အယ်ဒီတာ့အာဘော်

ဘော်တဲယာ၏ အဆိုအမိန့်ကို နှလုံးသွင်းပါ

‘‘ခင်ဗျားပြောတာကို ကျွန်တော်သဘောမတူ ပါဘူး။ ဒါပေမဲ့ ခင်ဗျားရဲ့ ပြောပိုင်ခွင့်အတွက် ကျွန် တော်သေသည်အထိ ကာကွယ်သွားပါမယ်’’

ကမ္ဘာကျော် ပြင်သစ်စာရေးဆရာ၊သမိုင်းပညာရှင်၊ တွေးခေါ်ပညာရှင် ဘော်တဲယာ၏ ထင်ရှားလှသည့်အဆိုအမိန့်များထဲမှ တစ်ခုဖြစ်သည်။ လွတ်လပ်စွာပြောရေးဆိုခွင့် မည်မျှအရေးကြီးပြီး တန်ဖိုးထားသည်ကို ထင်ရှားစေသောပြောစကားလည်း ဖြစ်သည်။

ဆယ်စုနှစ်ငါးခုနီးပါးကြာ အာဏာရှင်အစိုးရအဆက်ဆက်အ မှောင်ခေတ်တွင်မူ လူတစ်ဦးချင်း လွတ်လပ်စွာပြောဆိုဝေဖန်ခွင့်၊သဘောထားဆန္ဒထုတ်ဖော်ခွင့်တို့မှာလည်း ချိပ်ပိတ်ခတ်ခံခဲ့ရသည်။ လွတ်လပ်စွာထုတ်ဖော်ပြောဆိုခွင့်နှင့် မိမိတို့၏အမြင်များကို လွတ် လပ်စွာဆန္ဒထုတ်ဖော်ခွင့်မှာ ဒီမိုကရေစီနိုင်ငံများတွင် မရှိမဖြစ်အခြေ ခံအခွင့်အရေးတစ်ရပ်ဖြစ်ပါသည်။

မြန်မာနွေဦးဟုနိုင်ငံတကာက တင်စားခဲ့ကြသော သမ္မတ ဦးသိန်းစိန်အစိုးရလက်ထက်၂၀၁၁ အလွန်ကာလများ၌ မြန်မာနိုင်ငံ၏အသွင်ကူးပြောင်းမှုကို နိုင်ငံတကာက ပိုမိုစိတ်ဝင်စား လာစေသော  ကြိုးပမ်းဆောင်ရွက်မှုများတွင်  ပြည်ထောင်စုလွှတ်တော်က  ငြိမ်းချမ်းစွာစုဝေးခွင့်နှင့်ငြိမ်းချမ်းစွာစီတန်းလှည့်လည်ခွင့်ဆိုင်ရာဥပဒေကို ၂၀၁၁ ဒီဇင်ဘာ ၂ ရက်တွင် အတည်ပြုပြဋ္ဌာန်းနိုင်ခဲ့ခြင်းလည်းပါဝင်သည်။

အဆိုပါ ဥပဒေမှာ စစ်အာဏာရှင်အစိုးရများက လူထုငြိမ်းချမ်း စွာ ဆန္ဒထုတ်ဖော်မှုများကိုပင် သည်းမခံဘဲ ရက်ရက်စက်စက်ဖြိုခွဲလေ့ ရှိသော နိုင်ငံတွင် လူငါးဦးထက်ပိုစုဝေးသည်နှင့်ဖမ်းဆီးနိုင်သော အမိန့်များထုတ်ပြန်ထားခဲ့သောနိုင်ငံတွင်  ထူးခြားလှသော အပြောင်း အလဲတစ်ရပ်ဖြစ်ခဲ့ပါသည်။

