ပြည်ခိုင်ဖြိုး အမတ်ဟောင်းကို ပြည်သူ့လွှတ်တော်ဥက္ကဋ္ဌအဖြစ် ဒီချုပ်အမတ်များ တင်မြှောက်

ပြည်သူ့လွှတ်တော်ဥက္ကဋ္ဌနှင့် ဒုတိယဥက္ကဋ္ဌအဖြစ် ရွေးချယ်တင်မြှောက်ခံရသည့် ဦးတီခွန်မြတ်နှင့် ဦးထွန်းထွန်းဟိန်တို့ ကျမ်းသစ္စာကျိန်ဆိုရန် လမ်းလျှောက်ထွက်လာစဉ် (ဓာတ်ပုံ − ဂျေမောင်မောင်(အမရပူရ))

ပြည်သူ့လွှတ်တော်တွင် ထိုင်ခုံအများစုရရှိထားသော အမျိုးသားဒီမိုကရေစီအဖွဲ့ချုပ် ပါတီသည် ပါတီဝင်မဟုတ်သူ တစ်ဦးကို လစ်လပ်ပြည်သူ့လွှတ် တော်ဥက္ကဋ္ဌအဖြစ် ယမန်နေ့က ခန့်အပ်တင်မြှောက်လိုက်သည်။

ဒီချုပ်အမတ်မဟုတ်သော ဒီချုပ်လွှတ်တော်ဥက္ကဋ္ဌ
လက်ရှိ တစ်သီးပုဂ္ဂလ အ မတ်ဟုဆိုရမည့် ပြည်ထောင်စု ကြံ့ခိုင်ရေးနှင့်ဖွံ့ဖြိုးရေး  (ပြည် ခိုင်ဖြိုး) ပါတီဝင်ဟောင်း ကွတ် ခိုင်အမတ် အသက် (၆၈)နှစ် အရွယ်ရှိ ဦးတီခွန်မြတ်ကို အမျိုး သားဒီမိုကရေစီအဖွဲ့ချုပ် ပါတီ၏ ဗဟိုကော်မတီဝင် ပုလဲအမတ် ဒေါ်ခင်စန်းလှိုင်က အမည်စာရင်း တင်သွင်းခဲ့ပြီး ဦးတီခွန်မြတ်က ဆန္ဒမဲအပြတ်အသတ်ဖြင့် ပြည် သူ့လွှတ်တော်ဥက္ကဋ္ဌ ရာထူးကို ရရှိခဲ့သည်။

ဦးတီခွန်မြတ်နှင့်အပြိုင် ပြည် ခိုင်ဖြိုးပါတီမှ ပျော်ဘွယ်အမတ် ဦးသောင်းအေးကို ပါတီတူ  ကျောင်းကုန်းအမတ် ဦးသိန်းထွန်းက အမည်စာရင်း တင်သွင်းခဲ့သည်။ သို့သော် ပြည်သူ့လွှတ်တော်ဥက္ကဋ္ဌ တစ်နေရာအတွက် လျှို့ဝှက်ဆန္ဒမဲဖြင့် လွှတ်တော်၏ အဆုံးအဖြတ်ရယူရာ ထောက်ခံမဲ ၂၈၀ ရရှိသည့် ဦးတီခွန်မြတ်က ထောက်ခံမဲ ၁၄၁ မဲသာရရှိသည့် ဦးသောင်းအေးကို အနိုင်ရရှိခဲ့သည်။

 ဦးဝင်းမြင့်နုတ်ထွက်သွား ချိန်တွင် ၎င်းနေရာကိုဆက်ခံနိုင် ဖွယ်ရှိသူများအဖြစ် ပြည်သူ့လွှတ်တော် ဒုဥက္ကဋ္ဌဦးတီခွန်မြတ် နှင့် အာဏာရပါတီ၏ ဗဟိုအလုပ် အမှုဆောင် အဖွဲ့ဝင် ဦးထွန်းထွန်း ဟိန်တို့ ရေပန်းစားသော်လည်း အာဏာရပါတီဝင် မဟုတ်သူ တစ်ဦးက ပြည်သူ့လွှတ်တော် ဥက္ကဋ္ဌနေရာ ရရှိခဲ့၍ အံ့သြမှင် တက်သူများရှိသလို ဝေဖန်သူများ လည်း ရှိခဲ့သည်။

