ထိန်းချုပ်ရန်လိုအပ်နေသေး၍ ထိန်းချုပ်နေရဟု ဦးတင်အေးပြော

မေလ ၁၅ ရက်က ပြုလုပ်သည့် ရွေးကောက်ပွဲ ကော်မရှင်နှင့် နိုင်ငံရေးပါတီများ ရွေးကောက်ပွဲဆိုင်ရာ ပူပေါင်းညှိနှိုင်းအစည်းအဝေးကျင်းပစဉ် (ဓာတ်ပုံ - ကျော်ဇင်သန်း)

လက်ရှိအချိန်သည် ထိန်းချုပ်ရန် လိုအပ်သေးသည့်အချိန် ဖြစ်သည့်အတွက် နိုင်ငံရေးပါတီများကို ချုပ်ချယ်ထားရခြင်းဖြစ်သည်ဟု မဲဆွယ်စည်းရုံးရာတွင် ကန့်သတ်မှုများရှိကြောင်း ဝေဖန်ခံရသော ညွှန်ကြားချက်မူကြမ်း နှင့် ပတ်သက်ပြီး ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးတင်အေးက ပြောကြားလိုက်သည်။

‘‘ဒီအချိန်ဟာ နည်းနည်း ထိန်းချုပ်ဖို့ ကာလဖြစ်တဲ့အတွက်ကြောင့်မို့ ကျွန်တော်တို့ဟာ ပါတီတွေကို ထိန်းချုပ်ထားတယ်။ ထိန်းချုပ်ရတဲ့သဘော ရှိတယ်။ အဲဒီအတွက်ကြောင့်မို့ ဒါကို နားလည်ပေးပါ’’ဟု  ဦးတင်အေးကပြောသည်။

ပြီးခဲ့သည့်ရက်ပိုင်းအတွင်း နိုင်ငံရေးပါတီများထံ ဖြန့်ဝေခဲ့သော လွှတ်တော်ကိုယ်စားလှယ်လောင်းများ  စုဝေးဟောပြောခွင့် နှင့် မဲဆွယ်စည်းရုံးခွင့်ဆိုင်ရာ ညွှန်ကြားချက်မူကြမ်း အပါအဝင် ရွေးကောက်ပွဲဆိုင်ရာ မဟာဗျူဟာစီမံကိန်းနှင့် ပတ်သက်ပြီး မေလ ၁၅ ရက်က ရန်ကုန်မြို့တွင် နိုင်ငံရေးပါတီများနှင့် တွေ့ဆုံရာ၌ ဦးတင်အေးက ပြောကြားခဲ့ခြင်းဖြစ်သည်။

  ‘‘သူပြောတာ ကျွန်တော် မှတ်ထားတယ်ဗျ။ ပြောချင်တာကတော့ဗျာ။ ကျွန်တော်တို့က ဒီမိုကရေစီနဲ့ မတန်သေးဘူးလို့ ထင်နေပုံရတယ်။ အဲဒါ သူတို့စစ်တပ်ကလာတဲ့သူတွေရဲ့ အမြင်လေ။ တိုင်းပြည်ကို ဘယ်လိုငြိမ်ဝပ်ပိပြားအောင် ဘယ်လိုလုပ်မလဲပဲ သိတာ။  အာဏာရှင်အငွေ့အသက်ပေါ့’’ဟု မွန်အမျိုးသားပါတီ ဗဟိုအလုပ်အမှုဆောင် နိုင်စံနိုင်က ပြောသည်။

 မေလဒုတိယပတ်အတွင်း နိုင်ငံရေးပါတီများထံ ဖြန့်ဝေထားသော ပြည်ထောင်စုရွေးကောက်ပွဲကော်မရှင်၏ လွှတ်တော်ကိုယ်စားလှယ်လောင်းများ စုဝေးဟောပြောခွင့်နှင့် မဲဆွယ်စည်းရုံးခွင့်ဆိုင်ရာ ညွှန်ကြားချက်မူကြမ်းသည် မဲဆွယ်စည်းရုံးရာတွင် ကန့်သတ်မှုများရှိနေကြောင်း နိုင်ငံရေးပါတီများက ထောက်ပြထားသည်။

