မတည်ငြိမ်မှုဒဏ် ခံခဲ့ရသည့် ခရီးသွား

ရွှေတိဂုံဘုရားရင်ပြင်ပေါ်မှ ကမ္ဘာလှည့်ခရီးသွားအချို့ ဓာတ်ပုံ − စိုင်းဇော်

၂၀၁၇ သည် မြန်မာနိုင်ငံ၏ ခရီး သွားကဏ္ဍတွင် တိုးတက်မှုနှင့် ဆုတ် ယုတ်မှုတို့ကို  ကြုံတွေ့ခဲ့ရပြီး ခရီး သွားကဏ္ဍနှင့် ဆက်စပ်သော လုပ်ငန်းရှင်များအတွက် မျှော်မှန်းထားသလောက် တွက်ခြေမကိုက်သည့် နှစ်တစ်ခု ဖြစ်ခဲ့သည်။


 သြစတြေးလျ အခြေစိုက် နိုင်ငံတကာ ခရီးသွားလမ်းညွှန် ၀က်ဘ်ဆိုက်ကို Lonley Planet မှ ၂၀၁၇ အတွင်း ကမ္ဘာပေါ်၌ သွားရောက်လည်ပတ်ရန် အကောင်းဆုံး ၁၀ နိုင်ငံထဲတွင် မြန်မာနိုင်ငံကို အဆင့် (၉)နေရာတွင် ဖော်ပြခံခဲ့ရပြီး၊ မြန်မာ့ခရီးသွားလုပ်ငန်း နှစ်ဦးတာထွက်ကောင်းခဲ့သည်။

ဟိုတယ်နှင့် ခရီးသွားလာ ရေးဝန်ကြီးဌာနကလည်း ၂၀၁၇ အတွင်း မြန်မာနိုင်ငံသို့ နိုင်ငံခြား ခရီးသွား ၃ ဒသမ ၅ သန်းဝင် ရောက်ရန် မျှော်မှန်းခဲ့သည်။

နှစ်ဦးပိုင်း၌ မြန်မာနိုင်ငံသို့ နိုင်ငံခြားသားခရီးသွား ဧည့်သည်ဝင်ရောက်မှု တိုးတက်ခဲ့ပြီး ၂၀၁၇ ပထ မခြောက်လအတွင်း နိုင်ငံခြား သား ခရီးသွားဝင်ရောက်မှု နှစ်သန်းခန့်ရှိခဲ့ပြီး ယမန်နှစ်ကထက် ၂၀ ရာခိုင်နှုန်းခန့် တိုးတက်ခဲ့သည်။

ပုံမှန်ခရီးသွားနည်းသည့် မိုးရာသီတွင် ခရီးသွားပိုတိုးလာစေရန် ၀န်ကြီးဌာနက ဦးစီး၍ Green Season  ပရိုမိုးရှင်းအစီအစဉ်ကို ဇူလိုင်တွင် အကောင်အထည်ဖော်ခဲ့သည်။ ကမ္ဘာလှည့် ခရီးသွားများလည်ပတ်မှု အများဆုံးခရီးစဉ်ဒေသများဖြစ်သည့် ရန်ကုန်၊ မန္တလေး၊ ပုဂံ၊ အင်းလေး၊ ငပလီ၊ ငွေဆောင်၊ ချောင်းသာနှင့် နေပြည်တော်တို့ရှိ ဟိုတယ်များနှင့် ပူးပေါင်းကာ အခန်းခများ လျှော့ချပေးမည့် Green Season Pro-motion ကို ပြုလုပ်ခဲ့သည်။ ပရိုမိုးရှင်းကာလကို ဇွန်လမှ စက်တင်ဘာအထိ သတ်မှတ်ခဲ့ပြီး တည်းခိုခများလျှော့ ချပေးခြင်းကိုအထက်ပါခရီးစဉ် ဒေသရှစ်ခုမှ ဟိုတယ်အလုံးကိုးဆယ်ခန့်တွင်ပြုလုပ်ခဲ့သည်။ 

 သို့သော် မိုးရာသီကာလ တစ်လနောက်ကျပြီးမှသာ Green Season ပရိုမိုးရှင်းကို စတင်နိုင်ခဲ့သဖြင့် လူသိနည်းခဲ့ပြီးထင်သ လောက် မထိရောက်ခဲ့ကြောင်း၊ လာမည့်နှစ်များတွင် ယခုထက်ပို၍ တိုးမြှင့်ဆောင်ရွက်ရန် လိုအပ်နေသေးကြောင်း ခရီးသွား လုပ်ငန်းရှင်များက သုံးသပ်အကြံပြုသည်။

