သိန်းတစ်သောင်း ကံထူးရှင် ပဟေဠိနှင့် ထီလောကလျှို့ဝှက်ချက်များ

အောင်ဘာလေထီကံစမ်းရန် ထီလက်မှတ်ရွေးချယ်နေသူအချို့ (ဓာတ်ပုံ-စိုင်းဇော်)

 ရန်ကုန်မြို့ ၂၇ လမ်းအထက်ဘလောက်ရှိ ပင်ရင်းထီဆိုင်ကြီးတစ်ခု၏ အတွင်း၌ အသက် (၆၀)နှစ်ခန့်အရွယ် ထီလုပ်ငန်းရှင်တစ်ဦးက လက်ကိုင်ဖုန်းဖြင့် တစ်ဖက်က ပြောကြားမှုကို စိတ်ဝင်တစားနားထောင်နေသည်။

သုံးမိနစ်ခန့်ကြာ ဖုန်းပြောနေစဉ်အတောအတွင်း သူ့မျက်နှာတွင် အံ့သြမှုဖြစ်ပေါ်နေသည့် အမူအရာကို ထင်ရှားစွာ တွေ့ရသည်။

 ‘‘သိန်းတစ်သောင်းဆုကို သိန်းတစ်ထောင့်ငါးရာအထိ အလိုက်တင်ရောင်းဖို့ဆိုပြီး သတင်းထွက်နေတယ်။ ပြန်ဝယ်မယ့်သူ တွေဘက်က သိန်းငါးရာထက် ပိုမပေးသေးဘူး’’ဟု ထီလောကမှ အသိဖြစ်သူထံ စုံစမ်းမေးမြန်းပြီး နောက်ကြားရသည့် သတင်းကို ၎င်းကပြောသည်။

ကျပ် ၅၀၀ တန် အောင်ဘလေထီ၏အမြင့်ဆုံးဆုဖြစ်သည့် ကျပ်သိန်းတစ်သောင်းဆုကို ထီဖွင့်လှစ်သည့် ခြောက်ကြိမ်မြောက်၌ ထီကံထူးသူအမည်ထွက်ပေါ် ခြင်းမရှိသေးသောကြောင့် ထီကံစမ်းသူများအပြင် ထီအရောင်း အဝယ်လုပ်ငန်းလုပ်ကိုင်သူများအကြား စိတ်ဝင်စားမှု မြင့်တက်နေသည့် အကြောင်းအရာဖြစ်နေသည်။

ထီဖွင့်လှစ်ပြီး နှစ်ပတ်နီးပါးအကြာ စက်တင်ဘာ ၁၁ ရက်အထိ ယင်းထီဆုငွေကျပ်သိန်းတစ်သောင်းကို လာရောက်ထုတ်ယူခြင်းမရှိသေးသကဲ့သို့ ထီဆုရှင်ကိုလည်း ကြေညာနိုင်ခြင်းမရှီသေးသောကြောင့် ထင်မြင်ချက်များစွာ ထွက်ပေါ်နေသည်။

‘‘လုံခြုံရေးအရဆိုရင်တော့ အဲဒီလောက်ထိ မကြာနိုင်ဘူးလေ။ ထီလက်မှတ်အရောင်းအဝယ်ရှိ နိုင်လို့ ကြာနေတာလို့ ထင်တယ်။ သေချာတော့ မပြောနိုင်ပေမယ့် လောလောဆယ်သတင်းထွက်နေတာတော့ အဲဒီလိုပဲ’’ဟု ထီပင်ရင်း လုပ်ငန်းကို နှစ် ၂၀ခန့် လုပ်ကိုင်ခဲ့ သည့် အမည်မဖော်လိုသူ အထက်ပါထီလုပ်ငန်းရှင်က သူ၏အမြင်ကို ပြောသည်။

