အခွန်တိမ်းရှောင်လျှင် ထောင်ခုနစ်နှစ်အထိ ကျနိုင်သော အခွန်ဆိုင်ရာစီမံအုပ်ချုပ်မှုဥပဒေကြမ်း လွှတ်တော်သို့ တင်

အခွန်တိမ်းရှောင် လျှင် ခုနစ်နှစ်အထိ ထောင်ကျနိုင် သော အခွန်ဆိုင်ရာစီမံအုပ်ချုပ်မှု ဥပဒေကြမ်းကို ယမန်နေ့က ပြည် ထောင်စုလွှတ်တော်တွင် စီမံကိန်းနှင့် ဘဏ္ဍာရေးဝန်ကြီးဌာန ဒုတိယ၀န်ကြီး ဦးမောင်မောင်ဝင်းက တင်သွင်းခဲ့သည်။

အဆိုပါဥပဒေကြမ်းသည် မြန်မာနိုင်ငံတွင် ပြဋ္ဌာန်းခြင်းမပြု ရသေးသော အခွန်ဆိုင်ရာဥပဒေ တစ်ခုဖြစ်ကြောင်း ဦးမောင်မောင် ၀င်းက ဆိုသည်။

‘‘နိုင်ငံတကာစံနှုန်းများနဲ့ ကိုက်ညီအောင် ရေးဆွဲထားတဲ့ အတွက် ပြည်တွင်း၊ ပြည်ပရင်းနှီး မြှုပ်နှံမှုများလည်း ပိုမိုအားကောင်းလာနိုင်စေမှာ ဖြစ်ပါတယ်’’ဟု ဒုဝန်ကြီးက ပြောသည်။

အဆိုပါဥပဒေကြမ်းတွင် မည်သူမဆို အခွန်စည်းကြပ်ခြင်း၊ ပေးဆောင်စေခြင်း၊ ကောက်ခံ ခြင်းကို တမင်တိမ်းရှောင်ခြင်း (သို့မဟုတ်) တိမ်းရှောင်ရန် အားထုတ်ခြင်း (သို့မဟုတ်) ယင်းပုဂ္ဂိုလ်အ နေဖြင့် ရပိုင်ခွင့်မရှိသည့် အခွန် ပြန်အမ်းငွေကို ရရှိရန် တမင်ကြံ ရွယ်ချက်ဖြင့် တောင်းခံခြင်းပြု ကြောင်း ပြစ်မှုထင်ရှားစီရင်ခြင်းခံ ရလျှင် ထိုသူကို ခုနစ်နှစ်ထက်မပို သော ထောင်ဒဏ်ဖြစ်စေ၊ ကျပ် ၂၅၀,၀၀၀ နှင့် ယင်းကာလအတွက် ယင်းပုဂ္ဂိုလ်ပေးဆောင်ရ မည့် အခွန်၏ ၁၀၀ ရာခိုင်နှုန်းနှင့်  ညီမျှသော ငွေပမာဏတို့အနက် များသော ဒဏ်ကြေးငွေဖြစ်စေ၊ ဒဏ်နှစ်ရပ်စလုံးကိုဖြစ်စေကျခံစေရမည်ဟု ပြဋ္ဌာန်းထားသည်။

ယခင်က အခွန်နှင့်ပတ်သက်၍ ဒဏ်ရိုက်ပါက တစ်လဖြစ်စေ၊ တစ်နှစ်ဖြစ်စေ အခွန်ဆောင်ရန် နောက်ကျလျင် ၁၀ ရာခိုင်နှုန်းဖြစ် သော်လည်း ယခုဥပဒေကြမ်းတွင် တစ်လနောက်ကျပါက ၁၀ ရာခိုင် နှုန်း၊ တစ်နှစ်နောက်ကျလျှင် ၁၀ ရာခိုင်နှုန်းနှင့် အတိုးကို ထည့်သွင်းထားကြောင်း ပြည်သူ့လွှတ်တော် ပြည်သူ့ငွေစာရင်းကော်မတီ ဥက္ကဋ္ဌဦးအောင်မင်းက ပြောသည်။

ဥပဒေပြဋ္ဌာန်းခြင်းသည်  အခွန်စီမံအုပ်ချုပ်ရေးနှင့် လုပ်ထုံးလုပ်နည်း ပြဋ္ဌာန်းချက်များကို ဥပဒေတစ်ခုတည်း အောက်တွင် စုစည်းထားရန်၊ အခွန်စီမံခန့်ခွဲမှုနှင့် လုပ်ထုံးလုပ်နည်းများ ခေတ်မီလာစေရန်၊ မတူညီသည့် အခွန်အမျိုးအစားများစီမံခန့်ခွဲမှုတတ်နိုင်သမျှ တစ်ပြေးညီဖြစ်စေရန်၊ အခွန်ဝန်ထမ်းများ၏ အခွင့်အရေးနှင့်တာဝန်များကို သတ်မှတ်ပေးနိုင်မှုတို့ကြောင့်ဖြစ်ကြောင်း ဦးမောင်မောင်ဝင်းက ပြောသည်။

Top News