ပြည်ပသို့ သွားရောက်ခြင်းနှင့်ပတ်သက်သောညွှန်ကြားချက်က အကြိမ်ကြိမ်သွားနေသူများကို အသိပေးခြင်းဟုဆို

ပြည်ပနိုင်ငံများသို့ တက္ကသိုလ်၊ ဒီဂရီကောလိပ်များမှ ကိုယ်စားလှယ်စေလွှတ်မှုနှင့်ပတ်သက်၍ ညွှန်ကြားလွှာထုတ်ပြန်ခြင်းသည် အကြိမ်ကြိမ်သွားရောက်နေသူများကို အသိပေးသည့်သဘောဖြစ်ကြောင်း ပညာရေးဝန်ကြီးဌာန၊ အဆင့်မြင့်ပညာဦးစီးဌာန ညွှန်ကြားရေးမှူးချုပ်ဒေါက်တာသိန်းဝင်းက ပြောသည်။

ပြည်ပနိုင်ငံများက ဖိတ်ကြားတိုင်းမလိုအပ်ဘဲ မြန်မာကိုယ်စားလှယ်အဖွဲ့များ စေလွှတ်ခြင်းမပြုရန်၊ အမှန်တကယ်သွားရောက်ရန်လိုအပ်ပါက အနည်းဆုံး ကိုယ်စားလှယ်ဦးရေကိုသာ စိစစ်စေလွှတ်ရန်နှင့် ပြည်ပမှ ပြန်လည်ရောက်ရှိပါက ခရီးစဉ်အကျိုးရလဒ်ကို အစီရင်ခံစာတင်ပြရန် အဆင့်မြင့်ပညာဦးစီးဌာနက ညွှန်ကြားချက်ထုတ်ပြန်ခြင်းဖြစ်သည်။

‘‘အခု ညွှန်ကြားလွှာထုတ်တယ်ဆိုတာ ရှင်းရှင်းပြောရင် တချို့က သုံး၊ လေးခေါက်အထိ တောက်လျှောက်သွားတယ်။ ရန်ကုန်တက္ကသိုလ်၊ မန္တလေးတက္ကသိုလ်က ပါမောက္ခတွေက တစ်လကို နှစ်ခေါက်၊ သုံးခေါက်တောက်လျှောက်သွားတော့ ကျွန်တော်တို့တွေက သူတို့တွေသွားတာများတဲ့အတွက် ဒီမှာ သင်ကြားရေးကော လုပ်နိုင်ပါ့မလား။ သူတို့အတွက် အကျိုးအမြတ်မရှိမှာစိုးလို့ အဲဒါလေး ညွှန်ကြားချက်ထုတ်တာပါ’’ဟု ဒေါက်တာသိန်းဝင်းက ပြောသည်။

သက်ဆိုင်ရာနိုင်ငံအလိုက် ၀တ်စုံစရိတ် ကျပ်သုံးသိန်းမှ လေးသိန်းခွဲ၊ ခရီးစရိတ်အမေရိကန် ၆၇ ဒေါ်လာထောက်ပံ့နေခြင်းကြောင့် နိုင်ငံတော်ဘဏ္ဍာခြိုးခြံချွေတာရေးနှင့် သင်ကြားရေးတွင် အားနည်းလစ်ဟာမှုဖြစ်လာနိုင်ခြင်းကြောင့် ထုတ်ပြန်ခြင်းဖြစ်ကြောင်း ညွှန်ကြားရေးမှူးချုပ်က ဆိုသည်။

တက္ကသိုလ်များအနေဖြင့် ပြည်ပတက္ကသိုလ်များနှင့် နားလည်မှုစာချွန်လွှာလက်မှတ်ရေးထိုးထားသောကြောင့် ဖိတ်ကြားချက်များအရ ကိုယ်စားလှယ်အဖြစ် သွားရောက်ရမှုများရှိပြီး ၀န်ကြီးဌာနက ခွင့်ပြုချက်ပေးမှ သွားရောက်ရသဖြင့် ဌာနက ထောက်ပံ့ပေးရမှုရှိကြောင်း ကျောက်ဆည်တက္ကသိုလ်မှ လက်ထောက်ကထိကဒေါက် တာဇော်မျိုးလှိုင်က ပြောသည်။

‘‘ဒီစာမှာ ရေးထားတဲ့ အချက်အလက်တွေက ဖတ်ရတာ မရှင်းမလင်းဖြစ်နေတယ်။ ရေးထားတာ မရှင်းတော့ ဖတ်ရတဲ့သူတွေက သို့လော၊ သို့လော ဖြစ်နေတာပေါ့။ ကျွန်တော်မြင်တာကတော့ မူလသင်ကြားရေးတာဝန်တွေ မလစ်ဟင်းအောင်ရယ်၊ လူဦးရေနဲ့ အကြိမ်ရေတွေများလာလို့ ငွေကြေးထုတ်ပေးရမှုတွေ များလာတာကြောင့် သတိပေးတာလို့ မြင်ပါတယ်’’ဟု ၎င်းက ဆိုသည်။