သဘာဝပတ်ဝန်းကျင်အကြံပေး ကိုဘိုဘိုဟန်နှင့်တွေ့ဆုံခြင်း

‘‘EMP မရှိတဲ့လုပ်ငန်း၊ EPM မရှိတဲ့ စီမံကိန်းဆိုတာ ဥပဒေကို ချိုးဖောက်ကျူးလွန်နေတဲ့ လုပ်ငန်းတွေလို့ ပြောလို့ရပါတယ်’’
ကိုဘိုဘိုဟန်

၂၀၁၀ တွင် ပြဋ္ဌာန်းထားသော သဘာဝပတ်ဝန်းကျင် ထိန်းသိမ်းရေး  ဥပဒေအရ မည်သည့်စီမံကိန်းမဆို မစတင်ခင်ကတည်းက သဘာဝပတ်ဝန်းကျင် ထိခိုက်မှု၊ လူမှုပတ်ဝန်းကျင်ထိခိုက်မှုများပြု လုပ်ရပြီး အဆိုပါစစ်တမ်းများအား စိစစ်ကာ စီမံကိန်းများခွင့်ပြုပေး ခြင်းဖြစ်သည်။

လူထုအကြား သဘာဝပတ်ဝန်းကျင်ထိခိုက်မှုနှင့် လူမှုပတ်ဝန်းကျင်ထိခိုက်မှုဆန်းစစ်ခြင်းစစ်တမ်းများ ပြုလုပ်ရမည်၊ တောင်းဆိုရမည်ဆိုသည့် အသိပျံ့နှံ့နေသော်လည်း စီမံကိန်းများကို ထိန်း ကျောင်းမည့် သဘာဝပတ်ဝန်း ကျင်စီမံခန့်ခွဲအစီအစဉ်များအား လူထုအကြား ကျယ်ပြန့်မှုမရှိသေးသဖြင့် Environment Manage-ment Plan(EMP) နှင့်ပတ်သက် ပြီး သဘာဝပတ်ဝန်းကျင်အကြံပေးလုပ်ကိုင်နေသူ ကိုဘိုဘိုဟန် နှင့်မေးမြန်းထားသည်များကို ဖော်ပြလိုက်ပါသည်။

ကိုဘိုဘိုဟန်သည် သစ်တောသိပ္ပံပညာဘွဲ့ရရှိထားပြီး သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာနတွင် အစိုးရဝန်ထမ်းအဖြစ် ၂ နှစ်တာဝန်ထမ်းဆောင်ခဲ့ပြီး ၂၀၁၀ က စ၍ နာဂစ်မုန်တိုင်းဒဏ်ခံရသည့်ဒေသ များတွင် ဒီရေတောနှင့် သဘာဝ ပတ်ဝန်းကျင်ထိန်းသိမ်းရေးလုပ် ငန်းများကို ယနေ့အချိန်ထိ လုပ် ကိုင်နေသူဖြစ်သည်။

ထို့အပြင် ဂျပန်နိုင်ငံ ချေးငွေ ODA Loan အကူအညီနှင့်ဆောင်ရွက်သည့် ဆင်းရဲမှုတိုက်ဖျက်ရေး၊ အခြေခံအဆောက်အအုံဖွံ့ဖြိုးတိုးတက်ရေးစီမံကိန်းတွင် ပါဝင်သည့် လမ်းအဆင့်မြှင့်တင်ခြင်း၊ လျှပ် စစ်ဓာတ်အားတိုးချဲ့ဖြန့်ဖြူးရေး နှင့် ရေပေးဝေရေးစီမံကိန်းများ တွင် ပတ်ဝန်းကျင်ဆိုင်ရာ အကြံပေးလုပ်ကိုင်နေကာ သက်ဆိုင်ရာလုပ်ငန်းအဖွဲ့များက တင်ပြလာသည့် သဘာဝပတ်ဝန်းကျင်စီမံ ခန့်ခွဲမှုအစီအစဉ် EMP များကို လိုက်လံစစ်ဆေးကြီးကြပ်ဆောင်ရွက်နေသူဖြစ်သည်။

