၂၀၁၂ လယ်ယာမြေဥပဒေပြင်ဆင်ရေး တောင်သူများက လွှတ်တော်တွင် အချက်ငါးချက် တောင်းဆိုမည်ဟုဆို

မန္တလေးမြို့တွင် ပြုလုပ်သော လယ်ယာမြေဥပဒေပြင်ဆင်ရေး ဆွေးနွေးပွဲသို့တက်ရောက်လာသူများ (ဓာတ်ပုံ−စည်သူလင်း)

၂၀၁၂ လယ်ယာမြေ ဥပဒေ ပြင်ဆင်ရေး အချက်ငါး ချက်ကို တိုင်းနှင့်ပြည်နယ် ၁၄ ခုရှိ တောင်သူများက လွှတ်တော်သို့ တင်ပြတောင်းဆိုမည် ဖြစ် ကြောင်း သတင်းရရှိသည်။

လယ်ယာမြေဥပဒေပြင်ဆင် ရေး ဆွေးနွေးပွဲကို သြဂုတ် ၈ နှင့် ၉ ရက်များတွင် မန္တလေးမြို့ Hotel Mandalay ၌ ပြုလုပ်ခဲ့ရာ အချက်ငါးချက် တောင်းဆိုရန် သဘောတူညီမှု ရရှိကြောင်း ပွဲ ကျင်းပရေး ကော်မတီ ဥက္ကဋ္ဌ ဦးတင့်လွင်က ပြောသည်။

လွှတ်တော်သို့ တင်ပြ တောင်းဆိုမည့် အချက်ငါးချက် တွင် ရွှေ့ပြောင်းတောင်ယာကိစ္စ များ၊ သိမ်းဆည်းခံလယ်ယာမြေ များ၌ တောင်သူများအပေါ် နစ်နာကြေးပေးချေရမည့် ကိစ္စများ၊ တောင်သူလယ်သမားဆိုသည့် အဓိပ္ပာယ်ဖွင့်ဆိုချက်များ၊ လယ် ယာမြေပေါ်တွင် ပြည်ပနိုင်ငံသား များ လာရောက်ရင်းနှီးမြှုပ်နှံရာ ၌ ပိုင်ဆိုင်ခွင့်မပေးရန် အချက် များ၊ မြေလွတ်မြေရိုင်းများ ဖော် ထုတ်ပြီး လယ်ယာမဲ့တောင်သူ များကို ပေးအပ်ရန် တောင်းဆို သည့် အချက်များဖြစ်ကြောင်း ဆွေးနွေးပွဲ ကျင်းပရေးကော်မတီမှ သိရသည်။

‘‘ရွှေ့ပြောင်းတောင်ယာ တွေမှာ နိုင်ငံတော်က ပံ့ပိုးတာ ဘာမှမရှိဘူး။ အဲဒီတိုင်းရင်းသား တွေကို နိုင်ငံတော်က ပံ့ပိုးမှုဘယ် လိုပေးမလဲ။ ကုမ္ပဏီ၊ စစ်တပ်၊ စက်ရုံတို့က သိမ်းဆည်းတဲ့ကိစ္စ တွေမှာ လိုအပ်တာထက် ပိုသိမ်း တယ်။ သိမ်းခံရတဲ့ လယ်သမား ကိုနစ်နာကြေးဘယ်လိုပေးမလဲ။ နောက်ပြီး ကိုယ်တိုင်ကြီးကြပ်ပြီး ကိုယ်တိုင်လုပ်စားနေသူသာလျှင် တောင်သူလယ်သမားလို့ ခေါ်တွင် စေချင်တယ်။ လယ်ယာမြေကို ငါးကန်တူးတယ်။ အဲဒီငါးမွေးတဲ့ သူက တောင်သူမဟုတ်ဘူး။ အဓိပ္ပာယ်သီးခြားဖွင့်ဆိုပေးစေ ချင်တယ်’’ ဟု ဦးတင့်လွင်က ပြောသည်။ ထို့အပြင် မြေလွတ်မြေရိုင်း ဧကများကို ကုမ္ပဏီများက လျှောက်ယူရာတွင် အကျယ်အ ဝန်းများစွာ ခွင့်ပြုမှုကို တောင်သူ များအနေဖြင့် ကန့်ကွက်ကြောင်း နှင့် လာရောက်ရင်းနှီးမြှုပ်နှံသော ပြည်ပနိုင်ငံသားများကို လယ်မြေ ပိုင်ဆိုင်ခွင့်မပေးဘဲ အငှားသာခွင့် ပြုပေးရန် တင်ပြတောင်းဆိုမည် ဖြစ်ကြောင်း ၎င်းက ဆက်လက် ပြောသည်။

ဆွေးနွေးပွဲသို့ ပြည်သူ့လွှတ် တော် အလုပ်သမားရေးရာ ကော် မတီဥက္ကဋ္ဌ၊ အမျိုးသားလွှတ်တော် တောင်သူလယ်သမားရေးရာ ကော်မတီဥက္ကဋ္ဌတို့ တက်ရောက်  ခဲ့သည်။

Top News