ဝေဖန်သူများထဲတွင် ဒီချုပ်ပါတီကိုယ်စားလှယ် အချို့ပါဝင်သော်လည်း ၎င်းတို့ကိုယ်တိုင်အမည် ထုတ်ဖော်လိုခြင်းမရှိဘဲ ပါတီတွင်း ကိုယ်စားလှယ်များကိုသာ ဥက္ကဋ္ဌနေရာခန့်အပ်သင့်ကြောင်း မှတ်ချက်ပြုသည်။

 သို့ရာတွင် ပြည်သူ့လွှတ် တော်ဥက္ကဋ္ဌသစ် ဦးတီခွန်မြတ်ရရှိ သော ထောက်ခံဆန္ဒမဲအရေအ တွက်အရ အာဏာရပါတီလွှတ် တော်ကိုယ်စားလှယ်အားလုံးက တညီတညွတ်တည်း ထောက်ခံ ဆန္ဒမဲ ပေးခဲ့ကြောင်း သက်သေပြသည်။ ပြည်သူ့လွှတ်တော်တွင် အမျိုးသားဒီမိုကရေစီအဖွဲ့ချုပ်ပါတီမှ ကိုယ်စားလှယ် ၂၅၃ ဦးရှိပြီး ဦးတီခွန်မြတ်ရရှိသည့် ထောက်ခံမဲသည် ၂၈၀ ဖြစ်သည်။

သူရဦးရွှေမန်းနှင့် ရင်းနှီး၍လော
တစ်ဖက်တွင် ယခင်လွှတ် တော်သက်တမ်း၌ ပြည်သူ့လွှတ် တော်၊ ဥပဒေကြမ်းကော်မတီ ဥက္ကဋ္ဌ တာဝန်ထမ်းဆောင်ခဲ့သူ ဦးတီခွန်မြတ်သည် လက်ရှိပြည် ထောင်စုလွှတ်တော် ဥပဒေရေး ရာနှင့် အထူးကိစ္စရပ်များ လေ့လာ ဆန်းစစ်သုံးသပ်ရေးကော်မရှင် ဥက္ကဋ္ဌ သူရဦးရွှေမန်းနှင့် ရင်းနှီး သည့် ဆက်ဆံရေးရှိ၍ ယခုကဲ့သို့ ပြည်သူ့လွှတ်တော်ဥက္ကဋ္ဌအဖြစ် ရွေးချယ်တင်မြှောက်ခံရခြင်းဖြစ် နိုင်ကြောင်း လွှတ်တော်ကိုယ်စား လှယ်အချို့နှင့် မြန်မာ့နိုင်ငံရေး လေ့လာစောင့်ကြည့်သူ အချို့က သုံးသပ်သည်။

၁၉၉၀ မှ ၂၀၁၀ ပြည့်နှစ် အထိ ရှေ့နေချုပ်ရုံး ဥပဒေညွှန် ကြားရေးမှူးအဖြစ် တွဲဖက်ထား ပြီး ကွတ်ခိုင်ပြည်သူ့စစ် (ဌာနေ)၊ တိုက်ခိုက်ရေးရဲတပ်ဖွဲ့၊ တိုက်ခိုက်ရေးခေါင်းဆောင်အဖြစ် တာဝန် ယူခဲ့သူ ဦးတီခွန်မြတ်သည် အငြိမ်း စားဗိုလ်ချုပ်မှူးကြီးသန်းရွှေနှင့် လည်း ဆက်ဆံရေးကောင်းခဲ့သူ အဖြစ် သုံးသပ်သူအချို့ရှိသည်။