EMP ဆိုတာ ဘာလဲ ရှင်းပြပါဦး။

EMP ဆိုတဲ့ စကားလုံးရဲ့အ ရှည်က Environmental Mana-gement Plan ဖြစ်ပါတယ်။ ပတ်  ဝန်းကျင် ထိန်းသိမ်းရေး ဥပဒေ ၂၀၁၂ မှာတော့ ပတ်ဝန်းကျင်စီမံ ခန့်ခွဲမှုအစီအစဉ်လို့ ဖော်ပြထား ပါတယ်။ EMP ရဲ့ ရည်ရွယ်ချက်ကတော့ကုန်ထုတ်လုပ်ငန်းလုပ်ကိုင်တဲ့ စက်ရုံ၊ အလုပ်ရုံတွေ၊ ဖွံ့ဖြိုးတိုးတက်ရေးစီမံကိန်းတွေ အကောင်အထည်ဖော်ရာမှာ လူမှုပတ်ဝန်းကျင်နဲ့ သဘာဝပတ်ဝန်းကျင်ကို ထိခိုက်နစ်နာမှုအနည်းဆုံးဖြစ်အောင် စီမံဆောင်ရွက်သွားမယ့် နည်းလမ်းတွေနဲ့ လစဉ်ဆောင်ရွက်သွားရမယ့် လုပ်ငန်း၊ ဘယ်လုပ်ငန်းကိုတော့ တစ်နှစ်ဘယ်နှကြိမ်ဆောင်ရွက်မယ် စသဖြင့် စနစ်တကျနဲ့ တိတိကျကျအကောင်အထည်ဖော် လိုက်နာ ဆောင်ရွက်သွားနိုင်ဖို့ ဖြစ်ပါတယ်။

သဘာဝပတ်ဝန်းကျင် စီမံခန့်ခွဲမှု အစီအစဉ်က ဘယ်လောက်ထိ အရေးပါသလဲ။

သိပ်ကို အရေးကြီးပါတယ်။ ပတ်ဝန်းကျင်ထိန်းသိမ်းရေးဦးစီးဌာနရဲ့ အဓိကရည်ရွယ်ချက်ကိုက စီမံကိန်းလုပ်ငန်းတိုင်း EMP မှာ ပါဝင်တဲ့ ပြဋ္ဌာန်းချက်တွေကိုမဖြစ်မနေလိုက်နာဆောင်ရွက်အောင် ကြပ်မတ်သွားဖို့၊ မလိုက်နာရင် ဖောက်ဖျက်ကျူးလွန်မှုပမာဏအလိုက် အရေးယူဆောင်ရွက်သွားဖို့ လို့ ထင်ပါတယ်။

ပတ်ဝန်းကျင်ထိန်းသိမ်းရေး ဥပဒေက ၂၀၁၂ လွှတ်တော်မှာ စတင်ပြဋ္ဌာန်းပါတယ်။ နည်းဥပဒေကိုတော့ ၂၀၁၄ ရောက်မှ ပြဋ္ဌာန်းနိုင်ပါတယ်။

ဒါပေမဲ့ နည်းဥပဒေထွက်ပြီးတဲ့အထိ အသေးစိတ်လိုက်နာရမယ့် စံသတ်မှတ်ချက်တွေ မပါသေးဘူး။ ၂၀၁၅ ဒီဇင်ဘာလကုန်ကိုရောက်မှ စံသတ်မှတ်ချက်တွေ အသေးစိတ်ဖော်ပြထားတဲ့ ပတ်ဝန်းကျင်ဆိုင်ရာ လုပ်ထုံးလုပ်နည်းတွေကို ထုတ်ပြန်ပါတယ်။