ထို့ပြင်ယခုနှစ်အတွင်း လူထုအခြေ ပြု ခရီးသွားလုပ်ငန်း (CBT) ဒေသများကိုလည်း တိုးချဲ့ဖော်ထုတ်ခဲ့ပြီး လက်ရှိတွင် မြန်မာနိုင်ငံရှိ ကျေးရွာ ၂၀ ကျော်တွင် CBT လုပ်ငန်းကို အကောင်အထည်ဖော်ခဲ့သည်။

ထိုသို့ပြင်ဆင်မှုများ ပြုလုပ် ကာ ဆက်လက်ဖွံ့ဖြိုးရန် အားယူ နေသော မြန်မာ့ခရီးသွားလုပ်ငန်း အတွက် ခရီးသွားရာသီမစမီ သြဂုတ်လကုန်တွင် အဟန့်အတားတစ်ခု ပေါ်ပေါက်လာခဲ့သည်။

သြဂုတ် ၂၅ ရက်တွင် မောင် တောခရိုင်ရှိ နယ်ခြားစောင့်ရဲစခန်း ၃၀ ကျော်နှင့် တပ်စခန်းတစ်ခုကို ARSA အကြမ်းဖက်သမားများ တိုက်ခိုက်ခဲ့ပြီးနောက် ရခိုင်ပြည်နယ်မြောက်ပိုင်းတွင် မတည်ငြိမ်မှုများ ဖြစ်ပေါ်ခဲ့သည်။ ထို့ကြောင့် မြောက်ဦးသို့လာရောက် လည်ပတ်ရန် စီစဉ်ထားသည့် ခရီးစဉ်အချို့ ဖျက်သိမ်းမှုများရှိလာခဲ့သလို ခရီးသွားရာသီတွင် မြန်မာနိုင်ငံသို့ လာရောက်လည်ပတ်ရန် စီစဉ်ထားသောအနောက်နိုင်ငံများမှ ခရီးသွားဧည့်သည်များခရီးစဉ်ဖျက်သိမ်းမှု အချို့ကို ပြုလုပ်ခဲ့သည်။

ရခိုင်ပြည်နယ်အတွင်း မငြိမ် သက်မှုများဖြစ်ပွားပြီးနောက်ပိုင်းခရီးသွားဝင်ရောက်မှု ၂၀ ရာခိုင် နှုန်း ကျသွားကြောင်းအထူးသဖြင့် ဥရောပနိုင်ငံများမှ ဖြစ်ကြောင်း  Nature Dream ခရီးသွားလုပ်ငန်း မန်နေဂျင်းဒါရိုက်တာ ဒေါ်စံပယ်အောင်ကသုံးသပ်ပြောသည်။ 

မြန်မာနိုင်ငံသို့ နိုင်ငံခြားသား ခရီးသွားဧည့်သည် ၀င်ရောက်မှု နှုန်းသည် ၂၀၁၃ တွင် ၂ ဒသမ ၀၄ သန်း ၊ ၂၀၁၄ တွင် ၃ ဒသမ ၀၈ သန်း၊၂၀၁၅ တွင် ၄ ဒသမ ၀၆ သန်း၊၂၀၁၆ တွင် ၂ ဒသမ ၉ သန်းနှင့်၂၀၁၇ တွင် အောက်တိုဘာလကုန်အထိ ၃ ဒသမ ၁ သန်းရှိခဲ့သည်။

၂၀၁၇ တွင် ခရီးသွားရာသီမတိုင်မီ ရိုက်ခတ်မှုများကြောင့် ထိခိုက်မှုရှိခဲ့သော်လည်း ၂၀၁၆ ကထက် ၂၀ ရာခိုင်နှုန်းတိုးတက်ခဲ့ သည်။ မြန်မာ့ခရီးသွားကဏ္ဍသည် ၂၀၁၇ နှစ်ဦးပိုင်းတွင် ကောင်းမွန် စွာ စတင်နိုင်သော်လည်း နိုင်ငံ တွင်း ပဋိပက္ခများနှင့် လုံခြုံရေး ပြဿနာများကြောင့် အဓိကခရီးသွားရာသီ ကာလများတွင် အဟန့်အတားဖြစ်လာစေခဲ့ကြောင်း Ox-ford Business Group ကလည်း သုံးသပ်ခဲ့သည်။။

Top News