မျိုးသုဉ်းသွားပြီဖြစ်သည့် အမွေးရှည် ဆင်ကြီးများ ပြန်လည်ဖန်တီးနိုင်ရန် အမေရိကန် သုတေသီများ မျှော်လင့်နေ

မျိုးသုဉ်းပျောက်ကွယ်ခဲ့ပြီဖြစ်သည့် ရေခဲခေတ် အမွေးရှည် မမ်မတ်သ် ဆင်ကြီးများကို တကျော့ပြန် ဖန်တီးနိုင်ရန် အမေရိကန် ပညာရှင်များက မျှော်လင့်နေကြောင်း သိရသည်။

အဆိုပါ ဆင်ကြီးများသည် သမိုင်းမတင်မီ နှစ်များကတည်းက မျိုးသုဉ်းခဲ့ပြီး ဖြစ်သော်လည်း ၎င်းတို့ ရှင်သန်နေထိုင်ခဲ့ရာ ဒေသများသည် အအေးလွန်ကဲသောကြောင့် ရုပ်ကြွင်းများကို အခြေအနေ ကောင်းမွန်စွာ တွေ့မြင်ရလေ့ ရှိသည်။ သုတေသီများက အဆိုပါ ရုပ်ကြွင်းများမှ မမ်မတ်သ်ဆင် DNAများကို ရယူကာ ယနေ့ခေတ် ဆင်များ၏ Stem Cellနှင့် ပေါင်းစပ်ပြီး ပြန်လည် အသက်သွင်းနိုင်ရန် မျှော်လင့်နေခြင်း ဖြစ်သည်။

ပြီးခဲ့သည့် နှစ်ပိုင်းများအတွင်း Stem Cell နည်းပညာ အရှိန်အဟုန်နှင့် ထွန်းကားလာခြင်းက မမ်မတ်သ်ဆင်များကို ပြန်လည် ဖန်တီးနိုင်ရန် ဖြစ်နိုင်ခြေနှင် ပိုမို နီးစပ်လာစေကြောင်းလည်း သိရသည်။ လွန်ခဲ့သည့် နှစ်ပေါင်း ၄၅၀၀ ဝန်းကျင်က မျိုးသုဉ်းသွားပြီ ဖြစ်သော ဧရာမ သတ္တဝါကြီးများသည် လာမည့် ၂ နှစ်မျှ အကြာတွင် ပြန်လည် ပေါ်ပေါက်လာနိုင်မည်ဟု ပညာရှင်များက မျှော်လင့်လျက် ရှိသည်။

ဟားဗတ်တက္ကသိုလ်မှ သိပ္ပံပညာရှင်များက ၎င်းတို့ကို ဖန်တီးရန်အတွက် ယနေ့ခေတ် ဆင်များ၏ Stem Cellနှင့် ပေါင်းစပ်ပြီး သန္ဓေသားလောင်း တစ်မျိုးကို စတင်ဖန်တီးနိုင်ရန် ကြိုးစားလျက် ရှိသည်။ ယင်းသန္ဓေသားတွင် မမ်မတ်သ်ဆင်များ၏ ရှည်လျားသော အမွေးအမင်များ၊ ထူထပ်သော အဆီပြင်များနှင့် အအေးဒဏ် ခံနိုင်သော သွေးအမျိုးအစားကဲ့သို့ မျိုးဗီဇ ဝိသေသများ ပါဝင်ဖွဲ့စည်းနေမည်ဟု သိရသည်။

မူလက ယနေ့ခေတ် ဆင်အမတစ်ကောင်၏ သားအိမ်တွင် ယင်းသန္ဓေသားကို ထည့်သွင်း ကိုယ်ဝန်ဆောင်စေရန် စိတ်ကူးခဲ့သော်လည်း ဆိုးကျိုးများနိုင်သောကြောင့် သင့်တော်သည့် သားအိမ်တု တစ်ခုကို ဖန်တီးပြီး မမ်မတ်သ်ဆင်များကို မွေးထုတ်နိုင်ရန် ဟားဗတ် သုတေသန အဖွဲ့က ရည်ရွယ်ထားသည်။

အဆိုပါ သုတေသန အဖွဲ့ကို ဦးဆောင်နေသည့် ပါမောက္ခ ဂျော့ဂ်ျချတ်ခ်ျက “ကျွန်တော်တို့ လက်ရှိ ကြိုးစားနေတာက ဒီနေ့ခေတ်ဆင်တွေနဲ့ မျိုးစပ်ထားတဲ့ မမ်မတ်သ်ဆင် သန္ဓေသားတစ်ခု စပြီး ဖန်တီးဖို့ပါပဲ။ ဒါက ဘယ်တော့လောက် လက်တွေ့ ဖြစ်လာမလဲတော့ မသိသေးဘူး။ လာမယ့် တစ်နှစ်၊ နှစ်နှစ်လောက် အတွင်းမှာ ရုပ်လုံးပေါ်လာမယ်လို့ မျှော်လင့်ပါတယ်”ဟု ပြောကြားခဲ့သည်။

၎င်း၏ သုတေသီ အဖွဲ့သည် ယနေ့ခေတ် အာရှဆင်များ၏ သန္ဓေဆဲလ် နျူကလီးယပ်စ်ကို အခြေခံကာ မမ်မတ်သ်ဆင်များ၏ ကြီးမားသော နားရွက်များ၊ အမွေးအမင်များနှင့် အအေးဒဏ်ခံ သွေးဖွဲ့စည်းမှုတို့ကို ပေါင်းစပ်ရန် စတင် ကြိုးစားနေပြီဟုလည်း အမေရိကန်၏ ဆန်းသစ် သိပ္ပံပညာ နှစ်ပတ်လည် စည်းဝေးပွဲတွင် ချတ်ခ်ျက ကြေညာခဲ့သည်။ အဆိုပါ မျိုးဥကို သန္ဓေသားအဆင့် ပြောင်းလဲလာစေရန် Clone နည်းပညာကိုပါ အသုံးပြုသွားရမည် ဖြစ်သည်။

“ဒီနေ့ခေတ် အာရှဆင်တွေရဲ့ မျိုးဗီဇကို မမ်မတ်သ်တွေနဲ့ ကိုက်ညီအောင် ပြောင်းလဲရမှာ။ ပြောင်းရမယ့် ကိစ္စတွေက တော်တော်များများ ရှိပါတယ်။ အထူးသဖြင့် အရေးကြီးတာကတော့ အေးခဲတဲ့ ရာသီဥတုမှာ ရှင်သန်နိုင်တဲ့ ဆင်မျိုး ဖြစ်လာစေဖို့ပါပဲ”ဟု ချတ်ခ်ျက ပြောကြားသွားသည်။

Ref: The Sun

Top News