အဲဒီတော့ ပတ်ဝန်းကျင်ထိန်း သိမ်းရေးလုပ်ငန်းစဉ်နဲ့ပတ်သက်တဲ့ ဥပဒေ၊ နည်းဥပဒေ၊ လုပ်ထုံးလုပ်နည်းဆိုတာတွေအားလုံးဟာ ၂၀၁၆ ကိုရောက်မှ ပြီးပြည့်စုံတယ် လို့ ပြောနိုင်ပါတယ်။

အခု ၂၀၁၇ အရောက်မှာတော့ ပတ်ဝန်းကျင်ဆိုင်ရာ လုပ်ထုံးလုပ်နည်းတွေ ပေါ်ပေါက်ခဲ့တာ တစ်နှစ်ကျော်ကာလကို ရောက်နေပါပြီ။

စက်ရုံ၊ အလုပ်ရုံတိုင်း၊ စီမံကိန်းလုပ်ငန်းတိုင်းဟာ ဥပဒေပါ သတ်မှတ်လုပ်ထုံးလုပ်နည်းတွေအရ ပတ်ဝန်းကျင်စီမံခန့်ခွဲမှုအစီအစဉ် EMP တွေ ရေးဆွဲပြီး လိုက်နာဆောင်ရွက်ရမယ့် အချိန်ကို ရောက်နေပြီလို့ ထင်ပါတယ်။ EMP မရှိတဲ့ လုပ်ငန်း၊ EMP မရှိ တဲ့ စီမံကိန်းဆိုတာ ဥပဒေကို ချိုးဖောက်ကျူးလွန်နေတဲ့ လုပ်ငန်းတွေလို့ ပြောလို့ရပါတယ်။

EMP အမျိုးအစားဘယ်လောက် ရှိသလဲ။ ယခု မြန်မာနိုင်ငံမှာ ကျင့်သုံးနေတဲ့ EMP က ဘယ်အမျိုးအစားထဲမှာပါသလဲ။

EMP ဆိုတာ လုပ်ငန်းအမျိုး အစားအပေါ် မူတည်ပြီး အမျိုးအ စားကွဲပါတယ်။ စီမံကိန်းမစခင် ဘာတွေ ဘယ်လိုပြင်ဆင်မယ်။ စီမံကိန်းအကောင်အထည်ဖော် နေစဉ်မှာ ဘယ်အချက်တွေကို ဘယ်အတိုင်းအတာထိ လိုက်နာ သွားမယ်။ စီမံကိန်းပြီးလို့ လုပ်ငန်း လည်ပတ်တဲ့ ကာလရောက်ချိန်မှာ ဘယ်အချက်တွေကို အဓိကထား ပြီး လိုက်နာသွားမယ်။

စီမံကိန်းအဆင့်တိုင်းမှာ ဒေသခံတွေရဲ့ လူမှုပတ်ဝန်းကျင်ဆိုင်ရာနဲ့ သဘာဝပတ်ဝန်းကျင်ဆိုင်ရာ ပြဿနာ အခက်အခဲတွေကို နည်း နိုင်သမျှ နည်းအောင်၊ ရေရှည်မှာ ထိခိုက်မှုအသက်သာဆုံးဖြစ်အောင် ဘယ်လိုနည်းလမ်းတွေနဲ့ ဆောင်ရွက်သွားရမယ်ဆိုတဲ့ ပဋိညာဉ်ကို အဲဒီ EMP စာအုပ်မှာ အတိအလင်းဖော်ပြရပါမယ်။ ပြည်သူလူထုနဲ့ သက်ဆိုင်ရာအဖွဲ့အစည်းတွေကို ရှင်းလင်းတင်ပြဖို့ လိုပါတယ်။ အဲဒါကို လက်ခံတယ် ဆိုရင်တောင်မှ EMP ပါအချက်အလက်တွေအတိုင်း လိုက်နာဆောင်ရွက်ခြင်းရှိ၊ မရှိ ပုံမှန်စောင့်ကြပ်ကြည့်ရှုဖို့ လိုအပ်သလို ပတ်ဝန်းကျင်ထိခိုက်မှုမရှိအောင် နေ့စဉ်၊ လစဉ်၊ နှစ်စဉ်လိုက်နာဆောင်ရွက်ထားတဲ့ လုပ်ငန်းဆောင်တာ တွေကို မှတ်တမ်းမှတ်ရာတွေထားပြီး သက်ဆိုင်ရာ လူမှုအဖွဲ့အစည်းတွေ၊ ပတ်ဝန်းကျင်ထိန်းသိမ်းရေး ဦးစီးဌာနနဲ့ အထွေထွေအုပ်ချုပ်ရေးဦးစီးဌာနတွေကို ပေးပို့တင်ပြဖို့လိုပါတယ်။