အောင်ဘာလေထီ၏ ပေါက်မဲဆုငွေအပေါ် ဝင်ငွေခွန်ကင်းလွတ်ခွင့်ရရှိထားခြင်းကြောင့် အခွန်တိမ်းရှောင်လိုသည့် စီးပွားရေးလုပ်ငန်းရှင်အချို့က ပေါက်မဲထီလက်မှတ်များကို လွန်ခဲ့သည့် ဆယ်စုနှစ်များစွာ ကတည်းက လိုက်လံဝယ်ယူသော ဈေးကွက်ရှိသည်။ ပေါက်မဲထီလက်မှတ်ကို မူလကံထူးရှင်ကိုယ်တိုင်ထုတ်ယူခြင်းမရှိဘဲ တစ်ဆင့်ခံပြန်လည်ရောင်းချခြင်းက ထီလောကသားများအတွက် အထူးအဆန်းဖြစ်ရပ်တော့ မဟုတ်ပေ။

စီးပွားရေးလုပ်ငန်းရှင်အချို့သည် ထီပေါက်မဲလက်မှတ်များကို ပြန်လည်ဝယ်ယူသော ဈေးကွက်ရှိနေသည်ဆိုသော်လည်း အမြင့်ဆုံးဆုပေါက်မဲ လက်မှတ်များထက် အလယ်အလတ်ဆု ပေါက်မဲလက်မှတ်များကိုသာ အများဆုံး ဝယ်ယူလေ့ရှိကြောင်းလည်း အဆိုပါထီလက်မှတ်အရောင်းအဝယ်လုပ်ငန်းလုပ်ကိုင် သူအချို့က မှတ်ချက်ပြုသည်။


ထီဆိုင်တစ်ခုတွင် ထီထိုးနေစဉ် ဓာတ်ပုံ−စိုင်းဇော်

‘‘ကျပ် နှစ်ရာတန်ထီတုန်းကလည်း အမြင့်ဆုံးဆုကို ဝယ်ယူတာနည်းတယ်။ ရိပ်မိမှာစိုးတာကြောင့် အလယ်အလတ်ဆုထဲကပဲ လိုသလောက် တန်ဖိုးအစောင်ရေများများ ဝယ်ကြတယ်’’ဟု ထီအရောင်းဆိုင် ကိုယ်စားလှယ်တစ် ဦးက ပြောသည်။

‘‘အိမ်ခြံမြေတစ်ခုခုဝယ်မယ့်သူတွေ၊ ငွေဖြူလုပ်ချင်တဲ့သူတွေက ပေါက်မဲထီလက်မှတ်တွေကို ဝယ်ကြတာလေ။ ထီဆိုင်တွေကတော့ များသောအားဖြင့် ကြားခံပေါ့။ ဒီဈေးကွက်ကို အကြောင်းပြု ပြီးလုပ်နေတဲ့ ပွဲစားတွေလည်း တော်တော်များများရှိပါတယ်’’ဟု ပန်းဘဲတန်းမြို့နယ် ၂၇ လမ်းရှိ ထီ အရောင်းဆိုင်ဝန်ထမ်း ကိုပေါက်က ဖွင့်ဟသည်။

အမြင့်ဆုံးဆုငွေ ကျပ်သိန်းတစ်သောင်းဖြစ်သည့် ကျပ်ငါးရာတန်အောင်ဘာလေထီကို အစိုးရသစ်တာဝန်ယူပြီး တစ်နှစ်အကြာ ၂၀၁၇ မတ်လတွင် စတင်ထုတ်လုပ်ဖြန့်ဖြူးခဲ့ပြီး ပထမအကြိမ်ကို ဧပြီ ၁ ရက်တွင် ဖွင့်လှစ်ခဲ့သည်။

ယခင်က ထီတစ်စောင်လျှင် ကျပ် နှစ်ရာနှုန်းဖြင့် အစိုးရက သတ်မှတ်ရောင်းချခဲ့ပြီး အမြင့်ဆုံးဆုငွေ ကျပ်သိန်း ၁၅၀၀ သာ ရှိခဲ့သည်။

ကျပ်ငါးရာတန်ထီ၏ အမြင့်ဆုံးဆုငွေကိုမူ ကျပ်သိန်းတစ်သောင်းသတ်မှတ်ထားခြင်းကြောင့် ယင်းထီလက်မှတ် မရောင်းချမီကပင် ထီကံစမ်းသူများ၏ စိတ်ဝင်စားမှုကို ဖမ်းစားနိုင်ခဲ့သည်။

