မလေးရှား ဝန်ကြီးချုပ်ဟောင်း နာဂျစ်ဘ်၏ နေအိမ်မှ ငွေသားသက်သက် ဒေါ်လာ ၂၇ သန်းကျော် သိမ်းဆည်းရမိ

မလေးရှား ဝန်ကြီးချုပ်ဟောင်း နာဂျစ်ဘ် ရာဇက်ခ်၏ နေအိမ်မှ သိမ်းဆည်းရမိသည့် ငွေသားချည်း သီးသန့်တန်ဖိုး ဒေါ်လာ ၂၇ သန်းကျော်မျှထိ များပြားကြောင်း သိရသည်။


မလေးရှား ရဲတပ်ဖွဲ့က ကွာလာလမ်ပူရှိ နာဂျစ်ဘ်၏ နေအိမ်တွင် သိမ်းဆည်းရမိသော နိုင်ငံတကာသုံး ငွေစက္ကူ အမျိုးမျိုး၏ တန်ဖိုးမှာ ရင်းဂစ် သန်းပေါင်း ၁၁၀ မျှထိ ရှိကြောင်း ထုတ်ပြန်ခဲ့သည်။ ယင်းသည် အမေရိကန်ဒေါ်လာ ၂၇.၆ သန်းမျှနှင့် ညီမျှနေသည်။

မေ ၉ ရက် ရွေးကောက်ပွဲတွင် နာဂျစ်ဘ် အံ့အားသင့်ဖွယ် အရေးနိမ့်သွားသည့်နောက် တစ်ပတ်အတွင်း ၎င်း၏ နေအိမ်ကို ရဲများက စီးနင်း ရှာဖွေခဲ့ခြင်း ဖြစ်သည်။ နာဂျစ်ဘ်သည် အာဏာလက်ကိုင် သက်တမ်းတလျှောက်တွင် အဂတိ လိုက်စားမှု သတင်းဆိုးများဖြင့် ကျော်ကြားခဲ့သူ ဖြစ်သည်။

မေ ၂၃ ရက်တွင် မလေးရှား ရဲတပ်ဖွဲ့က ကြေညာခဲ့ရာ၌ နာဂျစ်ဘ်၏ အိမ်ထဲတွင် သေတ္တာများဖြင့် ထည့်ထားသည့် နိုင်ငံတကာသုံး ငွေစက္ကူ အမျိုးမျိုးကို ရင်းဂစ် သန်းပေါင်း ၁၁၀ ဖိုးမျှ သိမ်းဆည်းရမိခဲ့ကြောင်း ပါရှိသည်။ ထို့အပြင်  အခြားသော အဖိုးတန် လက်ကိုင်အိတ်များ၊ လက်ဝတ်ရတနာများနှင့် ဇိမ်ခံပစ္စည်းများ၏ တန်ဖိုးကို သီးခြား တွက်ချက် နေရဆဲဟု ဆိုသည်။

နာဂျစ်ဘ် ကိုယ်တိုင်ကမူ ၎င်းသည် မည်သည့် မသမာမှုမျိုးမျှ ကျူးလွန်မထားကြောင်း အခိုင်အမာ ငြင်းဆိုထားသည်။ လတ်တလောတွင် ၎င်းသည် မလေးရှားမှ ထွက်ခွာခွင့် ပိတ်ပင်ခံထားရပြီး အဂတိ လိုက်စားမှု တိုက်ဖျက်ရေး ကော်မရှင်ထံတွင် စစ်ဆေးမေးမြန်းမှုများ ခံယူနေရသည်။

Ref: CNA

Top News