မြန်မာနိုင်ငံရဲ့ EMP မှာ ဘာအားနည်းချက်တွေ ရှိပါသလဲ။

EMP ရဲ့အားနည်းချက်ကို ပြောပါဆိုရင် ရေးဆွဲတဲ့ တတိယအဖွဲ့အစည်း(သို့မဟုတ်)အကြံပေးပညာရှင်ကိုပဲ ပြောရမှာပါ။ EMP ထဲမှာ ဖြစ်နိုင်တဲ့ အခက်အခဲ ပြဿနာတွေ၊ ဖြေရှင်းရမယ့်နည်းလမ်းတွေကို အစကတည်းက ဘာလို့ မစဉ်းစားခဲ့သလဲဆိုတာမျိုး ပြောရမှာပါ။ ဒီနေ့ ကျွန်တော်တို့ နိုင်ငံမှာ EIA၊ SIA လေ့လာမှုတွေ၊ IEE လို့ခေါ်တဲ့ ကနဦးပတ်ဝန်းကျင်  လေ့လာဆန်းစစ်ချက်တွေကို ပြည်တွင်း၊ ပြည်ပပညာရှင်တွေ ပူးပေါင်း ရေးဆွဲကြပါတယ်။ လိုအပ် ချက်အနည်းငယ်ရှိတယ် ဆိုပေမယ့် ဒါက သိပ်မပြောပလောက်ပါဘူး။

EMP အသက်ဝင်ဖို့အတွက် ဘယ်လိုစနစ်တွေနဲ့ ထိန်းကျောင်းသင့်ပါသလဲ။

ပတ်ဝန်းကျင်ထိန်းသိမ်းရေးဦးစီးဌာနရဲ့ လက်ရှိ စနစ်က နိုင်ငံတကာစံကို မီပါတယ်။ ပိုပြီး အသက်ဝင်ဖို့ဆိုရင် အဲဒီဌာနကို ဒီထက်ပိုပြီး လူအင်အားငွေအင် အားတိုးချဲ့ဖို့နဲ့ လုပ်ကိုင်ဆုံးဖြတ်ခွင့်အာဏာပိုပြီး ပေးဖို့လိုမယ်လို့ ထင်ပါတယ်။ ပတ်ဝန်းကျင်ထိခိုက် နစ်နာမှုများနိုင်တယ်။

လုံးဝမလုပ်သင့်ဘူးဆိုတဲ့ စီမံကိန်းမျိုးကို ပြတ်ပြတ်သားသားငြင်းဆန်နိုင်တဲ့ အခွင့်အာဏာမျိုးလည်း လိုအပ်ပါတယ်။ ပြည်သူလူထုနဲ့ ဒေသခံတွေဘက်ကလည်း ပတ်ဝန်းကျင်ဆိုင်ရာ အသိအမြင်တွေ နိုးကြားတက်ကြွပြီး လုပ်သင့်လုပ်ထိုက်တာကို ချဉ်းကပ်နည်း မှန်မှန်ကန်ကန်နဲ့ တုံ့ပြန်ဖို့လိုတယ်လို့ မြင်ပါတယ်။ အဲဒါမှလုပ်ငန်းရှင်တွေအတွက်ရော ဒေသခံတွေအတွက်ပါ ပူးပေါင်းညှိနှိုင်းအဖြေရှာတဲ့ နည်းလမ်းတွေ ရရှိလာမှာဖြစ်ပါတယ်။

