ဧရာဝတီတိုင်းရှိ စာသင်ကျောင်းများတွင် ဆရာ၊ ဆရာမ ရှစ်ထောင်ကျော် လိုအပ်

 ဧရာဝတီတိုင်းရှိ စာသင် ကျောင်းများတွင် ဆရာ၊ ဆရာမ ၈,၀၀၀ ကျော်လိုအပ်နေကြောင်း တိုင်းပညာရေးမှူးရုံး ဒုတိယ ညွှန်ကြားရေးမှူးချုပ် ဦးကျော်ဝင်းက ပြောသည်။

 မူလတန်း အဆင့်တွင် ၅,၇၂၀ ဦး၊ အလယ်တန်းအဆင့် တွင် ၁,၃၆၅ ဦးနှင့် အထက်တန်း အဆင့်တွင် ၁,၀၀၁ ဦးလိုအပ် ကြောင်း ၎င်းကဆိုသည်။

‘‘ဆရာ၊ ဆရာမတွေ လိုအပ် ချက်ရှိတာကို ၀န်ကြီးဌာနကို လည်း တင်ပြထားတယ်။ ၀န်ထမ်းခန့်တယ်ဆိုတာလည်း နိုင်ငံရဲ့ ဘတ်ဂျက်ပေါ်မှာ အခြေခံပြီးတော့ ၀န်ကြီးဌာနကပဲ ခန့်အပ်ခွင့်ရှိတာဆိုတော့ လိုအပ်ချက်ရှိပေမယ့် လတ်တလော မဖြည့်နိုင်သေးဘူး’’ ဟု ဦးကျော်ဝင်းကဆိုသည်။

ဆရာ၊ ဆရာမနည်း၍ ကျောင်းသားဦးရေများသော ကျောင်းများ သို့ ကျောင်းသားနည်း ၍ ဆရာ၊ ဆရာမများသော ကျောင်းများမှ ခေတ္တဖြည့်ဆည်းသင်ကြားပေးရန် မြို့နယ်ပညာရေးမှူးများထံ ညွှန်ကြားထားကြောင်း ၎င်းကပြောသည်။

 ပုသိမ်မြို့ရှိ  မူလတန်း ကျောင်းတစ်ကျောင်းမှ ကျောင်း အုပ်ကြီးတစ်ဦးက ‘‘ဘယ်ကျောင်း က ကျောင်းသားအင်အား ဘယ် လောက်ရှိတယ်၊ ဆရာအင်အား ဘယ်လောက်ရှိတယ်ဆိုတာ မြို့ နယ် ပညာရေးမှူးရုံးမှာ စာရင်းရှိ ပါတယ်။ ဆရာ၊ ဆရာမ ပိုနေတဲ့ ကျောင်းတွေက လိုနေတဲ့ကျောင်း တွေကို ဌာနရဲ့ ညွှန်ကြားချက်နဲ့ လွှဲပြောင်းပေးမှသာ ဆရာ၊ ဆရာ မတွေကလည်း အချိန်ပြည့်တာ ၀န်ယူနိုင်မှာပါ။ ယာယီသဘောနဲ့ တာဝန်ပေးတာက ကလေးတွေ ရဲ့ သင်ကြားရေးပိုင်းကို ထိခိုက် ပါတယ်’’ ဟု ဆိုိုသည်။

ယခု ဧရာဝတီတိုင်းရှိ တက္က သိုလ်ဝင်တန်း အောင်ချက်ရာခိုင် နှုန်း လုံးဝမရှိသော ကျောင်းများ နှင့် အောင်ချက်နည်းသောကျောင်းများကို ဦးစားပေး၍ ဘာသာရပ်အလိုက် လိုအပ်သော ဆရာ၊ ဆရာမဦးရေ ဖြည့်တင်းရန် စီစဉ်ဆောင်ရွက်နေသည်။

ထို့ပြင် အစိုးရ ခွင့်ပြုသည့် ဘတ်ဂျက်အပေါ်အခြေခံ၍ ဆရာ၊ဆရာမ လိုအပ်ချက်ကို တိုးမြှင့် ခန့်အပ်ရန် စီစဉ်ထားကြောင်း ဧရာဝတီတိုင်း ပညာရေးမှူးရုံးမှ တာဝန်ရှိသူတစ်ဦးက ပြောသည်။