အိန္ဒိယက မြို့တစ်မြို့မှာ ဆန္ဒပြမှုတွေကနေ အဓိကရုဏ်းအသွင် ပြောင်းသွားပြီး အနည်းဆုံး ၁၁ ဦးသေဆုံး

အိန္ဒိယ နိုင်ငံ တောင်ပိုင်းရှိ မြို့တစ်မြို့တွင် ဆန္ဒပြမှုများမှ အဓိကရုဏ်းအသွင် ပြောင်းလဲသွားပြီး အနည်းဆုံး လူ ၁၁ ဦး သေဆုံးခဲ့ကြောင်း သိရသည်။


လက်ရှိ အခြေအနေအရ တမီလ်နာဒူ ပြည်နယ်ရှိ ဆိပ်ကမ်းမြို့ တူတီကိုရင်တွင် တင်းမာမှုများလည်း မြင့်တက်နေသည်။ မြို့ခံများက Sterlite ကြေးနီ ကုမ္ပဏီကို လနှင့်ချီ ဆန္ဒပြ ကန့်ကွက်နေရာမှ ယခုသီတင်းပတ်တွင် ပဋိပက္ခများ စတင်လာခြင်း ဖြစ်သည်။

ဒေသခံများက ကြေးနီ အရည်ကြိုမှုများကြောင့် နောက်ဆက်တွဲ ဆိုးကျိုးအဖြစ် သဘာဝ ပတ်ဝန်းကျင်ကို အကြီးအကျယ် ထိခိုက်စေကြောင်း ဝေဖန်ကြသည်။ ဆန္ဒပြသူများနှင့် ရဲတပ်ဖွဲ့များကြား နှစ်ရက်ဆက်တိုက် အဓိကရုဏ်းများ ဖြစ်ခဲ့သည့်နောက် အိန္ဒိယ၏ အရန်စစ်တပ်များကိုပါ လုံခြုံရေး ဖြန့်ကျက်ခဲ့ရသည်။

Sterlite၏ မိခင် ကုမ္ပဏီကြီးဖြစ်သော Vedanta Resourcesက ၎င်းတို့သည် ကြေးနီ အရည်ကြို စက်ရုံကို သတ်မှတ် ပမာဏထက် နှစ်ဆမျှ လုပ်ငန်းလည်ပတ်နေစေသည်ဆိုသော စွပ်စွဲချက်များကို ငြင်းဆန်ထားသည်။

မေ ၂၂ ရက်က အုံကြွလာသည့် ဆန္ဒပြ လူထုကို ရဲတပ်ဖွဲ့က ပစ်ခတ်ရာမှ ၁၀ ဦး သေဆုံးခဲ့ပြီး နောက်နေ့တွင် အခြားတစ်ဦး ထပ်မံ အသက်ဆုံးရှုံးခဲ့သည်။ မေ ၂၂ ရက် ဖြစ်စဉ်တွင်မူ မြို့ထဲရှိ အစိုးရ ရုံးဌာန တစ်ခုကို ဆန္ဒပြသူများက စီးနင်းရန် ကြိုးစားရာမှ တုံ့ပြန် ပစ်ခတ်ခဲ့ရခြင်းဟု ရဲတပ်ဖွဲ့က ကြေညာသည်။

လူ့အခွင့်အရေး အဖွဲ့များကမူ ဆန္ဒပြသူများ သေဆုံးခဲ့ခြင်းနှင့် ပတ်သက်၍ ရဲတပ်ဖွဲ့တွင် ဖြေရှင်းစရာ ကိစ္စများစွာ ကျန်နေကြောင်း သတိပေးခဲ့ပြီး ယင်းကိစ္စကို တရားဥပဒေအရ စုံစမ်း စစ်ဆေးရန်လည်း တောင်းဆိုနေကြောင်း သိရသည်။

Ref: BBC

Top News