မြန်မာနိုင်ငံမှာ EMP ကို ထဲထဲဝင်ဝင် အသုံးပြုနေပါသလား။

အခုနောက်ပိုင်း ဆောင်ရွက်တဲ့ စီမံကိန်းအသစ်တွေမှာ EMP ကို ပြင်ဆင်လာကြပါပြီ။ EMP ပါ အချက်အလက်တွေအတိုင်း လိုက်နာနိုင်ဖို့အတွက် ဝန်ထမ်းထားရှိမှု၊ လုံလောက်တဲ့ငွေကြေးနဲ့ နည်းပညာသုံးစွဲမှုတွေ တိုးတက်ဖို့ လိုနေပါသေးတယ်။ ပြည်သူလူထုရဲ့ အကြံပြုကန့်ကွက်ချက်တွေ အပြုသဘောဆောင်ပြီး မှန်မှန်ကန်ကန်ချဉ်းကပ်ဖို့၊ လူမှန်နေရာ မှန်ကန့်ကွက်တတ်ဖို့ စတာတွေ လိုနေပါသေးတယ်။ ထိန်းသိမ်းကြပ်မတ်မယ့် သက်ဆိုင်ရာအာ ဏာပိုင်တွေမှာ ပတ်ဝန်းကျင်စီမံခန့်ခွဲမှုနဲ့ပတ်သက်တဲ့ အခြေခံအသိအမြင်တွေ တိုးတက်ဖို့ လိုနေပါသေးတယ်။

EMP အချက်အလက်တိုင်းမလုပ်ဘူးဆိုရင် ပြည်တွင်းဥပဒေနဲ့ရော နိုင်ငံတကာ ဥပဒေအနေနဲ့ပါ အရေးယူလို့ ရမယ်နည်းလမ်းများ ရှိပါသလား။

အခြားနိုင်ငံတွေမှာ စီမံကိန်းတွေကို ပုံမှန်စစ်ဆေးနိုင်တာမျိုးတွေ ရှိတယ်လို့ သိရပါတယ်။ ဥပ ဒေနဲ့မညီတာတွေကိုလည်း သူ့အတိုင်းအတာနဲ့ သူအပြစ်ပေးအရေးယူတာမျိုးတွေ ရှိပါတယ်။ ကျွန်တော်တို့နိုင်ငံမှာကတော့ အခုအ ချိန်အထိ EMP အပါအဝင် အခြားတားမြစ်ကန့်သတ်ထားတဲ့ အချက်တွေနဲ့ ညီ၊ မညီ ပုံမှန်စစ်ဆေးတယ်ဆိုတာမျိုး သိသိသာသာ အားမကောင်းသေးဘူးလို့ ပြောကြပါတယ်။ နိုင်ငံတကာနဲ့ တွဲလုပ်နေတဲ့ အချို့စီမံကိန်းတွေမှာတော့ EMP ပါအချက်အလက်တွေနဲ့ မကိုက်ညီတာတွေ့ရင် အရစ်ကျထုတ်ပေးတဲ့ ငွေကို ဆိုင်းငံ့တာ၊ လိုက် နာဆောင်ရွက်ဖို့ ပြင်းပြင်းထန်ထန် ဖိအားပေးတာမျိုးတွေ ရှိတယ်လို့ သိရပါတယ်။ အစိုးရအနေနဲ့ အရေးယူတာကတော့ သိပ်ကိုသိသာထင်ရှားလွန်းတဲ့ ပတ်ဝန်းကျင်ထိခိုက်မှုတွေ ဥပမာ စက်ရုံတွေက ထွက်တဲ့ ရေဆိုးစွန့်ပစ်တဲ့ကိစ္စတွေမှာဆိုရင် လုပ်ငန်းရပ်ဆိုင်းတာ၊ စက်ရုံလည်ပတ်ခွင့် အပြီးတိုင် ရုပ်သိမ်းလိုက်တာမျိုးတွေကို စတင် တွေ့မြင်လာရပြီဖြစ်ပါတယ်။