‘‘၂၀၀၇ မှာ နိုင်ငံတော်ဖွဲ့ စည်းပုံ အခြေခံဥပဒေ ရေးဆွဲရေး ကော်မရှင်မှာပါတယ်။ ၂၀၀၈ ဖွဲ့ စည်းပုံ ပြည်လုံးကျွတ်ဆန္ဒခံယူပွဲ မှာလည်း ပါတယ်။ ဒါပေမဲ့ နောက်ပိုင်း လွှတ်တော်ထဲမှာကျ တော့ ဦးရွှေမန်းဂိုဏ်းဖြစ်သွားတာ ပေါ့’’ ဟု တကောင်းနိုင်ငံရေး လေ့လာမှုအဖွဲ့ ဒါရိုက်တာအဖွဲ့ ဝင် ဦးရဲမျိုးဟိန်းက မှတ်ချက်ပြု သည်။

ထို့အပြင် ဦးရဲမျိုးဟိန်းက ‘‘ဦး ရွှေမန်းက လက်ရှိ အင်န်အယ်လ်ဒီအစိုးရအတွက် နောက်ကွယ်ကမဟာဗျူဟာ ချပေးနေတဲ့သူ (Strategist) ဖြစ်နေသလားလို့တောင် တွေးစရာဖြစ်လာတာပေါ့’’ ဟု သုံးသပ်သည်။

ဒီချုပ်နှင့် အတိုက်အခံပါတီ ကိုယ်စားလှယ်အချို့ကမူ ဥက္ကဋ္ဌ သစ်ဖြစ်လာသည့် ဦးတီခွန်မြတ် နှင့် အထူးကော်မရှင်ဥက္ကဋ္ဌ သူရ ဦးရွှေမန်းတို့အကြား ဆက်ဆံရေး အနေအထားကို သုံးသပ်ပြော ကြားလိုခြင်းမရှိသော်လည်း လွှတ် တော်အပေါ် အထူးကော်မရှင်၏ လွှမ်းမိုးမှုကို လက်ခံမည်မဟုတ် ကြောင်း ပြောကြားသည်။

‘‘(သူရဦးရွှေမန်းရဲ့ထောက် ခံမှုနဲ့ ဒီနေရာရတယ်လို့) မမြင်ပါ ဘူး။ ဆရာတို့ခေါင်းဆောင်က ယုံ ကြည်စိတ်ချလို့ ပေးလိုက်တဲ့ဟာ တစ်ခုကို ဆရာတို့ ကျေကျေနပ် နပ်လက်ခံရမှာဖြစ်တယ်။ ဘာ ကြောင့်လဲဆိုတော့ ဆရာတို့ ခေါင်းဆောင်ကိုယ်တိုင်က ယုံ ကြည်တဲ့အတွက်ကြောင့် ဒီနေရာ ကို ဆရာတို့ တစ်ခဲနက်ရွေးချယ် ပေးလိုက်တာဖြစ်တယ်။ အဲဒါ ကြောင့် ဆရာတို့ ဘာမှစိုးရိမ်စရာ မရှိပါဘူး’’ ဟု ပြည်သူ့လွှတ်တော် လွှတ်တော်အခွင့်အရေး ကော်မတီအတွင်းရေးမှူး ဒေါက်တာလှမိုးက ဆိုသည်။

ဆက်လက်၍ ဒေါက်တာလှ မိုးက ‘‘ကော်မရှင်က ကော်မရှင် ပါပဲ။ ကော်မရှင်က လွှတ်တော် အပေါ်မှာ လွှမ်းမိုးလို့မရပါဘူး။ သူသည် ရွေးချယ်ခံမဟုတ်ပါဘူး။ ကော်မရှင်ဟာ အကြံပြုလို့ပဲရပါ တယ်။ တိုက်ရိုက်ဥပဒေလည်း တင်သွင်းခွင့်မရှိပါဘူး။ ဥပဒေ တစ်ရပ်အပေါ်မှာ ဆုံးဖြတ်ပိုင်ခွင့် လည်း မရှိပါဘူး’’ ဟု ပြောသည်။

