တက္ကသိုလ်၊ ကောလိပ်ကျောင်းစည်းကမ်းများတွင် နိုင်ငံရေးဆူပူမှုဆိုင်ရာ ပြစ်မှုပြစ်ဒဏ်များပယ်ဖျက်

အမျိုးသားပညာရေးဥပဒေမူကြမ်း ကန့်ကွက်ဆန္ဒပြပွဲတွင် ဆန္ဒထုတ်ဖော်နေသော ကျောင်းသားကျောင်းသူများ (ဓာတ်ပုံ − ဂျေမောင်မောင်(အမရပူရ))

တက္ကသိုလ်၊ ဒီဂရီကော လိပ်၊ ကောလိပ်နှင့် သိပ္ပံများ၏ ကျောင်းစည်းကမ်းများတွင် နိုင်ငံ ရေး ဆူပူမှုဆိုင်ရာ ပြစ်မှုပြစ်ဒဏ် များကို ပယ်ဖျက်ကြောင်း အဆင့်မြင့်ပညာဦးစီးဌာန ညွှန်ကြားရေးမှူးချုပ် ဒေါက်တာသိန်းဝင်းက ပြောသည်။

၂၀၁၇ တက္ကသိုလ်ဝင်ခွင့် လမ်းညွှန်ပါ ကျောင်းသား၊ ကျောင်းသူများ လိုက်နာရမည့် စည်းကမ်းထိန်းသိမ်းရေးဆိုင်ရာ ပြစ်မှုပြစ်ဒဏ်များတွင် နိုင်ငံရေး ဆူပူမှုနှင့်ဆိုင်သော အချက် ခြောက်ချက်ကို ပယ်ဖျက်ပြီး သက်ဆိုင်ရာကျောင်းများ၏ စည်းကမ်းချက်များ၌ ယင်းအချက်များ ပါဝင်တော့မည် မဟုတ်ပေ။

‘‘၀င်ခွင့်လမ်းညွှန်စာအုပ်မှာ အဲဒီအချက်တွေ ဖြုတ်ပစ်လိုက်ပြီ။ ဒီစာအုပ်မှာ ပါပြီးသားမို့ ကျောင်းတွေကိုတော့ သီးသန့်ညွှန်ကြားချက်မထုတ်တော့ပါဘူး’’ ဟု ဒေါက်တာသိန်းဝင်းက ပြောသည်။ဆူပူလှုပ်ရှားမှုတွင် ပါဝင်၍ ထိန်းသိမ်းခံရပြီး တရားရုံးမှ ပြစ် ဒဏ်ချမှတ်ခံရခြင်း၊ ဆူပူလှုပ်ရှား မှု၌ ခေါင်းဆောင်အဖြစ် ပါဝင် ခြင်း၊ ဆူပူလှုပ်ရှားမှုဖြစ်ပေါ်စေရန် ရည်ရွယ်ချက်ဖြင့် လှုံ့ဆော် ခြင်း၊ လှုံ့ဆော်မှုကို အားပေးခြင်း၊ ကိုယ်တိုင်ပါဝင်ခြင်း၊ ဆူပူလှုပ်ရှားမှုတွင် တက်ကြွစွာပါဝင်ခြင်း၊ နောက်လိုက်အဖြစ် ပါဝင်ခြင်း၊ ဆွဲဆောင်၊ ခြိမ်းခြောက်မှုကြောင့် နောက်လိုက်အဖြစ် ပါဝင်ခြင်းတို့ ကို ပြစ်မှုအဖြစ်သတ်မှတ်ပြီး ပြင်းထန်စွာ သတိပေးခြင်း၊ ကျောင်းမှထုတ်ပယ်ခြင်း ပြစ်ဒဏ်များ ကျခံရမည်ဟု ယခင်နှစ်အဆက်ဆက်က တက္ကသိုလ်ဝင်ခွင့်လမ်းညွှန်တွင် ထည့်သွင်းထားသည်။