သို့သော်အဆိုပါ ငြိမ်းစုစီဥပဒေတွင်လည်း ဆန္ဒပြခွင့်တောင်းဆိုမှု များကို ခွင့်မပြုဘဲနေနိုင်သလို စီတန်းလှည်လည်ဆန္ဒပြသူများကို ဥပဒေ နှင့်မညီဟုဆိုကာ အမှုဖွင့်ပါကတစ်နေရာတည်းသာမက ဖြတ်သန်း သွားရာ မြို့နယ်တိုင်းကအမှုဖွင့်နိုင်ခြင်း၊ ပြစ်ဒဏ်များပြင်းထန်လွန်ခြင်း စသောအားနည်းချက်များရှိသဖြင့် ဥပဒေကိုအကြိမ်ကြိမ်ပြင်ဆင်ခဲ့ကြ ပါသည်။ ထိုထဲတွင်မှ ယခင်ကျင်းပခဲ့သော လွှတ်တော်များထဲမှစတင်ခဲ့ ပြီး ဒီချုပ်အစိုးရလက်ထက်  ၂၀၁၆ အောက်တိုဘာ ၄ ရက်တွင် ဥပဒေ ၏အမည်ကိုပင်အနည်းငယ်ပြောင်းလဲ၍ ‘ငြိမ်းချမ်းစွာစုဝေးခြင်းနှင့် ငြိမ်း ချမ်းစွာစီတန်းလှည့်လည်ခြင်းဆိုင်ရာ ဥပဒေ’ ကို ပြင်ဆင်ပြဋ္ဌာန်းသည်။ ထို့ကြောင့် နိုင်ငံသားများမှာ သက်ဆိုင်ရာသို့ ခွင့်ပြုချက်တောင်းရန် မလိုဘဲ နှစ်ရက်ကြိုတင်အသိပေးရုံဖြင့်ဆန္ဒ ထုတ်ဖော်ခွင့်ရခဲ့သလို၊ ဥပဒေချိုးဖောက်၍ တရားစွဲဆိုခံရပါကလည်း ဆက်စပ်မှုနှင့်အားလုံးကတရားမစွဲဆိုနိုင်တော့ဘဲစတင်ဖောက်ဖျက်ကျူးလွန်သည့်မြို့နယ်ကသာတရားစွဲဆိုနိုင်တော့သည်။ ထို့အပြင် ပြစ်မှုနှင့်ပြစ်ဒဏ်များကိုလည်း လျှော့ပေါ့ပေးခဲ့ကာ ခေတ်စနစ်နှင့်အညီ ပြောင်းလဲမှုများစွာပြုလုပ်ခဲ့ပါသည်။

ထို့နောက်ပိုင်း ငြိမ်းစုစီဥပဒေနှင့်ပတ်သက်၍ ယခင်ကဲ့သို့ ပြဿနာ များစွာ မရှိတော့ပေ။ သို့သော် ပြည်သူများ၏ မျှော်လင့်ချက်များစွာ  ထားခံရသည့် ပြည်သူ့အစိုးရလက်ထက်တွင် မြန်မာနိုင်ငံ၏အဓိကမြို့ ကြီးဖြစ်သော စီးပွားရေးမြို့တော်ရန်ကုန်ရှိ မြို့တွင်း ၁၁ မြို့နယ်တွင် ဆန္ဒပြခွင့်မပြုရန် တိုင်းဝန်ကြီးချုပ်၏ကိုယ်စား ရန်ကုန်တိုင်းနယ်လုံဝန် ကြီးကလက်မှတ်ထိုး၍ နိုဝင်ဘာ ၇ ရက်စွဲဖြင့် သက်ဆိုင်ရာမြို့နယ်ရဲ တပ်ဖွဲ့များထံ အကြောင်းကြားခဲ့သည်။

