အမ်ပီတီက သီးခြားကုမ္ပဏီတစ်ခုတည်ထောင်၍ Mobile Money ၀န်ဆောင်မှုဆောင်ရွက်မည်

 နိုင်ငံပိုင်ဆက်သွယ်ရေး အော်ပရေတာ တစ်ခုဖြစ်သည့် မြန်မာ့ဆက်သွယ်ရေး လုပ်ငန်း (MPT)က အသုံးပြုသူများအား မိုဘိုင်း ငွေပေးချေ ၀န်ဆောင်မှု (Mobile Money)ကို သီးခြား ကုမ္ပဏီတစ်ခုတည်ထောင်၍ ပေး အပ်သွားရန် စီစဉ်နေကြောင်း အမ်ပီတီ ဒုတိယစီးပွားရေးအရာ ရှိချုပ်ဦးသိန်းဟုတ်က ပြောသည်။

‘‘Mobile Money လုပ်ဖို့အ တွက် ဗဟိုဘဏ်ကနေ လိုင်စင်ချပေးဖို့ရာ အဆင်သင့်ဖြစ်နေတယ်။ သို့ပေမယ့် Mobile Money ရဲ့ ဥပဒေအရ တယ်လီကွန် အော်ပရေတာကနေပြီးတော့ သီးခြားကုမ္ပဏီတစ်ခုထောင်ရ မယ်ဆိုပြီးတော့ အချက်ပါတဲ့အတွက် အခုသီးခြားကုမ္ပဏီထောင်ဖို့ ကျွန်တော်တို့လုပ်နေပါတယ်’’ ဟု ၎င်းက ပြောသည်။

အမ်ပီတီအနေဖြင့် မိုဘိုင်း ငွေပေးချေဝန်ဆောင်မှု (Mobile Money) အကောင်အထည်ဖော်ရန် နည်းပညာပလက်ဖောင်းကို တရုတ်အခြေစိုက်နည်းပညာကုမ္ပဏီ Huawei နှင့် ပူးပေါင်းဆောင် ရွက်မည်ဖြစ်ပြီး သီးခြားကုမ္ပဏီတည်ထောင်ကာ ဗဟိုဘဏ်မှ လိုင်စင်ရရှိပါက ၀န်ဆောင်မှုများစတင်ပေးအပ်နိုင်ရန် အသင့်ပြင်ဆင်ထားကြောင်း ၎င်းကဆိုသည်။

‘‘လိုင်စင်ရဖို့လုပ်နေတယ်။ ရပြီးတာနဲ့ စလို့ရပြီပေါ့။ ကျွန် တော်တို့မှာ အေးဂျင့်တွေလည်း ရှာထားပြီးပြီ။ ကျွမ်းကျင်သူတွေ လည်း ခန့်ထားပြီးပြီ။ ၀န်ဆောင် မှုတွေစဖို့ကတော့ အဆင်သင့်ဖြစ် နေပါပြီ’’ ဟု ဦးသိန်းဟုတ်က ပြောသည်။

အမ်ပီတီအနေဖြင့် Mobile Money ၀န်ဆောင်မှု ပေးအပ်ရာတွင် ကနဦးအနေဖြင့် မိုဘိုင်းဖုန်းပေါ်မှ ငွေလွှဲသည့်ဝန်ဆောင်မှုကို စတင်ပေးအပ်မည်ဖြစ်ပြီး နောက်ပိုင်းတွင် မိုဘိုင်းငွေပေးချေဝန်ဆောင်မှုကို အသုံးပြု၍ အွန်လိုင်း Shopping များမှပစ္စည်းများ ၀ယ်ယူခြင်းအပါအ၀င် ၀န်ဆောင်မှုအသစ်များကို တိုးချဲ့ပေးမည်ဖြစ်ကြောင်း ၎င်းကဆိုသည်။