အင်တာနက်တွင် လူသိများသည့် မြွေကျွမ်းကျင်သူ မြွေပေါက်ခံရပြီး ကွယ်လွန်

မြွေများကို ကျွမ်းကျင်စွာ ကိုင်တွယ်ပြပြီး လူသိထင်ရှားသည့် မလေးရှား နိုင်ငံသားတစ်ဦး မြွေပေါက်ခံရ၍ သေဆုံးခဲ့ကြောင်း သိရသည်။


မီးသတ်ဝန်ထမ်း တစ်ဦးလည်းဖြစ်သည့် အဘူဇာရင် ဟူစိန်သည် မြွေများနှင့် ပတ်သက်၍ ပိုင်နိုင် ကျွမ်းကျင်ပြီး အထာနပ်လွန်းသူ တစ်ဦးအဖြစ် ကျော်ကြားသလို လူမှုကွန်ရက်များပေါ်တွင်လည်း ၎င်းနှင့် မြွေများ ဆော့ကစားသည့် ဗီဒီယိုများကို လူအများ ကြည့်ရှုလေ့ ရှိသည်။

သို့သော် ယခုသီတင်းပတ် အစောပိုင်းကမူ ဟူစိန်မှာ မြွေဟောက်တစ်ကောင် ပေါက်လိုက်သည့်ဒဏ်ကြောင့် ဆေးရုံသို့ တင်ပို့ခြင်း ခံခဲ့ရသည်။ ရက်ပိုင်းမျှ အကြာတွင်မူ ဟူစိန်သည် အသက် ၃၃ နှစ် အရွယ်၌ ကွယ်လွန်သွားပြီဟု ဒေသခံ မီဒီယာများက ဖော်ပြခဲ့သည်။

ဟူစိန်သည် မြွေတစ်ကောင်ကို လိုက်လံ တာဝန်ယူ ဖမ်းဆီးချိန်တွင် မြွေပေါက်ခံခဲ့ရခြင်း ဖြစ်သည်။ ၎င်းသည် လုပ်ဖော်ကိုင်ဖက် မီးသတ်တပ်ဖွဲ့ဝင်များကို မြွေများနှင့် ပတ်သက်၍ မည်သို့မည်ပုံ ကိုင်တွယ်ရသည် ဆိုခြင်းကို သင်ပြရသည့် သင်တန်းဆရာ တာဝန်ကိုလည်း ယူထားသည်။

ဟူစိန်သည် မြွေများကို ကိုင်တွယ်သည့် စတန့်ပြကွက်များကြောင့် အင်တာနက်ပေါ်တွင် လူသိများသူတစ်ဦး ဖြစ်ခဲ့ပြီး ယခင်က မြွေများကို နှုတ်ခမ်းချင်း ထိနမ်းသည့် ပြကွက်များပင် ပြုလုပ်ပြခဲ့ဖူးသည်။ ထို့ကြောင့်လည်း ဟူစိန်ကို Snake Whispererဆိုသော ချစ်စနိုး အမည်ဖြင့် ပရိသတ်က ခေါ်ဝေါ်ခဲ့ကြသည်။

ဟူစိန်သည် မြွေများနှင် ပတ်သက်၍ အစွဲကြီးသူဟု ဆိုနိုင်ပြီး မြွေများ၏ ဓလေ့သဘာဝကို ပိုမိုနားလည် သဘောပေါက်စေရန် နေအိမ်၌ပင် ထားရှိ မွေးမြူထားသည်။ ၎င်းက “အရင်က ကျွန်တော်နဲ့ မြွေတစ်ကောင် တွဲရိုက်ထားတဲ့ ဓာတ်ပုံကို ကြည့်ပြီး မြွေနဲ့ကျွန်တော် လက်ထပ်ထားပါတယ်ဆိုတဲ့ သတင်းတုတွေတောင် ထွက်ခဲ့သေးတယ်”ဟုလည်း မီဒီယာများကို ပြောကြားခဲ့ဖူးသည်။

အဆိုပါ သတင်းတု တွင်ကျယ်လျင်မြန်စွာ ပျံ့နှံ့သွားခြင်းကလည်း ဟူစိန်ကို လူသိပိုများစေသည့် အကြောင်းတစ်ရပ် ဖြစ်ခဲ့သည်။ ယင်းသတင်းကို Daily Mailနှင့် Daily Mirror အစရှိသော သတင်းဌာနကြီးများကပါ ထပ်ဆင့် ဖော်ပြခဲ့ကြောင်း သိရသည်။

Ref: Washington Post