မည်သို့ပင်ဖြစ်စေ အမျိုးသားဒီမိုကရေစီအဖွဲ့ချုပ်ပါတီ ထိုင်ခုံ အများစု ရရှိထားသည့် ဒုတိယအ ကြိမ် လွှတ်တော်သက်တမ်း ၂ နှစ်ကျော်လာချိန်တွင် ကြီးမား သည့် အပြောင်းအလဲပြုလုပ်ခြင်း ဖြစ်သည်။ လက်ရှိပြည်ထောင်စု လွှတ်တော် နာယကရာထူးကို ကရင်တိုင်းရင်းသား မန်းဝင်းခိုင် သန်းက တာဝန်ယူထားပြီး လက် ကျန် လွှတ်တော်သက်တမ်း ၂နှစ်ခွဲကို ကချင်တိုင်းရင်းသား ဦးတီခွန်မြတ်က တာဝန်ယူခွင့်ရရှိတော့မည်ဖြစ်သည်။

စွန့်စားမှုများသည့် ဆုံးဖြတ်ချက်
ဦးတီခွန်မြတ်ကို ပြည်သူ့လွှတ်တော်ဥက္ကဋ္ဌ ခန့်အပ်ရန် အမျိုးသား ဒီမိုကရေစီအဖွဲ့ချုပ်ပါတီ၏ ဆုံးဖြတ်ချက်သည် Risk(စွန့်စားမှု) များသည့် ဆုံးဖြတ်ချက်ဖြစ်ကြောင်း အချက်လေးချက်ဖြင့် ဦးရဲမျိုးဟိန်းက ထောက်ပြသည်။

အချက်လေးချက်သည် အ ရေးပါသည့်နေရာကို ပါတီတွင်း၌ တာဝန်ထမ်းဆောင်နိုင်သူ မရှိ၍ လား၊ ပါတီအပေါ် မည်မျှသစ္စာခံ မည်နည်း၊ လွှတ်တော်ထဲမှပါတီ ဝင်များကို မည်သို့ထိန်းကျောင်း မည်နည်း၊ ယခင်က ပြည်သူ့စစ် ခေါင်းဆောင် ဖြစ်ခဲ့သည်ဟု သ တင်းထွက်ပေါ်ခဲ့မှုများ ဟူသည့် အချက်များဖြစ်ကြောင်း ၎င်းက ဆိုသည်။

တိုင်းရင်းသားပါတီတစ်ခုမှ အမည်မဖော်လိုသူ လွှတ်တော် ကိုယ်စားလှယ်တစ်ဦးက ဦးတီ ခွန်မြတ်ကို ပြည်သူ့လွှတ်တော် ဥက္ကဋ္ဌ ခန့်အပ်ခြင်းသည် စွန့်စား ရာကျလွန်းသည်ဟု အောက်ပါ အတိုင်း မှတ်ချက်ပြုသည်။

‘‘ကိုယ့်ပါတီကမဟုတ်ဘဲ တ ခြားပါတီက လူတစ်ယောက်ကို နိုင်ငံတော်မှာ အဆင့်(၅)ရှိတဲ့ နေ ရာကိုပေးလိုက်တယ်ဆိုတာဟာ တော်တော်စွန့်စားလွန်းရာကျမ လားဆိုတဲ့ အမြင်မျိုး မြင်မိတယ်။ ကာလုံမှာလည်းပါတယ်။ နောက် မကြာခင်မှာလည်း ပြည်ထောင်စု လွှတ်တော် နာယကနေရာကို ယူ ရတော့မယ်။ တကယ့်အဓိကကျ တဲ့နေရာကို ကိုယ့်ပါတီက လူတစ် ယောက်ကို မပေးဘဲနဲ့ တခြားပါ တီက ကူးလာတဲ့လူတစ်ယောက် ကို ပေးလိုက်တယ်ဆိုတာဟာ စွန့် စားလွန်းရာ ကျမလားလို့မြင်မိ တယ်’’။

