ဂီတာမုန်တိုင်း ဦးတည်လာခြင်းကြောင့် နယူးဇီလန်တွင် အရေးပေါ် အခြေအနေ ကြေညာထား

ဂီတာမုန်တိုင်း တိုက်ခတ်ခဲ့ပြီးနောက် တွန်ဂါတွင် တွေ့ရသည့် အပျက်အစီးများ။


ဂီတာမုန်တိုင်း ဦးတည် တိုက်ခတ်လာခြင်းကြောင့် နယူးဇီလန် တောင်ပိုင်းတွင် ရာသီဥတု အရေးပေါ် အခြေအနေ ကြေညာချက် ထုတ်ပြန်ထားလိုက်သည်။


ဂီတာသည် တွန်ဂါနှင့် ဖီဂျီ နိုင်ငံများတွင် ထိခိုက်ပျက်စီးမှု များစွာ ဖြစ်ပေါ်စေခဲ့ပြီးနောက် ယခုအခါ နယူးဇီလန်ရှိ ခရစ်ချတ်ခ်ျ ဒေသသို့ ဆက်လက်ဦးတည် ရွေ့လျားနေသည်။

ခရစ်ချတ်ခ်ျတွင် ကျောင်းများကို ပိတ်ထားလိုက်ပြီး မုန်တိုင်း အခြေအနေနှင့် ပတ်သက်၍ နိုးကြား သတိရှိနေရန် အာဏာပိုင်များက ဆော်ဩ တိုက်တွန်းထားသည်။

နယူးဇီလန် အမျိုးသား လေကြောင်းလိုင်းကလည်း နိုင်ငံမြောက်ပိုင်းရှိ မြို့တော် ဝယ်လင်တန်သို့ ဝင်ရောက်မည့် ခရီးစဉ်များရော၊ ထွက်ခွာမည့် ခရီးစဉ်များကိုပါ ဆိုင်းငံ့ထားစေခဲ့သည်။ 

မိုးလေဝသ ပညာရှင်များက ဂီတာ၏ လေတိုက်နှုန်းသည် ဖေဖော်ဝါရီ ၂၀ ၌ ကုန်းတွင်းဝင်ရောက်ချိန်တွင် တစ်နာရီ မိုင် ၉၀ မျှထိ ပြင်းထန်နေနိုင်ကြောင်း သတိပေးထားသည်။

“မုန်တိုင်းဒဏ်ကို ဖေဖော်ဝါရီ ၂၀ တစ်ညလုံးကနေ နောက်တစ်နေ့ မနက်ထိ ခံရနိုင်ပါတယ်”ဟု ခရစ်ချတ်ခ်ျ မြို့တော်ဝန် လီယန်နီ ဒယ်လ်ဇီရဲလ်က ပြောကြားခဲ့သည်။ သူမက မြေနိမ့်ပိုင်းတွင် နေထိုင်သူများ အနေဖြင့် ရေလွှမ်းမိုးမှုများ ကြုံလာနိုင်သောကြောင့် ကြိုတင် ရွှေ့ပြောင်းထားသင့်ကြောင်းလည်း အကြံပြုခဲ့သည်။ “ကျွန်မတို့ အနေနဲ့ နေအိမ်တချို့ ရေမြုပ်သွားနိုင်တယ်လို့ ကြိုမှန်းထားပါတယ်”ဟု ဒယ်လ်ဇီရဲလ်က ဆိုသည်။

ဂီတာသည် အစောပိုင်းက ဆိုင်ကလုန်း အဆင့်ထိ ရောက်ရှိခဲ့သော်လည်း ယခုအချိန်တွင်မူ အပူပိုင်း မုန်တိုင်းအဖြစ် ပြန်လည် အားပျော့လာခဲ့သည်။ မုန်တိုင်းနှင့် ဆက်စပ်၍ အနည်းဆုံး လူ ၂ ဦး သေဆုံးခဲ့ကြောင်းလည်း သတင်းများက ဖော်ပြခဲ့သည်။

Ref: BBC

Top News