ဝန်ကြီးချုပ်ဟောင်း နာဂျစ်ဘ်၏ နေအိမ်ကို မလေးရှား ရဲတပ်ဖွဲ့ စီးနင်းရှာဖွေ

မလေးရှား ဝန်ကြီးချုပ်ဟောင်း နာဂျစ်ဘ် ရာဇက်ခ်၏ နေအိမ်ကို ရဲတပ်ဖွဲ့က ဝင်ရောက် စီးနင်း ရှာဖွေခဲ့ကြောင်း သိရသည်။


ရွေးကောက်ပွဲတွင် အရေးနိမ့်ခဲ့၍ ဝန်ကြီးချုပ် ရာထူးကို စွန့်လွှတ်ခဲ့ရပြီး တစ်ပတ်အကြာတွင် ကွာလာလမ်ပူရှိ နာဂျစ်ဘ်၏ နေအိမ်ကို မလေးရှား ရဲတပ်ဖွဲ့က ဝင်ရောက် ရှာဖွေခဲ့ခြင်း ဖြစ်သည်။ နာဂျစ်ဘ်သည် အကျင့်ပျက်မှု၊ အဂတိ လိုက်စားမှုများကြောင့် ကာလရှည်ကြာ နာမည်ဆိုး ထွက်နေသူလည်း ဖြစ်သည်။

တစ်ချိန်က နိုင်ငံရေး နယ်ပယ်တွင် နာဂျစ်ဘ်၏ ဆရာ ဖြစ်ခဲ့ဖူးသူ ဝန်ကြီးချုပ်သစ် မဟာသီယာ မိုဟာမက်က ၎င်းအနေဖြင့် နာဂျစ်ဘ်အပေါ် စွဲဆိုထားဖူးသည့် အဂတိ လိုက်စားမှုဆိုင်ရာ ရာဇဝတ်ကြောင်း စစ်ဆေးမှုများကို ပြန်လည် အစပြုရန် ဆန္ဒရှိကြောင်း အရိပ်အမြွက် ပြောဆိုထားသည်။

နာဂျစ်ဘ်သည် အာဏာလက်ရှိ ကာလတလျှောက် ပြည်သူ့ဘဏ္ဍာများကို ကိုယ်ကျိုးအတွက် မလျော်မကန် အသုံးပြုခဲ့သည်ဆိုသော နာမည်ဆိုး အပုပ်နံ့ လှိုင်လှိုင် ထွက်နေခဲ့သည့်တိုင် ၎င်းအနေဖြင့် မည်သည့် အမှားမျှ ကျူးလွန်ထားခြင်း မရှိဟု ငြင်းဆန်လျက် ရှိသည်။

ရွေးကောက်ပွဲတွင် အရေးနိမ့်ပြီး နောက်တစ်နေ့၌ နာဂျစ်ဘ်နှင့် ဇနီးဖြစ်သူတို့သည် စင်းလုံးငှား လေယာဉ်ဖြင့် အင်ဒိုနီးရှား နိုင်ငံသို့ တိမ်းရှောင်ရန် ကြိုးစားခဲ့သော်လည်း မလေးရှား အစိုးရသစ်၏ တားမြစ်မိန့်ကြောင့် အကောင်အထည် မပေါ်ခဲ့ချေ။

မလေးရှား ရဲတပ်ဖွဲ့က နာဂျစ်ဘ်၏ နေအိမ်ကို ဝင်ရောက် ရှာဖွေကြောင်း အတည်ပြုခဲ့သော်လည်း အသေးစိတ် အချက်အလက်များကိုမူ မထုတ်ပြန်ခဲ့ကြောင်း သိရသည်။

နာဂျစ်ဘ်သည် ၂၀၁၅ ခုနှစ်က ပြည်သူ့ဘဏ္ဍာ ဒေါ်လာ သန်း ၇၀၀ မျှကို အလွဲသုံးစား ပြုခဲ့ကြောင်း စွဲချက်တင်ခံရသော်လည်း အဆိုပါ အမှုမှ လွတ်မြောက်သွားခဲ့သည်။ 

၎င်း၏ နေအိမ်ကို ရဲများက ဝင်ရောက် ရှာဖွေချိန်တွင် နာဂျစ်ဘ်မှာ ဗလီတစ်ခုသို့ သွားရောက် ဝတ်ပြုနေပြီး သတင်းကြား၍ အလျင်အမြန် ပြန်လာခဲ့ကြောင်းလည်း မျက်မြင်များက ပြောကြားခဲ့သည်။

Ref: Reuters