ပညာရေးဝန်ကြီး ဒေါက်တာမျိုးသိမ်းကြီးနှင့်အဖွဲ့ ဗြိတိန်နိုင်ငံသို့ လေ့လာရေးသွားရောက်

ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီး (ဓာတ်ပုံ - ပညာရေးဝန်ကြီးဌာန)

ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာဦးမျိုးသိမ်းကြီးဦးဆောင်သော ကိုယ်စားလှယ်အဖွဲ့သည် အဆင့်မြင့်ပညာကဏ္ဍအတွက် ဗြိတိန်နိုင်ငံသို့ နိုဝင်ဘာ ၂၇ ရက်မှ ဒီဇင်ဘာ ၈ ရက်အထိ သွားရောက်လေ့လာ လျက်ရှိကြောင်း သတင်းရရှိသည်။

ပညာရေးဝန်ကြီး၊ ညွှန်ကြားရေးမှူးချုပ်များ၊ တက္ကသိုလ်ပါမောက္ခချုပ်များ စုစုပေါင်း ခုနစ်ဦးပါဝင်သော ကိုယ်စားလှယ်အဖွဲ့သည် ဗြိတိသျှကောင်စီ (မြန်မာ) ၏ စီစဉ်ဆောင်ရွက်မှုဖြင့် လန်ဒန်၊ ၀ါးရစ်ခ်၊ မန်ချက်စတာ၊ လီဗာပူး နှင့် အောက်စဖို့ဒ်မြို့များသို့ သွားရောက်မည်ဖြစ်သည်။

အဆင့်မြင့်ပညာရေးနှင့် သက်ဆိုင်သော ငွေကြေးအထောက်အပံ့ပြုနေသည့် ကြားခံအေဂျင်စီများ၊ သုတေသနပြုရန် ငွေကြေး ပြန်လည်ချပေးသော အဖွဲ့အစည်းများ၊ အဆင့်မြင့်ပညာရေးတက္ကသိုလ်များ၏ အရည်အသွေး စုံစမ်းစစ်ဆေးနေသော အကဲဖြတ်အဖွဲ့အစည်းများ၊ ဖွံ့ဖြိုးဆဲနိုင်ငံများ၏ ပညာရေးပြုပြင်ပြောင်းလဲမှုများကို ထောက်ပံ့နေသည့် ဗြိတိန် အစိုးရအဖွဲ့အစည်းများ၊ တက္ကသိုလ်များနှင့် မြန်မာကိုယ်စားလှယ်အဖွဲ့ တွေ့ဆုံမည်ဖြစ်ကြောင်း ဗြိတိသျှကောင်စီ(မြန်မာ)မှ သိရသည်။

ယခုအစိုးရ၏ အဆင့်မြင့် ပညာရေးပြုပြင်ပြောင်းလဲမှုနှင့် လုပ်ငန်းစဉ်များကို ယူကေတက္ကသိုလ်များ၊ ယူကေအဆင့်မြင့် ပညာရေးကို ထောက်ပံ့နေသော အဖွဲ့အစည်းများနှင့် နှီးနှောဖလှယ်မည်ဖြစ်ပြီး မကြာမီ အကောင်အထည်ဖော်မည့် တက္ကသိုလ်များ ကိုယ်ပိုင်လွတ်လပ်ခွင့် တစ်သီးတခြား ရေရှည်တည်မြဲနိုင်ရန် တက္ကသိုလ်အုပ်ချုပ်မှုအဖွဲ့၏ ရင်ဆိုင်ရမည့်စိန်ခေါ်မှုများ၊ ပြင်ဆင်ထားရမည့် အရည်အသွေးများကို ယူကေတက္ကသိုလ်များနှင့် ဆွေးနွေးမည်ဟု ဆိုသည်။

ထို့အပြင် တက္ကသိုလ်များက လုပ်ငန်းရှင်များနှင့် ချိတ်ဆက်၍ သင်ရိုးညွှန်းတမ်းများ ရေးဆွဲခြင်း၊ သုတေသနပြုလုပ်ခြင်း၊ အလုပ်သင်များ ချိတ်ဆက်ပေးခြင်းစသည့် တက္ကသိုလ်များနှင့် လုပ်ငန်းရှင်များ ချိတ်ဆက်လုပ်ကိုင်ပုံများကို ခရီးစဉ်တွင် လေ့လာမည်ဖြစ်သည်။

မြန်မာတက္ကသိုလ်များ၏ တက္ကသိုလ်ပဋိညာဉ်နှင့် တက္ကသိုလ်တစ်ခုချင်း၏ ရည်မှန်းချက် နှင့် အမြင်များ ပူးပေါင်းဆောင်ရွက်မှုဆိုင်ရာ ဆွေးနွေးရန် ယူကေတက္ကသိုလ် ၅၀ ကျော်နှင့် မူဝါဒဆွေးနွေးပွဲကို အောက်စဖို့ဒ်မြို့ ၌ ဒီဇင်ဘာလ ၅ ရက်တွင် ပြုလုပ်မည်ဖြစ်သည်။

ထို့အပြင် တက္ကသိုလ်ကိစ္စရပ်များတွင် ပါဝင်ဆောင်ရွက်နေသော လွှတ်တော်အမတ်များနှင့် လန်ဒန်မြို့ရှိ ပါလီမန်အဆောက်အအုံတွင် နိုဝင်ဘာ ၂၈ ရက်၌ တွေ့ဆုံဆွေးနွေးမည်ဖြစ်ကြောင်း မြန်မာကိုယ်စားလှယ်အဖွဲ့အတွက် ဗြိတိန်လေ့လာရေး ခရီးစီစဉ်ဆောင်ရွက်ပေးသော ဗြိတိသျှကောင်စီ(မြန်မာ)မှ သိရသည်။