 ပြည်သူ့လွှတ်တော်ဥက္ကဋ္ဌ အသစ် ရွေးချယ်တင်မြှောက် သည့် အစည်းအဝေးအပြီးတွင် ဦးတီခွန်မြတ် ဥက္ကဋ္ဌအသစ်ဖြစ် လာသည့်အပေါ် ကြိုက်နှစ် သက်မှုရှိ၊ မရှိကို 7Day Daily သတင်းစာက ပြည်ထောင်စုလွှတ် တော်ကိုယ်စားလှယ် ၃၀ ဦးကိုမေးမြန်းရာ ၂၀ ဦးက သဘောတူကြိုက်နှစ်သက်ပြီး ငါး ဦးက ကြိုက်နှစ်သက်ခြင်းမရှိကြောင်း ပြောသည်။ ကျန်ငါးဦးက တစ်စုံတစ်ရာ မှတ်ချက်ပြုခြင်းမရှိပေ။ ကြိုက်နှစ်သက်ခြင်းမရှိသည့် ငါးဦးတွင် အမျိုးသားဒီမိုကရေစီအဖွဲ့ချုပ်ပါတီမှ သုံးဦးပါဝင်သည်။

‘‘အမှန်အတိုင်း ပြောရင် ဦး တီခွန်မြတ်ကို မနှစ်သက်တာမ ဟုတ်ပါဘူး။ နောက်ခြောက်လဆို ရင် ပြည်ထောင်စုလွှတ်တော် နာယက ရာထူးယူမယ့် ပြည်သူ့ လွှတ်တော် ဥက္ကဋ္ဌနေရာမှာ အင်န် အယ်လ်ဒီက ကိုယ်စားလှယ်မ ဖြစ်တာကို အံ့သြမိတာအမှန်ပဲ’’ ဟု အမည်မဖော်လိုသူ အမျိုးသား ဒီမိုကရေစီအဖွဲ့ချုပ် ကိုယ်စား လှယ်တစ်ဦးကပြောသည်။

ထူးခြားသည်မှာ ပြည်ခိုင်ဖြိုး ပါတီက ဒီချုပ်နှင့်အပြိုင် ပြည်သူ့ လွှတ်တော်ဥက္ကဋ္ဌ လောင်းအမည် စာရင်း တင်သွင်းသော်လည်း အ စည်းအဝေးအပြီးတွင် ဦးတီခွန် မြတ်ကို ထောက်ခံကြောင်း ပြော ကြားသည်။

‘‘ဒီနေ့ရွေးချယ်ပွဲက ကောင်း မွန်ပါတယ်။ လွှတ်တော်အတွက် ကောင်းတဲ့လက္ခဏာရှိပါတယ်’’ ဟု ကျောင်းကုန်းအမတ် ဦးသိန်း ထွန်းက မှတ်ချက်ပြုသည်။

7Day Daily သတင်းစာက ပြည်ခိုင်ဖြိုးအမတ် ခုနစ်ဦးကိုဦးတီခွန်မြတ်အပေါ် သဘောထား မေးမြန်းရာ ငါးဦးက သဘောတူ ထောက်ခံကြောင်း မှတ်ချက်ပြု ပြီး နှစ်ဦးက မှတ်ချက်ပြုရန် ငြင်း ဆိုသည်။

