ဇင်ဘာဘွေ သမ္မတ မူဂါဘီကို စစ်တပ်က နေအိမ် အကျယ်ချုပ်ဖြင့် ထိန်းသိမ်းထား

ဇင်ဘာဘွေနိုင်ငံ၏ မြို့တော် ဟာရာရီကို စစ်တပ်က ထိန်းချုပ်ထားပြီးနောက် သမ္မတ ရောဘတ် မူဂါဘီကို နေအိမ် အကျယ်ချုပ်ဖြင့် ထားရှိကြောင်း သိရသည်။

ဇင်ဘာဘွေ ပြဿနာကို အနီးကပ် စုံစမ်းနေသည့် တောင်အာဖရိက သမ္မတ ယာကော့ဘ် ဇူးမားက မူဂါဘီသည် နေအိမ် အကျယ်ချုပ်ဖြင့် ထိန်းသိမ်း ခံထားရကြောင်း အတည်ပြုခဲ့သည်။

နိုဝင်ဘာ ၁၄ ရက်တွင် ဇင်ဘာဘွေ စစ်တပ်သည် ဟာရာရီတွင် စတင် လှုပ်ရှားခဲ့ပြီး အစိုးရ ရုပ်မြင်သံကြား ဌာနကို သိမ်းယူခဲ့သည်။ ထို့နောက် စစ်တပ်က ၎င်းတို့သည် အစိုးရ အဖွဲ့အတွင်းရှိ ရာဇဝတ်သားများကို ရှင်းလင်း ဖယ်ရှားရန် စစ်ဆင်ရေးတစ်ရပ် ဆင်နွှဲခြင်းဖြစ်ပြီး သမ္မတ မူဂါဘီ၏ မိသားစု ဘေးရန်ကင်းကင်း ရှိနေကြောင်း ကြေညာသည်။

စစ်တပ်က အာဏာသိမ်းယူခြင်း မဟုတ်ဟု ငြင်းဆိုထားသော်လည်း လက်ရှိ အခြေအနေများက အာဏာသိမ်းမှုဆန်သည့် အရိပ်အငွေ့များ စတင် တွေ့မြင်လာရပြီ ဖြစ်သည်။ ဇင်ဘာဘွေတွင် မူဂါဘီ၏ အရိုက်အရာ ဆက်ခံရေး အားပြိုင်မှုများနှင့် ဆက်စပ်ပြီး ယခုလို ပြည်တွင်းရေး အရှုပ်အထွေးများထံ ဦးတည်လာခြင်း ဖြစ်သည်။

မူဂါဘီသည် အသက် ၉၃ နှစ်အရွယ် ရှိနေပြီဖြစ်ပြီး ၎င်း၏ အရိုက်အရာအတွက် သမ္မတကတော် ဂရေ့စ်မူဂါဘီနှင့် ဒုတိယ သမ္မတ အမ်မာဆန် နန်ဂါဝါတို့ အပြိုင်ဖြစ်နေသည်။ သို့သော် မူဂါဘီက နန်ဂါဝါကို ရာထူးမှ ဖယ်ရှားလိုက်သည့်နောက် အခြေအနေများ တင်းမာလာသည်။ နန်ဂါဝါသည် စစ်တပ်နှင့် ရင်းနှီးသော ဆက်ဆံရေး ရှိသူဖြစ်ပြီး လက်ရှိ အခြေအနေများ နောက်ဆက်တွဲ ပေါ်ပေါက်လာခဲ့သည်။

စစ်တပ်၏ လှုပ်ရှားမှုများနှင့် ပတ်သက်၍ သတင်းများ ရှုပ်ထွေးနေဆဲ ဖြစ်သော်လည်း ဇင်ဘာဘွေ ဘဏ္ဍာရေး ဝန်ကြီးကို ဖမ်းဆီးထားပြီဟုလည်း ယုံကြည်ရသည်။ တောင်အာဖရိက သမ္မတရုံးက “သမ္မတ ဇူးမားဟာ ဇင်ဘာဘွေ သမ္မတ မူဂါဘီနဲ့ အဆက်အသွယ် ရခဲ့ပါတယ်။ လောလောဆယ် မူဂါဘီဟာ နေအိမ် အကျယ်ချုပ် ကျခံနေရပေမယ့် အန္တရာယ် ကင်းရှင်းကြောင်း အတည်ပြုနိုင်ပါတယ်”ဟု ထုတ်ပြန်ခဲ့သည်။

ဇင်ဘာဘွေ စစ်တပ် အကြီးအကဲ ဗိုလ်ချုပ်ကြီး ကွန်စတန်တီနို ချီဝမ်ဂါက ၎င်းတို့၏ လှုပ်ရှားမှုသည် အာဏာသိမ်းမှု မဟုတ်ဟု တွင်တွင်ငြင်းဆိုထားပြီး အစိုးရနှင့် အာဏာရ ပါတီအတွင်းမှ ရာဇဝတ်သားများကို သုတ်သင် ရှင်းလင်းရန်သာ ရည်ရွယ်ကြောင်း အခိုင်အမာ ကြေညာထားသည်။

Ref: AFP