ကျောက်တံတား၊ပန်းဘဲတန်း၊ လသာ၊ လမ်းမတော်၊ ဗိုလ်တ ထောင်၊ ဗဟန်း၊ စမ်းချောင်း၊ ဒဂုံ၊ အလုံ၊ မင်္ဂလာတောင်ညွန့်နှင့် ပုဇွန် တောင်မြို့နယ်များတွင် ငြိမ်းချမ်းစွာ စုဝေးခြင်းနှင့် စီတန်းလှည့် လည်ခွင့်မပြုရန် ဒေသန္တရအမိန့်ဖြင့် တားမြစ်ခြင်းဖြစ်သည်။ ပြည် သူများ ခရီးသွားလာမှုအနှောင့်အယှက်ဖြစ်စေခြင်း၊ စိတ်ငြိုငြင်ခြင်း၊ အန္တရာယ်ရှိစေခြင်း၊ စိုးရိမ်ထိတ်လန့်စေခြင်းများဖြစ်ပေါ်နိုင်သဖြင့် ခွင့်မပြုဘဲ တာမွေမြို့နယ်ရှိဟစ်တိုင်ကွင်းတွင် ပြောင်းလဲလျှောက် ထားစေရန် ညွှန်ကြားထားသည်။

သို့သော် ရန်ကုန်တွင် ပုပ်ရဟန်းမင်းကြီး၏အဓိက အစီအစဉ်မှာ တာမွေမြို့နယ်ရှိ ကျိုက္ကဆံကွင်းတွင်မိန့်ခွန်းပြောမည်ဖြစ်၍ အထက်ပါ အကြောင်းပြချက်မှာ ဆီလျော်မှု မရှိလှပါ။ ပြည်သူများအတွက် ဆန္ဒပြပွဲများကြောင့် အထက်တွင်ဆိုခဲ့သည့်အခြေအနေများကြောင့် ၁၁ မြို့နယ်အတွင်းခွင့်မပြုဟုဆိုပါက ရန်ကုန်မြို့တွင် သွားလာမှုများသည့်ကျန်မြို့နယ်များကို မည်သည့်အတွက်ကြောင့် ချန်ထားခဲ့သည်မှာလည်း မေးခွန်းထုတ်စရာဖြစ်သည်။ အဆိုးဆုံးအချက်မှာ ဒီမိုကရေစီနည်းကျ ရွေးကောက်ပွဲအောင်နိုင်ခဲ့သည့်ပြည်သူ့အစိုးရလက်ထက်တွင် လွတ်လပ်စွာဆန္ဒထုတ်ဖော်ခွင့်ကို ကန့်သတ်ထားခြင်းဖြစ်၍ လုံးဝမဖြစ်သင့်ပေ။

ပုပ်ရဟန်းမင်းကြီး၏ခရီးစဉ်မတိုင်မီ ထိုသို့တားမြစ်ထားခြင်းဖြစ်ကြောင်း ရန်ကုန်တိုင်းလူမှုရေး ၀န်ကြီးဦးနိုင်ငံလင်းက 7Day Daily သတင်းစာသို့ ဖြေကြားလိုက်သည်။ ထိုသို့ဆိုလျှင်ပင် ရန်ကုန်တိုင်းအစိုးရအနေဖြင့် နိုင်ငံသားတစ် ဦးချင်းစီ၏ရပိုင်ခွင့်၊ ဒီမိုကရေစီ၏အခြေခံတန်ဖိုးများကို အလေးထား၍ ယခုနည်းလမ်းကိုမရွေးဘဲ အခြားနည်းလမ်းများကိုသာ ရွေးချယ်သင့်ပါသည်။ အာဏာရှင်အစိုးရများကို ပြည်သူနှင့်အတူ ရပ်တည်၍ အတိုက်အခံလုပ်ကာအာဏာရရှိခဲ့သောအစိုးရဖြစ်သောကြောင့် အစိုးရတာဝန်ရှိသူတစ်ဦးချင်း၏ လုပ်ကိုင်ဆောင်ရွက်မှုများမှာ အာဏာရှင်မဆန်ဘဲဒီမိုကရေစီကျင့်စဉ်နှင့်အညီ လုပ်ကိုင်ဆောင်ရွက်ကြရန် လိုပါသည်။ ဘော်တဲယာ၏  အထက်ပါအဆိုအမိန့်ကို အမြဲနှလုံးသွင်းရန် တိုက်တွန်းလိုက်ရပါသည်။