အဂတိကင်းစွာ ဆောင်ရွက်မည်
အမျိုးသားဒီမိုကရေစီအဖွဲ့ ချုပ် ကိုယ်စားလှယ်အများစုက ဦးတီခွန်မြတ် ဥက္ကဋ္ဌဖြစ်လာခြင်း သည် ပါတီ၏ဆုံးဖြတ်ချက်ဖြစ်၍ လိုက်နာဆောင်ရွက်ခြင်းဖြစ်ပြီး ၎င်းတို့ရွေးချယ်တင်မြှောက်သည့် ဥက္ကဋ္ဌသစ်သည် ဒီချုပ်၏ မူဝါဒ အတိုင်း ဥပဒေပြုရေး ကဏ္ဍပီပြင် ရေး၊ နိုင်ငံသူ၊ နိုင်ငံသားများ၏ အကျိုးအတွက် စွမ်းဆောင်နိုင် မည်ဟု မျှော်လင့်ကြောင်း ပြော ကြားသည်။

‘‘ရှေ့ပိုင်းမှာရှိခဲ့တဲ့ ၂ နှစ်ခွဲ တာကာလမှာတော့ လက်ရှိဥက္ကဋ္ဌ ဟာ ဒီမိုကရေစီလမ်းကြောင်းပေါ် မှာ ခိုင်ခိုင်မာမာရပ်တည်တာမျိုး တွေ့ရတယ်။ နောက်ပြီးကျတော့ ဆရာတို့အမျိုးသား ဒီမိုကရေစီအ ဖွဲ့ချုပ်ရဲ့ သွားတဲ့လမ်းကြောင်းအ ပေါ်မှာပဲ သူလိုက်လာတာကို တွေ့ရတယ်။ အဲဒါကြောင့် သူဥက္ကဋ္ဌ ဖြစ်သွားတဲ့အချိန်မှာလည်း ဒီလမ်း ကြောင်းကနေ သွေဖည်မယ်လို့ မထင်ပါဘူး။ သို့သော် ဒါကအား လုံးစောင့်ကြည့်ကြရမှာ ဖြစ်ပါ တယ်’’ ဟု ဒေါက်တာလှမိုးက မှတ်ချက်ပြုသည်။

ဦးတီခွန်မြတ်အား ပြည်သူ့ လွှတ်တော်ဥက္ကဋ္ဌလောင်းအဖြစ် အမည်စာရင်းတင်သွင်းသူ ပုလဲ အမတ်ဒေါ်ခင်စန်းလှိုင်က ‘‘တိုင်း ရင်းသား တစ်ယောက်လည်းဖြစ် တယ်။ လွှတ်တော်အတွေ့အကြုံ လည်း ရှိနေတယ်။ သူ့ရဲ့မူလ အရည်အချင်း အရည်အသွေး အရလည်း မှန်မှန်ကန်ကန်ရပ် တည်မယ်လို့ ထင်တယ်။နောက် တစ်ခုက ကျတော့လည်း ကျွန်မ တို့ပါတီရဲ့မူဝါဒ လမ်းစဉ်သ ဘောတရားတွေအတိုင်း၊ ပါတီ ကချမှတ်တဲ့ စည်းမျဉ်း စည်းကမ်း တွေအတိုင်း ဆောင်ရွက်လိမ့် မယ်လို့လည်း မျှော်လင့်ထား တယ်။ အဲဒီအတွက် ဒီနေ့တစ်ခဲ နက်မဲပေးပြီး တော့ရွေးချယ်လိုက် ခြင်းဖြစ်ပါတယ်’’ ဟု ယမန်နေ့က ကျင်းပသော အစည်းအဝေးအပြီး  သတင်းထောက်များအား ပြောသည်။

လက်ရှိ ပြည်သူ့လွှတ်တော် ဥက္ကဋ္ဌဖြစ်လာသူ ဦးတီခွန်မြတ်သည် ဥပဒေရေးရာ ကျွမ်းကျင်သူတစ်ဦး အဖြစ်သတ်မှတ်ခံထားရပြီး ဥက္ကဋ္ဌ ဟောင်းဦးဝင်းမြင့်နှင့်အတူ ဒုဥက္ကဋ္ဌအဖြစ် လွှတ်တော်လုပ်ငန်းစဉ်များကို လက်တွဲညီညီလုပ်ဆောင်နိုင်ခဲ့သည်ဟု ပြည်သူ့ လွှတ်တော်ကိုယ်စားလှယ်အများ စုက သုံးသပ်သည်။