အဆိုပါထီ၏ ကျပ်သိန်းတစ်သောင်းဆုကံထူးရှင်ကို လေးကြိမ်မြောက်အထိ ဖွင့်လှစ်သည့် နေ့နှင့် ထီဖွင့်ပြီး ရက်ပိုင်းတွင် သိရှိနိုင်ခဲ့သော်လည်း ငါးကြိမ်မြောက်နှင့် ခြောက်ကြိမ်မြောက်တို့တွင် ကံထူးရှင် မသိရှိနိုင်ခဲ့ခြင်းကြောင့် ထီလက်မှတ်လက်ဝယ်ရှိမှုအပေါ် ထီကံစမ်းသူများနှင့် ထီလုပ်ငန်းလုပ်ကိုင်သူများအကြား မေးခွန်းထုတ်သံ ကျယ်လောင်လာသည်။

သို့သော် ငါးကြိမ်မြောက် ကျပ်သိန်းတစ်သောင်း ထီကံထူး သူများသည် ၎င်း၏လုံခြုံရေးအရ အမည်ထုတ်ဖော်မှု မပြုလုပ်ခြင်း ဖြစ်သည်ဟု ယင်းထီလက်မှတ်ကို ရောင်းချသည့် မိုးယံရွှေလမင်းနှင့် မြတ်ဆုကုဋေထီဆိုင်က သတင်း ထုတ်ပြန်သည်။

စက်တင်ဘာ ၁ ရက်က ဖွင့်လှစ်ခဲ့သည့် ခြောက်ကြိမ်မြောက်၌မူ ကျပ်သိန်းတစ်သောင်းကံထူးရှင်သာမက ရောင်းချသည့် ပင်ရင်းထီဆိုင်ပါ အစအနပျောက်နေသည်။

ထီပေါက်မဲဆုငွေကို သက်ဆိုင်ရာမြို့နယ် အခွန်ဦးစီးဌာနရုံးများနှင့် အောင်ဘာလေသိန်းဆုဌာနတို့တွင် ထုတ်ပေးနေသည်ဆိုသော်လည်း စာရွက်စာတမ်းများ ဖြည့်သွင်းတင်ပြရခြင်း၊ အချိန်ကြာမြင့်တတ်ခြင်းများကြောင့် ထီလက်မှတ်ကို အလွယ်တကူ ပြန်လည်ရောင်းချလေ့ရှိလာခြင်း ဖြစ်သည်ဟုလည်း ထီကံထူးသူအချို့က ပြောသည်။

‘‘အချိန်ကုန်လည်း သက်သာတယ်။ အလုပ်လည်း မရှုပ်ဘူး။ တန်ကြေးအတိုင်းလည်းရတာကြောင့် ထီရုံးမှာ သွားမထုတ်တော့ဘဲ ထီဆိုင်ပဲ ပြန်သွင်းလိုက်တယ်’’ ဟု ငါးကြိမ်မြောက်ထီဖွင့်လှစ်စဉ်က ကျပ်ငါးသောင်းဆုပေါက်ခဲ့ သည့် မြောက်ဥက္ကလာပမြို့နယ်မှ မသက်စိုးက ဆိုသည်။

အဆိုပါထီလက်မှတ်ကို ဆုငွေ ကျပ်ငါးသောင်းမှ တစ်သိန်းဆုအထိ အပိုငွေပေးလေ့မရှိဘဲ ဆုငွေတန်ဖိုးအတိုင်းသာ ထီအရောင်းဆိုင်များနှင့် ပွဲစားများက ပြန်လည်ဝယ်ယူလေ့ရှိပြီး ကျပ်တစ်သိန်းအထက် ဆုငွေပမာဏ များသည့် ပေါက်မဲထီလက်မှတ်များကို ဈေးပိုပေး၍ ဝယ်ယူနေသည်။