‘‘ဒီအချက်တွေကို ဖြုတ် လိုက်တာဟာ သေချာတယ်ဆို ရင် ကျောင်းသားတွေအတွက် ကျောင်းသားအခွင့်အရေး အ ပြည့်အ၀ပိုရလာတယ်။ နိုင်ငံသား အခွင့်အရေး အပြည့်အ၀ရလာ တယ်လို့ ထင်ပါတယ်။ ကျောင်း အုပ်ချုပ်ရေး အဖွဲ့တွေအနေနဲ့ လည်း စနစ်တကျလိုက်နာဖို့ လို အပ်ပါတယ်’’ဟု ရန်ကုန်ပညာ ရေးတက္ကသိုလ် ကျောင်းသား သမဂ္ဂဥက္ကဋ္ဌ ကိုစိုးသူရကျော်က ပြောသည်။

လာမည့် ၂၀၁၇-၂၀၁၈ ပညာသင်နှစ်၊ ဒီဇင်ဘာ ကျောင်း ဖွင့်ချိန်ကစ၍ အဆိုပါကျောင်းများတွင် အကျင့်စာရိတ္တပျက်ပြားမှုဆိုင်ရာ ပြစ်မှုခုနစ်ချက်နှင့် ကျောင်းစည်းကမ်းဖောက်ဖျက်မှု ဆိုင်ရာပြစ်မှုငါးချက်သာ ကျောင်းစည်းကမ်းအဖြစ် ထုတ်ပြန်မည်ဖြစ်သည်။

‘‘ဒီအချက်တွေ ဖြုတ်ပစ် လိုက်တာက ဒီမိုကရေစီပြုပြင် ပြောင်းလဲမှုကို ပြသလိုက်တဲ့ သ ဘောပေါ့။ ကြိုဆိုရမယ့်လုပ်ရပ် လို့ မြင်ပါတယ်။ ဒါပေမဲ့ စာရွက် ပေါ်မှာတင် ပြောင်းလဲလို့မရဘူး။ တကယ်တမ်း အလုပ်လုပ်နေတဲ့ ပါချုပ်တွေ၊ ကျောင်းအုပ်ချုပ်ရေး အဖွဲ့တွေအနေနဲ့လည်း ဒါကို လိုက်နာဖို့ လိုတယ်။ စာရွက်ပေါ် မှာ ပြောင်းလိုက်တာထက် သူတို့ ရဲ့ စိတ်ကိုကဒီမိုကရေစီမှာ ဒါတွေ ပြောင်းဖို့လိုတယ်ဆိုတာ သိပြီး ပြောင်းဖို့လိုတယ်’’ဟု ဒဂုံတက္ကသိုလ်မှ ကထိက ဒေါက်တာအာကာမိုးသူက မှတ်ချက်ပြုသည်။

ယခင်ခေတ်အဆက်ဆက် က ကျောင်းသားလှုပ်ရှားမှု၊ ဆန္ဒ ထုတ်ဖော်မှုများတွင် ပါဝင်သည့် ကျောင်းသား၊ ကျောင်းသူများကို နိုင်ငံရေးဆူပူမှုဆိုင်ရာပြစ်မှုဖြင့် အရေးယူခြင်းများရှိခဲ့သည်။ ပြီးခဲ့ သည့် ဧပြီအတွင်းက ကျောင်းသားထု အခွင့်အရေးများရရှိရေး ဆန္ဒပြတောင်းဆိုခြင်းကြောင့် ထောင်ဒဏ်တစ်လကျခံရသော စစ်ကိုင်းပညာရေးကောလိပ်ကျောင်းသားကို စစ်ကိုင်းပညာရေးကောလိပ်ကျောင်းအုပ်ကြီးက နိုင်ငံရေးဆူပူမှုဆိုင်ရာပြစ်မှုဖြင့် ကျောင်းထုတ်ခဲ့ပြီးမှ အဆင့်မြင့်ပညာဦးစီးဌာန ညွှန်ကြားချက်ဖြင့် ပြန်လည် တက်ရောက်ခွင့်ပြုသည့်ဖြစ်စဉ်ရှိခဲ့သည်။

More in News Section

Top News