ဦးတီခွန်မြတ်သည် ၂၀၁၇ တွင်ပြည်ခိုင်ဖြိုးပါတီမှ နုတ်ထွက် ခဲ့ပြီး ယင်းအချိန်ကတည်းက ဦး ၀င်းမြင့်က ၎င်းနေရာကို ဆက်ခံ နိုင်ဖွယ်ရှိသူအဖြစ် ကြိုတင်လျာ ထားခဲ့ခြင်းဖြစ်နိုင်ကြောင်း ပြည် ခိုင်ဖြိုးအမတ် ဦးသိန်းထွန်းက ပြောသည်။

ဦးတီခွန်မြတ်က ဥက္ကဋ္ဌအ ဖြစ် နှုတ်ခွန်းဆက်စကားပြောရာ တွင် ‘‘ဥပဒေပြုရေး မဏ္ဍိုင်ဖြစ်တဲ့ လွှတ်တော်ဥက္ကဋ္ဌ တာဝန်ကို လွှတ် တော်ကိုယ်စားလှယ်များက ကျွန် တော့်အား ပေးအပ်လိုက်တဲ့အ တွက် ဒီတာဝန်ကြီးကို ကျွန်တော့် အနေဖြင့်လည်း လွှတ်တော်ဆိုင် ရာ ဥပဒေ၊ နည်းဥပဒေစည်းမျဉ်း  စည်းကမ်းများနဲ့အညီ အဂတိ တရားကင်းရှင်းစွာဖြင့် မိမိတို့နိုင်ငံတွင် ဒီမိုကရေစီအခွင့်အလမ်းများ ပွင့်လန်းလာစေရန် နိုင်ငံသားများ ရဲ့ အခြေခံ လူ့အခွင့်အရေးများ ပိုမိုရရှိလာစေရန်တို့ကို ကိုယ်စွမ်း၊ ဉာဏ်စွမ်းရှိသမျှ ကြိုးပမ်းအား ထုတ်မည်ဖြစ်ပါကြောင်း လေး နက်တည်ကြည်စွာ ကတိပြုပါ တယ်’’ ဟု ပြောသည်။

ဒီချုပ်အမတ်က ဒုဥက္ကဋ္ဌ
ယခင် ပြည်သူ့လွှတ်တော် ဒုတိယဥက္ကဋ္ဌ တာဝန်ယူခဲ့သည့် ဦးတီခွန်မြတ်နေရာ လစ်လပ်သွား ၍ ယင်းနေရာအတွက် ဆက် လက် ရွေးချယ်တင်မြှောက်ရာ အသက် (၆၉) နှစ်ရှိပြီဖြစ်သည့် ပြည်သူ့လွှတ်တော် ဥပဒေကြမ်း ကော်မတီဥက္ကဋ္ဌ ဦးထွန်းထွန်းဟိန် ရွေးချယ်တင်မြှောက်ခံရသည်။ နောင်ချိုအမတ် ဦးထွန်းထွန်းဟိန် နှင့်အပြိုင် မိတ္ထီလာအမတ် ဒေါက် တာမောင်သင်းကို ပြည်ခိုင်ဖြိုးက အဆိုပြုခဲ့သော်လည်း ထောက်ခံ မဲ ၂၇၀ ရရှိသည့် ဦးထွန်းထွန်းဟိန် က ထောက်ခံမဲ ၁၄၃ မဲရရှိသည့် ဒေါက်တာမောင်သင်းကို အနိုင် ရရှိပြီး ပြည်သူ့လွှတ်တော်ဒုဥက္ကဋ္ဌ ဖြစ်လာသည်။