ညွှန်ကြားချက်မူကြမ်းအရ ရွေးကောက်ပွဲကာလတွင် သက်ဆိုင်ရာမဲဆန္ဒနယ်များ၌  ဝင်ရောက်ယှဉ်ပြိုင်မည့် လွှတ်တော်ကိုယ်စားလှယ်လောင်းအတွက် ပါတီခေါင်းဆောင်အပါအဝင် အခြားလူပုဂ္ဂိုလ်များက မဲဆွယ်စည်းရုံးဟောပြောလိုပါက ပြည်ထောင်စုရွေးကောက်ပွဲကော်မရှင်ထံ စာတင်ကာ ခွင့်ပြုချက်တောင်းခံရမည်ဖြစ်သည်။

ယင်းအချက်သည် အမျိုးသားဒီမိုကရေစီအဖွဲ့ချုပ်ကို လာမည့် ရွေးကောက်ပွဲတွင် ပြည်သူလူထု ထောက်ခံမှုရရှိရန် နိုင်ငံတစ်ဝန်း ဒေါ်အောင်ဆန်းစုကြည်၏ မဲဆွယ်စည်းရုံးရေးလှုပ်ရှားမှုများကို ကန့်သတ်နိုင်ရန် ရည်ရွယ်ခြင်းဖြစ်နိုင်ကြောင်း ရခိုင်အမျိုးသားပါတီခေါင်းဆောင် ဦးအေးသာအောင်က သုံးသပ်သည်။

‘‘ခင်ဗျားတို့တွေ လုံခြုံရေး မထိခိုက်အောင် ထပ်နေရင် ဘယ်သူက ဒီကနေ့ဆွေးနွေး ဘယ်သူက ဘယ်နေ့ဆွေးနွေးဆိုတာ လုပ်ပေးနိုင်အောင် ဒါမျိုးတွေကြောင့် ကျွန်တော်လုပ်တာပါ။ လျှောက်ခိုင်းတာပါ’’ဟု ဦးတင်အေးက ယင်းအချက်အပေါ် နိုင်ငံရေးပါတီများထံ ပြန်လည်ရှင်းပြသည်။

ရွေးကောက်ပွဲ မဲဆွယ်စည်းရုံးရေး ကန့်သတ်ချက်သည် ဥပဒေပြဋ္ဌာန်းချက်များတွင် မရှိသဖြင့် ပြဋ္ဌာန်းခြင်းမပြုပါရန် ပြည်ထောင်စု ရွေးကောက်ပွဲကော်မရှင်ထံ စာရေးပြီး ပေးပို့ထားသည်ဟုလည်း အမျိုးသားဒီမိုကရေစီအဖွဲ့ချုပ်မှ ပြောရေးဆိုခွင့်ရှိသူ ဦးဉာဏ်ဝင်း က သတင်းမီဒီယာများအားပြောကြားသည်။

မေလ ၁၅ ရက်တွင် ပြည် ထောင်စုရွေးကောက်ပွဲကော်မရှင်နှင့် နိုင်ငံရေးပါတီ ၆၀ ကျော် တို့သည် ရန်ကုန်မြို့ရှိ SKY STAR ဟိုတယ်၌ ရှစ်နာရီကျော်ကြာ တွေ့ဆုံဆွေးနွေးမှု ပြုလုပ်ခဲ့ပြီး လွှတ်တော်ကိုယ်စားလှယ်လောင်းများက စုဝေးဟောပြောခွင့်နှင့် မဲဆွယ် စည်းရုံးခွင့်ဆိုင်ရာ ညွှန်ကြားချက် မူကြမ်းအပေါ် အကြံပြုချက်ပေးခြင်းများ ပြုလုပ်ခဲ့ကြသည်။

လွှတ်တော်ကိုယ်စားလှယ်လောင်းများ စုဝေးဟောပြောခွင့် နှင့် မဲဆွယ်စည်းရုံးခွင့်ဆိုင်ရာ ညွှန်ကြားချက်မူကြမ်းကို ပြဋ္ဌာန်းနိုင်ရေးအတွက် နိုင်ငံရေးပါတီများနှင့် ထပ်မံတွေ့ဆုံမှုများ ပြုလုပ်သွားမည်ဟု ဦးတင်အေးက ယင်းတွေ့ဆုံမှုတွင် ပြောကြားသည်။