှုမြှင့်တင် ခြင်းထက် ဘဏ်များတွင် ငွေလွှဲလုပ်ငန်းများလုပ်ကိုင်နိုင်ခြင်းက ကုန်သည်များ ငွေပေးငွေယူ ပိုမိုအဆင်ပြေစေသည်ဟု ၎င်းကဆိုသည်။ ယခင်က ရုံးပိတ်ရက် ၁၀ ရက်ကြောင့် ဘဏ်များမှ ငွေလွှဲပြောင်းမှု အခက်အခဲရှိသဖြင့် ယခုနှစ်တွင် ပိုမိုအဆင်ပြေလာနိုင်သည်ဟု ၎င်းက ပြောသည်။

ဒီချုပ်အစိုးရ ပထမနှစ်အတွင်း နိုင်ငံစီးပွားရေးအခြေအနေ ပိုမိုကျပ်တည်းလာပြီး ငွေကြေးဖောင်းပွမှုဒဏ်နှင့် ယေဘုယျဆန်သော စီးပွားရေးမူဝါဒ ၁၂ ချက်ဖြင့် နိုင်ငံ့စီးပွားရေးကို မောင်းနှင်နေခြင်းကြောင့် ပြောင်းလဲမှုများ သိသာစွာမခံစားရကြောင်း စီးပွားရေးလုပ်ငန်းရှင်များက ပြော သည်။

သဘာဝဓာတ်ငွေ့ဈေး ကျဆင်းမှုကြောင့် ၀င်ငွေလျော့မည်ကို စိုးရိမ်ခဲ့သော်လည်း နှစ်ကုန်ချိန်တွင် ယခင်ဘဏ္ဍာနှစ်ထက် ကုန်သွယ်ရေး၌ တစ်ဘီလီယံကျော် ပိုများလာကာ ပို့ကုန်သွင်းကုန် နှစ်ရပ်စလုံး မြင့်တက်လာသည်ကို စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန စာရင်းများ၌ တွေ့ရသည်။ ကုန်သွယ်မှုပမာဏ မြင့်တက်လာသည်ဆိုသော်လည်း လိုငွေပမာဏက ယခင်ဘဏ္ဍာနှစ်ကဲ့သို့ ငါးဘီလီယံကျော်ရှိနေသည်။ အစိုးရက ကုန်သွယ်မှု မြှင့်တင်ပြီး စီးပွားရေးလုပ်ငန်းများတိုး မြှင့်နိုင်ရန်နှစ်သစ်ကူး ရုံးပိတ်ရက် လျှော့ချခြင်းဖြစ်သော်လည်း အချိန်ကာလမလုံလောက်ခြင်း၊ ကြို တင်ပြင်ဆင်မှုမရှိခြင်းက လက်တွေ့တွင် စီးပွားရေးလုပ်ငန်းများ ကို မြှင့်တင်နိုင်ခြေမရှိဟု လုပ်ငန်းရှင်များက သုံးသပ်သည်။

Top News