လက်ရှိဖြစ်ပေါ်နေသော ဈေးကွက်အရ ထီဆုငွေကျပ်ဆယ်သိန်းအထိ ထီလက်မှတ်ကို ယင်းငွေ၏ ၁ ရာခိုင်နှုန်းခန့်ဖြင့်လည်း ကောင်း၊ ထီဆုငွေသိန်းတစ်ထောင်ခန့်အထိကို ဆုငွေ၏ ၂ ရာခိုင်နှုန်းမှ ၃ ရာခိုင်နှုန်းခန့်အထိ လည်းကောင်း ဆုငွေပမာဏအပေါ် မူတည်၍ အပိုထပ်ဆောင်း ငွေပေး၍ ဝယ်ယူမှုများရှိနေခဲ့ကြောင်း ထီလုပ်ငန်းလုပ်ကိုင်နေသူအချို့က ဆိုသည်။

‘‘ပြန်ရောင်းတဲ့ အခါမှာလည်း ရာခိုင်နှုန်းအလိုက် သတ်မှတ်ဈေးတွေနဲ့ပဲဖြစ်တယ်။ ထီလက်မှတ်ဆုငွေရဲ့ ၆ ရာခိုင်နှုန်းလောက်အထိ သတ်မှတ်ရောင်းတာမျိုးလည်း ရှိတယ်။ တရားဝင် ဈေးကွက်မဟုတ်တာကြောင့် တစ်သမတ်လည်း ဈေးနှုန်းဆိုတာ မရှိဘူး’’ဟု ၂၇ လမ်းတွင် ထီလက်မှတ်ဝယ်၊ ရောင်းလုပ်ကိုင်နေသူတစ်ဦးက ပြောသည်။

ထို့အပြင် ထီပေါက်မဲဆုကြီးများမှာ စီးပွားရေးလုပ်ငန်းရှင်များ ဝယ်လိုမှုအတွက်သာမက ထီအရောင်းဆိုင်ကြီးများအတွက်လည်း လစဉ်မျှော်လင့်စရာမက်လုံးဖြစ်နေသည်။

ထို့ကြောင့် ဆုကြီးများကို ရောင်းချပေးနိုင်သည်ဟူသော ဂုဏ်ဖြင့် လူသိများလာစေရန် ထီအရောင်းဆိုင်ကြီးများကလည်း ယင်းဆုကြီးများ ရရှိရောင်းချပေး နိုင်ရန် ကြိုးစားမှုများရှိသည်။

ထီအရောင်းဆိုင်ကြီးများ၏ ကြိုးစားမှုသည် စီးပွားရေးလုပ်ငန်းရှင်များကဲ့သို့ ပေါက်မဲထီလက်မှတ်ကို ဝယ်ယူခြင်း မဟုတ်ဘဲ ကိုယ်ပိုင်ထီရောင်းချသူများကို စည်းရုံး၍ ကိုယ်စားလှယ်အဖြစ်ထားရှိခြင်းဖြစ်ကြောင်း ပင်ရင်း ထီအရောင်းဆိုင်ပိုင်ရှင်အချို့က ပြောသည်။

ကိုယ်ပိုင်ထီရောင်းချသူများက အောင်ဘာလေသိန်းဆုဌာနမှ ထုတ်ယူသည့် ထီလက်မှတ်စာရင်းကို ပင်ရင်းထီအရောင်းဆိုင် တစ်ခုခုသို့ ကြိုတင်ပေးပို့ထားကြရပြီး ယင်းထီလက်မှတ်များထဲမှ ဆုကြီးထွက်သွားပါက ပင်ရင်းဆိုင်က ရောင်းချပေးနိုင်သည်ဟု အမည်ထွက်မည်ဖြစ်ပြီး စာရင်းသွင်းထားသူက ကိုယ်စားလှယ်ဆုကို ခံစားခွင့်ရရှိစေမည်စနစ်ကို ကျင့်သုံးထားခြင်းဖြစ်သည်။

ထို့ကြောင့် ပင်ရင်းအရောင်းဆိုင်များသည် ဆုမဲများများ ရရှိနိုင်ရေး ကိုယ်ပိုင်ထီရောင်းချသူများကို အပြိုင်အဆိုင် စုဆောင်းလာကြောင်း ထီလုပ်ငန်းရှင်များက ပြောသည်။