အခြားဖြည့်စွက်ပြောချင်တာများ ရှိရင် ပြောပေးပါဦး။

ကျွန်တော်တို့နိုင်ငံမှာ ပတ်ဝန်းကျင်ထိန်းသိမ်းရေးနဲ့ ပတ်သက်လို့ အသိအမြင်တွေ နိုးကြားနေပြီဖြစ်ပါတယ်။ စီမံကိန်းမစတင်ခင် ပတ်ဝန်းကျင်လေ့လာဆန်းစစ်မှု EIA တို့၊ SIA တို့ လုပ်ပြီးပြီလား လူတိုင်းမေးခွန်းထုတ် တတ်ကြပါတယ်။ အဲဒီ EIA တို့၊ SIA တို့ဆိုတာ စီမံကိန်း မစတင်မီ ပတ်ဝန်းကျင်ထိခိုက်နိုင်မှုလေ့လာ၊ ပြည်သူကို ချပြ၊ သက်ဆိုင်ရာရဲ့ ခွင့်ပြုချက်ယူဆိုတဲ့ အဆင့်မှာပဲ ရှိနေပါသေးတယ်။

လုပ်ငန်းလုပ်ခွင့်ရနေတဲ့ စီမံကိန်းတွေနဲ့ လက်ရှိအချိန်အထိ နှစ်ပေါင်းများစွာလည်ပတ်နေခဲ့တဲ့ စက်ရုံ၊ အလုပ်ရုံအသေးစား၊ အလတ်စား၊ အကြီးစားစီမံကိန်းတွေကိုတော့ ဘယ်လိုမေးခွန်းထုတ်ရမလဲဆိုတာ ဝေဝါးနေဆဲလို့ ထင် ပါတယ်။ ဒါကြောင့် အဲဒီစီမံကိန်းတိုင်းမှာ မဖြစ်မနေ ရှိကိုရှိရမယ့် ပတ်ဝန်းကျင်စီမံခန့်ခွဲမှုအစီအစဉ် (EMP)ဆိုတာ ရှိပါတယ်။

ပတ်ဝန်းကျင်ထိခိုက်မှုလျှော့ချရေးပုံမှန်လုပ်ကိုင်ဆောင်ရွက်မှု မှတ်တမ်းတွေရှိရပါမယ်။ မရှိသေးရင် ပတ်ဝန်းကျင်ထိန်းသိမ်းရေးလုပ်ထုံးလုပ်နည်းတွေအတိုင်း ဆောင်ရွက်ဖို့ စွမ်းနိုင်သူများက တိုက်တွန်းနှိုးဆော်ပေးပါ။

အဲဒီလိုမျိုး အခါအခွင့်သင့်တိုင်း လုပ်နိုင်မယ်ဆိုရင် လုပ်ငန်းရှင်တွေ၊ စီမံကိန်းပိုင်ရှင်တွေကလည်း ပတ်ဝန်းကျင်စီမံခန့်ခွဲမှုကိစ္စတွေကို ပိုပြီး အလေးအနက်ထားလိုက်နာလာကြမယ်လို့ ထင်ပါတယ်။ ဒါဟာ ကျွန်တော်တို့ချစ်တဲ့ တိုင်းပြည်ကို သာယာတဲ့ပတ်ဝန်း ကျင်အဖြစ်ကနေ ယုတ်လျော့မသွားအောင် ထိန်းထားနိုင်မယ့် နည်းလမ်းတစ်ခုဖြစ်တယ်လို့ ယုံကြည်ပါတယ်။

ကျေးဇူးတင်ပါတယ်။

Top News